قونايەۆ قالالىق مادەنيەت ۇيىندە الماتى وبلىسى اكىمدىگىنىڭ قولداۋىمەن كومپوزيتور، ديريجەر، كۇيشى، قازاقستاننىڭ حالىق ءارتيسى نۇرعيسا تىلەندييەۆتىڭ 100 جىلدىعىنا وراي، «نۇرعيسا جىلىنىڭ» سالتاناتتى اشىلۋى ءوتتى. ايتۋلى ءىس-شاراعا وراي، الماتى قالاسى مۋزەيلەر بىرلەستىگىنە قاراستى نۇرعيسا تىلەندييەۆ مەموريالدى مۋزەيىنىڭ جىلجىمالى كورمەسى ۇيىمداستىرىلىپ، 70-كە جۋىق ەكسپونات قويىلدى.
«نۇرعيسا جىلىنىڭ» اشىلۋ راسىمىنە الماتى قالاسى مەن الماتى وبلىستىق ءماسليحات دەپۋتاتتارى مەن قوعامدىق كەڭەس مۇشەلەرى، اۋدان، قالا اكىمدەرىنىڭ ورىنباسارلارى، اۋداندىق، قالالىق مادەنيەت، تىلدەردى دامىتۋ، اۋداندىق، قالالىق مادەنيەت ۇيلەرىنىڭ ديرەكتورلارى قاتىستى. سالتاناتتى كەشتى الماتى وبلىسىنىڭ اكىمى مارات سۇلتانعازييەۆ اشىپ، قايتالانباس ونەر يەسىنىڭ عاسىرلىق تويى اياسىندا قولعا الىنىپ جاتقان جۇمىستارمەن تانىستىردى. كەلەسى كەزەكتە قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ ءسوز الىپ، مەملەكەت باسشىسىنىڭ ىستىق ىقىلاستى لەبىزىن جەتكىزدى.
كەش بارىسىندا ق ر ەڭبەك سىڭىرگەن قايراتكەرلەرى مەيرامبەك بەسپايەۆ، تامارا اسار، ايگۇل قوسانوۆا، ءمادينا ءسادۋاقاسوۆا، قازاق ەستراداسىنىڭ جارىق جۇلدىزدارى ميراس پەن قۇرالاي، گۇلنۇر ورازىمبەتوۆا نۇرعيسا تىلەندييەۆتىڭ اندەرىن ناشىنە كەلتىرە شىرقادى. سونداي-اق، تەاتر اكتەرى ەدىل رامازان مەن اقبوتا راحات نۇرعيسا تىلەندييەۆ ومىرىنە ارقاۋ بولعان اقىنداردىڭ جىرىن وقىسا، «نۇرعيسا ومىرگە كەلدى» اتتى قويىلىم دا شىنايى شىقتى. سالتاناتتى كەشكە «التىناي» مەملەكەتتىك حالىق ءبيى ءانسامبلى، ءسۇيىنباي اتىنداعى الماتى وبلىستىق فيلارمونياسى، «ءۇشقوڭىر» فولكلورلى-ەتنوگرافيالىق ءانسامبلى ونەرپازدارى قاتىسىپ، كومپوزيتوردىڭ شىعارمالارىن ورىندادى. قازاق توپىراعىندا باستالعان «نۇرعيسا جىلى» قوڭىر كۇزدە پاريجدە قورىتىندىلاناتىن بولادى.
تاقىرىپقا وراي
ءدىنزۋحرا تىلەندى، قازاق مەملەكەتتىك اكادەميالىق «وتىرار سازى» فولكلورلى ەتنوگرافيالىق انسامبل جەتەكشىسى:
مەن ءۇشىن اكەمنىڭ بارلىق شىعارمالارى قىمبات
كەش بويى ءوزىمدى ازەر ۇستاپ، تولقىپ وتىردىم. اكەمنىڭ بارلىق شىعارمالارى مەن ءۇشىن قىمبات. ءاربىرى ماعان تانىس، بالا كۇنىمنەن قۇلاعىمدا قالدى. مەن سول اۋەنمەن ءوستىم. ءقازىر اكەمنىڭ اماناتىن ارقالاپ، سالىپ كەتكەن دارا جولىمەن كەلەمىن.
دانيار الييەۆ، الماتى وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى:
نۇرعيسا اتىنداعى مادەنيەت سارايى اشىلادى
وسىناۋ مەرەيتوي اياسىندا وبلىس كولەمىندە وتىلەتىن ءىس-شارالاردىڭ جوسپارى بەكىتىلدى. رەسپۋبليكالىق، حالىقارالىق دەڭگەيدەگى ءىس-شارالار وتەتىن بولادى. قازىرگى تاڭدا ۇلى كومپوزيتوردىڭ تۋعان جەرىندە ۇلكەن مادەنيەت سارايى بوي كوتەرىپ جاتىر. ءساتىن سالسا، سول مادەنيەت ورداسىنا نۇرعيسا تىلەندييەۆتىڭ ەسىمى بەرىلىپ، ەسكەرتكىشى اشىلادى. سوسىن پەكيندە ۇلكەن مەرەكەلىك ءىس-شارا وتەدى. بۇل بولمىسى ءبىر قالىپقا سىيمايتىن تۇلعاعا دەگەن حالقىنىڭ قۇرمەتى.