الماتى قالاسىندا 2025 جىلعى ناۋرىز ايىنىڭ 23-28 ارالىعىندا جاراتىلىستانۋ-ماتەماتيكا باعىتىنداعى پاندەر بويىنشا رەسپۋبليكالىق وليمپيادانىڭ گەوگرافيا جانە ماتەماتيكا پاندەرىنەن قورىتىندى كەزەڭى ءوتتى.
وڭتۇستىك استانامىزدا ۇيىمداستىرىلعان ءبىلىم سايىسىندا ەلىمىزدىڭ ەڭ ۇزدىك 325 وقۋشىسى ءوز بىلىمدەرىن دالەلدەدى.
وليمپيادا بارىسىندا قاتىسۋشىلار ەكى كەزەڭنەن تۇراتىن تاپسىرمالاردى ورىنداپ، ءوزارا سىنعا ءتۇستى:
1-تۋردا – تەوريالىق تاپسىرمالار شەشىلدى؛
2-تۋردا – گەوگرافيا پانىنەن دالالىق تۋر، ال ماتەماتيكادان كۇردەلى تەوريالىق ەسەپتەر قاراستىرىلدى.
وليمپيادا باعدارلاماسى اياسىندا قاتىسۋشىلارعا «كوك توبە» ساياباعى مەن ق ر مەملەكەتتىك مۋزەيىنە ەكسكۋرسيالار، پسيحولوگيالىق ترەنينگتەر، سپارتاكيادا ۇيىمداستىرىلدى. ال كوماندا جەتەكشىلەرى ءۇشىن وقۋ-ادىستەمەلىك سەمينارلار جانە الماتى قالاسىنىڭ جەتەكشى مەكتەپتەرىنە ەكسكۋرسيا وتكىزىلدى.
رەسپۋبليكالىق كەزەڭدە الماتى قالاسىنىڭ نامىسىن گەوگرافيا پانىنەن 7، ماتەماتيكا پانىنەن 14 وقۋشى قورعادى.
وليمپيادانىڭ قورىتىندىسى بويىنشا الماتى قالاسىنىڭ قۇراماسىنان 18 وقۋشى ق ر وقۋ-اعارتۋ مينيسترلىگىنىڭ ءى، ءىى، ءىىى دارەجەلى ديپلومدارىمەن، التىن، كۇمىس، قولا مەدالدالدارىمەن جانە باعالى سىيلىقتارمەن ماراپاتتالدى.
ايرىقشا جەتىستىكتەرى ءۇشىن ق ر وقۋ-اعارتۋ مينيسترلىگى «دارىن» رەسپۋبليكالىق عىلىمي-پراكتيكالىق ورتالىعىنىڭ گراموتالارىمەن 2 وقۋشى ماراپاتتادى.
جاراتىلىستانۋ-ماتەماتيكا باعىتى بويىنشا جالپىكوماندالىق ەسەپتە الماتى قۇراماسى ءبىرىنشى ورىندى يەلەنىپ، «ەڭ ۇزدىك وليمپيادالىق كوماندا – 2025» اتاعىن جەڭىپ الدى.
ايتا كەتەيىك، الماتى قالاسى 23 جىل قاتارىنان ۇزدىك وليمپيادالىق كوماندا اتاعىن ساقتاپ كەلەدى. بۇل جەتىستىك – وقۋشىلار مەن ۇستازداردىڭ قاجىرلى ەڭبەگىنىڭ ناتيجەسى.
ءبىلىم شىڭىن باعىندىرىپ، جەڭىس تۇعىرىنان كورىنگەن وقۋشىلارىمىزدى شىن جۇرەكتەن قۇتتىقتايمىز! حالىقارالىق ارەنادا دا جاڭا بەلەستەردى باعىندىرۋدى تىلەيمىز!