قارۋ قابىلدانعان كەزدە، قىلمىسقا قاتىسى بار-جوعىن تەكسەرۋ ءۇشىن كريميناليستەرگە جىبەرىلەدى.
الماتى پوليسياسى تۇرعىنداردان زاڭسىز قارۋ-جاراقتى ساتىپ الۋ ناۋقانىن باستادى، دەپ حابارلايدى Almaty-akshamy.kz
«25 ساۋىردەن باستاپ ەل اۋماعىندا زاڭسىز ساقتالعان اتىس قارۋى، وق-دارىلەر مەن جارىلعىش زاتتاردى حالىقتان ساتىپ الۋ جۇرگىزىلىپ جاتىر. بۇل شارا قوعامدىق قاۋىپسىزدىكتى قامتاماسىز ەتۋ، اتىس قارۋى مەن جارىلعىش زاتتاردى قولدانۋ ارقىلى جاسالاتىن قىلمىس پەن قۇقىق بۇزۋشىلىقتىڭ الدىن الۋ ماقساتىندا جاسالادى. اۋداندىق پوليسيا باسقارمالارىندا ازاماتتاردىڭ ءوز ەركىمەن تاپسىرعان اتىس قارۋى، وق-دارىلەر مەن جارىلعىش زاتتاردىڭ تەحنيكالىق جاعدايىن انىقتاۋ، تولەمدى بەلگىلەۋ نەمەسە اقشالاي سىياقى تولەۋدەن باس تارتۋ ءۇشىن كوميسسيالار قۇرىلدى»، - دەدى الماتى قالالىق پد اكىمشىلىك پوليسيا باسقارماسىنىڭ باستىعى، پوليسيا پولكوۆنيگى نۇرلان امانبەك.
پوليسيا دەپارتامەنتى ەسكەرتكەندەي، ىشكى ىستەر ورگاندارىندا تىركەلمەگەن كەز كەلگەن قارۋ زاڭسىز بولىپ سانالادى جانە تاپسىرىلۋى ءتيىس.
«كەز كەلگەن مىلتىق، اتىس قارۋى، تەگىس ۇڭعىلى، تراۆماتيكالىق قارۋ اۋماقتىق پوليسيا باسقارماسىنا تاپسىرىلۋى كەرەك. قارۋ قابىلدانعان كەزدە، قىلمىسقا قاتىسى بار-جوعىن تەكسەرۋ ءۇشىن كريميناليستەرگە جىبەرىلەدى»، - دەلىنگەن الماتى قالالىق پوليسيا دەپارتامەنتى تاراتقان حابارلامادا.