بۇگىن الماتىداعى اباي الاڭىندا ۇلتتىق دومبىرا كۇنىنە ارنالعان اشىق اسپان استىنداعى اۋقىمدى مەرەكەلىك كونسەرت ءوتتى. كۇي مەن جىر ورىلگەن رۋحاني كەشكە مىڭداعان قالا تۇرعىنى مەن قوناعى جينالدى.
كونسەرتكە قازاقستاننىڭ ەڭبەك ەرى، حالىق ءارتيسى ءاسانالى ءاشىموۆ، تۇركسوي جانىنداعى تۇركى مەملەكەتتەرى جازۋشىلار وداعىنىڭ ءتوراعاسى ۇلىقبەك ەسداۋلەت، قازاقستاننىڭ ەڭبەك سىڭىرگەن قايراتكەرى اسىلى وسمان جانە باسقا دا زيالى قاۋىم وكىلدەرى قاتىستى. سالتاناتتى كەشتە ءسوز العان الماتى اكىمى دارحان ساتىبالدى دومبىرانىڭ قازاق مادەنيەتى، رۋحانياتى جانە ۇرپاقتار ساباقتاستىعىنىڭ نىشانى ەكەنىن اتاپ ءوتتى.
«دومبىرا – قازاقتىڭ جانى، جۇرەگىنىڭ ءلۇپىلى. ونىڭ قوس ىشەگىندە عاسىرلار سىرى، بابالار رۋحى، ۇلتتىڭ بولمىسى جاتىر. دومبىرانىڭ ءار پەرنەسى – وتكەن مەن بۇگىندى جالعاستىراتىن التىن كوپىر، ءار كۇيى – ۇرپاقتان ۇرپاققا جەتكەن وشپەس مۇرا. بۇل مەيرام – ۇلتتىق رۋحىمىزدى جاڭعىرتىپ، مادەنيەتىمىزدىڭ تەرەڭ تامىرىن سەزىنۋگە شاقىراتىن ءسات. قاستەرلى دومبىرا ءار شاڭىراقتىڭ تورىندە، ءار جۇرەكتىڭ تۇبىندە ءاردايىم جاڭعىرىپ تۇرۋى، ماڭگى ساقتالۋى ءتيىس. ۇلتتىق دومبىرا كۇنى بارشامىزعا قۇتتى بولسىن!»، - دەدى الماتى قالاسىنىڭ اكىمى دارحان ساتىبالدى.
مەرەكەلىك كونسەرتتە روزا رىمبايەۆا، ايگۇل ۇلكەنبايەۆا، ايگۇل قوسانوۆا، رامازان ستامعازييەۆ، مەيرامبەك بەسبايەۆ، اسىلبەك ەڭسەپوۆ، ءمولدىر اۋەلبەكوۆا، «قوڭىر» مەن Ulytau توپتارى، «سازگەن سازى» فولكلورلىق-ەتنوگرافيالىق ءانسامبلى، «الاتاۋ» ءداستۇرلى ونەر تەاترىنىڭ ارتيستەرى مەن باسقا تانىمال ونەرپازدار ونەر كورسەتتى.
كەشتىڭ ەڭ كوركەم شارىقتاۋ شەگى نۇرعيسا تىلەندييەۆتىڭ ايگىلى «ءالقيسسا» كۇيىنىڭ ورىندالۋى بولدى. ودان كەيىن اتاقتى دومبىراشىلار مەن ولاردىڭ شاكىرتتەرى كۇي تارتىس ۇيىمداستىرىپ، ورىنداۋشىلىق شەبەرلىك پەن ءداستۇر ساباقتاستىعىن پاش ەتتى.
كونسەرت سوڭىندا قازاقستاننىڭ حالىق ءارتيسى روزا رىمبايەۆا «دومبىرا تۋرالى باللادا» مەن «اتامەكەن» اندەرىن تارتۋ ەتىپ، جينالعان قاۋىمنىڭ قۇلاق قۇرىشىن قاندىردى.