الماتىداعى ايگىلى مەدەۋ مۇز ايدىنىندا 660 قۇراق كورپەنى بىرىكتىرگەن الەمدىك رەكورد تىركەلدى، دەپ حابارلايدى aqshamnews.kz
تاڭمەن جارىسىپ ۇلتتىق كيىم كيگەن قولونەر شەبەرلەرىنىڭ باسى قوسىلىپ، مەدەۋگە جينالدى. بەلگى بەرىلگەن ساتتە ولار وزدەرىمەن الا كەلگەن قۇراق كورپەلەرىن مۇز ايدىن ۇستىنە جايۋعا كىرىستى. كۇننىڭ نۇرىمەن جارقىراعان ءتۇرلى-تۇستى كورپەلەر تەڭىزدەي قۇلپىرىپ، كوز جاۋىن الاتىن بوياۋلار مەن ورنەكتەردىڭ كەرەمەت ۇيلەسىمى بولدى. ءاربىر قۇراق، ءاربىر تىگىس – شەبەردىڭ جۇرەگىنەن شىققان ونەر تۋىندىسى، ونىڭ دۇنيەتانىمى مەن داستۇرگە دەگەن سۇيىسپەنشىلىگىن كورسەتتى. قولونەرگە قىزىعاتىن جۇرت كوز مايىن تاۋىسىپ تىككەن كورپەلەرگە قىزىعا قاراپ، ولاردىڭ ناقىشىنا، ورىنداۋ شەبەرلىگىنە تاڭداي قاقتى. بۇل كۇنى ۇلتتىق مۇراعا دەگەن ماقتانىش پەن تاريحي ءساتتىڭ كۋاسى بولۋدىڭ قۋانىشى جۇرتشىلىققا بۇيىردى.
مەرەكەلىك ءىس-شاراعا ونەرسۇيەر قاۋىم، جاستار، بلوگەرلەر مەن قالا قوناقتارى كوپتەپ قاتىستى. سونىمەن قاتار تىكەلەي ەفير ۇيىمداستىرىلىپ، ەلىمىزدىڭ تۇكپىر-تۇكپىرىنەن جانە شەت ەلدەردەن دە باقىلاۋعا مۇمكىندىك بولدى.
«الامان قۇراق 2025» جوباسى – الەمدە تەڭدەسى جوق ەرەكشە مادەني باستاما. بۇل جولى 6 جاستاعى بالادان باستاپ، توقسانعا تاياعان قاريالارعا دەيىنگى ءار بۋىن وكىلدەرى تىككەن 660 قۇراق كورپە مۇز ايدىنىنىڭ 1366،8 شارشى مەتر اۋماعىن تولىق جاۋىپ، حالقىمىزدىڭ بىرلىگى مەن جىلۋىن، ۇلتتىق رۋحىن بەينەلەيتىن اسەرلى كومپوزيسياعا اينالدى. وسىلايشا، بۇل تۋىندى «Global World Book of Records» كىتابىنا رەسمي تۇردە ەندى.
– مۇنداي كولەمدەگى ەتنو-رەكورد الماتىدا العاش رەت تىركەلىپ وتىر. قازاقستان اتىنان Global Book of Records ۇيىمىنا ءوتىنىم جولدانعان بولاتىن. بۇعان دەيىن مۇنداي جوبا ەلىمىزدە دە، الەمدىك تاجىريبەدە دە بولماعان سوڭ، بۇل باستاما قولداۋ تاپتى. شاراعا ەلىمىزدىڭ 20 وڭىرىنەن، ونىڭ ىشىندە 17 وبلىس پەن رەسپۋبليكالىق ماڭىزى بار الماتى، استانا، شىمكەنت قالالارىنان 660 شەبەر قاتىستى. قاتىسۋشىلار بارلىق تالاپتارعا ساي دايىن كورپەلەردى الىپ كەلدى (ولشەمى، سالماعى، كەستەسى، ورنەگى جانە ت.ب.). بۇل رەكورد الماتىعا ارنالاتىن بولعاندىقتان، كورپەلەردىڭ تۇستەرى دە قالاداي جارقىن بولدى. كورمەنى ساندەگەن الما ءپىشىندى جاستىقتار ەسەپكە الىنبادى، ءبىراق مەرەكەگە ءسان بەردى. رەكوردتىڭ ءادىل ءوتۋىن سەگىز تىركەۋشى باقىلادى. سونىمەن قاتار چەحيادان ارنايى تورەشى مەن ءۇندىستانداعى تىركەۋ ءبولىمىنىڭ حاتشىسى پروسەستى ونلاين رەجيمدە قاداعالادى. ناتيجەسىندە، الماتىدا الەمدىك رەكورد تىركەلىپ، الداعى ون كۇندە رەسمي تىزىمگە ەنەتىن بولادى، – دەدى GLOBAL BOOK OF RECORDS ۇيىمىنىڭ قازاقستانداعى وكىلى قۋاندىق قۇدايبەرگەنوۆ.
جوبانىڭ جەتەكشىسى نۇرگۇل ابايحان – ۇلتتىق ونەرگە جاناشىر، يدەيا اۆتورى ءارى ۇيىمداستىرۋشى. ول بۇل جوبانى قازاق قولونەرىن الەمدىك دەڭگەيدە تانىمال ەتۋ ماقساتىندا قولعا العانىن ايتا كەتتى.
– «الامان قۇراق» جوباسى – قازاق حالقىنىڭ قوناقجايلىعى مەن كەڭپەيىلدىگىن، بىرلىگىن تانىتاتىن سيمۆول. قۇراق كورپەنىڭ وزىندىك باي ويۋ-ورنەگى ارقىلى ءبىز حالقىمىزدىڭ تەرەڭ مادەنيەتىن جەتكىزگىمىز كەلەدى. بۇل جوبا ءۇشىنشى جىل قاتارىنان جۇزەگە اسىپ كەلەدى. العاشىندا 200 ادام قاتىستى، وتكەن جىلى كوشپەندىلەر ويىندارىندا 450 شەبەردىڭ قولىنان شىققان كورپەلەر ۇسىنىلسا، بيىل الماتىدا 660 قاتىسۋشى جينالدى. قازاق قولونەرىنىڭ حالىقارالىق دەڭگەيدە مويىندالۋى – ءبىزدىڭ ەڭبەگىمىزدىڭ لايىقتى باعالانۋى. بارلىق قاتىسۋشىلاردىڭ كورپەلەرى بىركەلكى بولۋ ءۇشىن ارنايى ماتالار مەن سىزبالار ەلىمىزدىڭ تۇكپىر-تۇكپىرىنە تاراتىلدى. تىگىن جۇمىستارىنا التى اي ۋاقىت جۇمسالدى. بۇگىنگى كۇن – بارشا قازاقستاندىقتار ءۇشىن ماقتانىش ءساتى، – دەدى جوبا جەتەكشىسى.
پاۆلوداردان كەلگەن ەتنو-شەبەر، «الىپ كيمەشەك» جوباسىنىڭ اۆتورى گۇلايىم اقىمبايەۆا بۇعان دەيىن ءتورت مەترلىك ۇلتتىق كيمەشەك تىگىپ، Global Book of Records تىزىمىنە ەنگەن بولاتىن. الماتىدا وتكەن رەكوردتىق شارانىڭ ءبىر بولىگى بولعانىنا ول دا ءدان ريزا.
– جاھاندانۋ داۋىرىندە تاريحي تامىرىمىزدى ۇمىتپاۋ اسا ماڭىزدى. قۇراق كورپە – قازاق مادەنيەتىنىڭ كورنەكتى بولشەگى. ول ۇلتتىق ماقتانىش پەن ءوزىن-وزى تانۋ سەزىمىن نىعايتادى. اسىرەسە جاستار ءۇشىن بۇل – تامىرى تەرەڭ داستۇرمەن بايلانىس ورناتۋدىڭ جولى. وسىنداي شارالار ارقىلى ءبىز ءوز مادەنيەتىمىزدىڭ بايلىعىن ۇرپاققا جەتكىزەمىز، – دەدى شەبەر.
فەستيۆال اياسىندا سالتاناتتى ماراپاتتاۋ ءراسىمى ءوتتى، كونسەرت ۇيىمداستىرىلدى، ۇلتتىق بۇيىمدار كورمەسى قۇرىلدى. شارادا قازاقتىڭ حالىق اندەرى مەن زاماناۋي ارانجيروۆكاداعى تۋىندىلار شىرقالدى. ۇلتتىق كيىم كيگەن بي ۇجىمدارى مادەنيەتىمىزدى كورسەتەتىن جارقىن قويىلىمدار ۇسىندى.
الامان قۇراق 2025 – جاي عانا رەكورد ەمەس، ۇلتتىق ونەرگە سەرپىن بەرگەن ماڭىزدى مادەني قۇبىلىس. بۇل جوبا ارقىلى قازاق حالقىنىڭ قولونەرى، شەبەرلىگى، بىرلىگى مەن رۋحاني مۇراسى بۇكىل الەمگە تانىستىرىلدى.