بۇگىن، 29 ناۋرىز الماتىداعى ورتالىق اسكەري سپورتتىق كلۋبىندا سامبودان ق ر كۇشتىك قۇرىلىمدارى اراسىندا رەسپۋبليكالىق اشىق بىرىنشىلىكتىڭ فينالدىق كەزدەسۋلەرى باستالدى.
بۇل سايىس – ەلىمىزدىڭ قاۋىپسىزدىگىن قامتاماسىز ەتىپ جۇرگەن ازاماتتاردىڭ سپورتتاعى شەبەرلىگىن، ەپتىلىگى مەن كۇشىن سىنايتىن دودا. ءتۋرنيردىڭ ماقساتى – كۇشتىك قۇرىلىم قىزمەتكەرلەرىنىڭ اراسىندا سالاۋاتتى ءومىر سالتىن ناسيحاتتاۋ جانە پاتريوتتىق رۋحتى ارتتىرۋ.
ايتا كەتەيىك، اتالمىش تۋرنيرگە ەلىمىزدىڭ ءار وڭىرىنەن قۇقىق قورعاۋ ورگاندارى مەن اسكەري قۇرىلىم وكىلدەرى قاتىسۋدا. جارىسقا قاتىسۋشىلار ءوز شەبەرلىكتەرىن ورتاعا سالىپ، سامبو كۇرەسىنىڭ تەحنيكالارىن جوعارى دەڭگەيدە كورسەتتى. اسىرەسە، شەشۋشى كەزدەسۋلەر سپورتسۇيەر قاۋىمنىڭ نازارىن اۋداردى.
رەسپۋبليكالىق جارىستىڭ اشىلۋ سالتاناتىنا ەلدىڭ جوعارى لاۋازىمدى تۇلعالارى مەن قوعام قايراتكەرلەرى قاتىستى. قۇرمەتتى قوناقتار قاتارىندا ق ر قورعانىس ءمينيسترى، گەنەرال-پولكوۆنيك رۋسلان جاقسىلىقوۆ، قارۋلى كۇشتەردىڭ ارداگەرى، گەنەرال-پولكوۆنيك ءسات توقپاقبايەۆ، ق ر پارلامەنتى ءماجىلىسىنىڭ دەپۋتاتتارى ەرمۇرات باپي مەن ايدوس سارىم، سونداي-اق ەلىمىزدىڭ تانىمال سپورت ارداگەرلەرى بولدى.
مۇنداي ءىرى دەڭگەيدەگى جارىس – اسكەري قىزمەتكەرلەر ءۇشىن كاسىبي دايارلىقپەن قاتار، رۋحاني قۇندىلىقتاردى دارىپتەۋدىڭ دە تاپتىرماس قۇرالى. شارا بارىسىندا ءسوز العان سپيكەرلەر جاس ۇرپاققا ۇلگى بولاتىن وسىنداي باستامالار جالعاسىن تابۋى ءتيىس ەكەنىن اتاپ ءوتتى.
سامبو – تەك سپورت ەمەس، ول – ءتارتىپ پەن تاباندىلىقتى، وتانسۇيگىشتىكتى تالاپ ەتەتىن كۇرەس ءتۇرى. وسى تۋرنير ارقىلى ۇيىمداستىرۋشىلار جاس بۋىنعا پاتريوتتىق تاربيە بەرۋدى، كۇشتىك قۇرىلىم وكىلدەرى اراسىندا دوستىق پەن ارىپتەستىك بايلانىستى نىعايتۋدى كوزدەپ وتىر. بۇل – ەل بولاشاعى ءۇشىن ماڭىزدى قادام.
تۋرنير اياسىندا سپورتشىلاردىڭ مورالدىق-پسيحولوگيالىق دايارلىعىنا، كوماندالىق رۋحىنا ەرەكشە كوڭىل ءبولىندى. مۇنداي جارىستار كۇشتىك قۇرىلىم قىزمەتكەرلەرىنىڭ فيزيكالىق دايىندىعىن ارتتىرىپ قانا قويماي، ولاردىڭ ءوزارا ىنتىماقتاستىعىن تەرەڭدەتە تۇسەدى.