الماتىدا قالا كۇنى مەرەكەسى جانە حالىق قاھارمانى، مەملەكەتتىك سىيلىقتىڭ لاۋرەاتى، قازاقستاننىڭ ەڭبەك سىڭىرگەن قايراتكەرى، كومپوزيتور، ديريجەر ءارى كۇيشى نۇرعيسا تىلەندييەۆتىڭ تۋعانىنا 100 جىل تولۋىنا وراي مەموريالدىق مۋزەيدە قايتا جاڭعىرتىلعان ەكسپوزيسيا اشىلدى.
الماتى اكىمى دارحان ساتىبالدى، كومپوزيتوردىڭ قىزى ديريجەر، قازاقستاننىڭ ەڭبەك سىڭىرگەن قايراتكەرى ءدىنزۋحرا تىلەندييەۆا، سونداي-اق زيالى قاۋىم مەن مادەنيەت وكىلدەرى جاڭارتىلعان مۋزەيدى ارالاپ كوردى. قالا باسشىسى اتاپ وتكەندەي، مۋزەيدىڭ جاڭارۋى مەگاپوليستىڭ مادەني ومىرىندەگى ماڭىزدى وقيعا بولىپ وتىر.
1979-1998 جىلدارى كومپوزيتور وتباسىمەن تۇرعان بۇل ءۇي بۇگىندە مەموريالدىق مۋزەي رەتىندە جۇمىس ىستەيدى. مۇندا قازاق مۋزىكاسىنىڭ وزىق تۋىندىلارى دۇنيەگە كەلگەن، شىعارماشىلىق كەزدەسۋلەر مەن رەپەتيسيالار وتكەن سول كەزەڭنىڭ اتموسفەراسى ساقتالعان.
جاڭعىرتۋدان كەيىن كورمە زالدارىنىڭ اۋماعى 161 شارشى مەترگە دەيىن ۇلعايدى. مۋزەيگە زاماناۋي مۋلتيمەديالىق قۇرىلعىلارمەن جابدىقتالعان ەكى جاڭا زال قوسىلدى. سونداي-اق، بىرەگەي قولجازبالار، ارحيۆتىك سۋرەتتەر مەن كومپوزيتوردىڭ جەكە زاتتارىنان تۇراتىن سيرەك ەكسپوزيسيا ۇسىنىلدى.
ەكسپوزيسياداعى ەڭ قۇندى جادىگەردىڭ ءبىرى 1934 جىلى احمەت جۇبانوۆ سىيعا تارتقان اڭىزعا اينالعان «داريعا-دومبىرا». كومپوزيتوردىڭ جارى داريعا تىلەندييەۆانىڭ ەسىمىمەن اتالعان قاسيەتتى دومبىرا ونىڭ شىعارماشىلىق شابىت نىشانىنا اينالدى. سونداي-اق، مۋزەيدە كومپوزيتوردىڭ اناسى سىيلاعان فورتەپيانو دا ساقتالعان.
بۇعان دەيىن الماتى قالاسى مۋزەيلەر بىرلەستىگى پاريجدەگى يۋنەسكو شتاب-پاتەرىندە ۇلى قازاق كومپوزيتورىنىڭ مۇراسىنا ارنالعان مەرەيتويلىق كورمە وتكىزگەن بولاتىن. نۇرعيسا تىلەندييەۆتىڭ 100 جىلدىعى يۋنەسكو-نىڭ مەرەيتويلىق داتالار تىزىمىنە ەنگىزىلىپ، قازاق مۋزىكاسى دانىشپانىنىڭ الەمدىك مادەنيەتكە قوسقان ۇلەسى حالىقارالىق دەڭگەيدە مويىندالدى.