الماتىدا 30-31 تامىزدا جىل سايىنعى ەڭ اۋقىمدى اۆتوشوۋ - MotorFest Almaty 2025 ءوتتى. 10 مىڭنان استام كولىكسۇيەر، 200-دەن استام ەرەكشە اۆتوكولىك، حالىقارالىق دەڭگەيدەگى قاتىسۋشىلار جينالعان شارا نەسىمەن ەستە قالدى؟ جانارلاردى جاۋلاعان جىل وقيعاسىندا قانداي اۆتوموبيلدەر ۇزدىك اتاندى؟ اqshamnews.kz ءتىلشىسىنىڭ ماتەريالىندا.
سۋرەت: drive2.ru سايتىنان الىندى
شاعىن شارادان حالىقارالىق فەستيۆالگە دەيىن
Motorfest العاش رەت 2017 جىلى قبتۋ ماڭىنداعى شاعىن الاڭقايدا ءوتتى. ول كەزدە بار-جوعى قىرىق شاقتى كولىك قاتىسقان ەدى. الايدا اۆتوسۇيەر قاۋىمنىڭ ىقىلاسى زور بولعاندىقتان، 2018 جىلدان باستاپ فەستيۆال ءداستۇرلى تۇردە مەدەۋ مۇز ايدىنىندا ۇيىمداستىرىلىپ كەلەدى. سول جىلى العاش رەت كورشى ەلدەردەن - وزبەكستان مەن قىرعىزستاننان قاتىسۋشىلار كەلىپ، فەستيۆال حالىقارالىق مارتەبەگە يە بولدى. سايكەسىنشە فەستيۆال بيىل سەگىزىنشى رەت ءوتىپ وتىر.
سۋرەت: drive2.ru سايتىنان الىندى
جوبانىڭ نەگىزىن قالاۋشىلار - اۆتوبلوگەرلەر ازات (cars_kz) پەن دارحان (low_kz). ولاردىڭ باستاماسى بۇگىندە ورتا ازياداعى اۆتومادەنيەتتىڭ دامۋىنا ۇلكەن ۇلەس قوسىپ وتىر.
Motorfest بيىل مەدەۋدە سوڭعى رەت
2025 جىلعى فەستيۆال ەرەكشە ەستە قالدى. سەبەبى الداعى جىلدارى مەدەۋدە رەكونسترۋكسيا جۇمىستارى جۇرەتىندىكتەن، Motorfest ءبىراز ۋاقىتقا بۇل الاڭنان كەتۋگە ءماجبۇر. سوندىقتان بيىلعى شارا سوڭعى "مەدەۋ ماۋسىمى" رەتىندە ءوتتى.
سۋرەت: drive2.ru سايتىنان الىندى
MotorFest - كولىكتى جاقسى كورەتىندەردىڭ جۇماعى. مۇندا ءاربىر قاتىسۋشى ءوزىنىڭ ەرەكشە جوباسىن كورسەتىپ، قيالىن شىندىققا اينالدىرادى.
اسكەري ستيلدەگى "بومباردير ۆولگا گاز-21"
الماتىلىق ەنتۋزياست ماقسات مامرايموۆ (@maks_braat) ءوز جوباسىن ناعىز ونەر تۋىندىسىنا اينالدىردى. ول وسىدان 12 جىل بۇرىن سارقاندتان 130 مىڭ شاقىرىم جۇرگەن گاز-21 كولىگىن ساتىپ الىپ، باستاپقىدا رەستاۆراسيالاۋدى ويلاعان. ءبىراق قيالعا ەرىك بەرىپ، كولىكتى اسكەري "بومباردير" ستيلىندە قۇراستىرعان. ارتىندا ءتىپتى "بومبا ينستاللياسياسى" بار.
سۋرەت: نۇربول ىنتىماق ۇلى/aqshamnews.kz
كولىك نەگىزى Toyota Aristo پلاتفورماسىندا جاسالعان. 11 جىلدا جوباعا شامامەن 30 ميلليون تەڭگە كەتكەن. مامرايموۆتىڭ ايتۋىنشا، يدەياعا دەگەن سەنىم ونى سوڭىنا دەيىن جەتكىزگەن:
"مەن ونى العاش العانىمدا 130 مىڭ شاقىرىم جۇرگەن ەدى. جوبانى 11 جىل جاسادىم. بيۋدجەتتى ساناعان جوقپىن، شامامەن 30 ميلليون تەڭگەدەي كەتتى. ءبىراق قيالدىڭ سوڭىنا دەيىن بارعاندا، ناتيجە بارلىق ەڭبەكتى اقتادى. سەنسەڭىز بۇل كولىكتى ءالى ۇيدەگى گاراجعا دا قويىپ ۇلگەرمەدىم"،-دەيدى ول.
سۋرەت: نۇربول ىنتىماق ۇلى/aqshamnews.kz
ايتا كەتەيىك، گاز-21 - كسرو-داعى ەڭ ايگىلى بيزنەس-كلاسس كولىكتەرىنىڭ ءبىرى. ونى "ۆولگا" دەپ اتاۋ رەسەيدىڭ باستى وزەنىمەن بايلانىستى قويىلعان.
"اقش پرەزيدەنتىنىڭ كولىگى"
تارازدان كەلگەن ەركەن كۋربانوۆ (Instagram: @kurbanoverken) رەستاۆراسياعا ەرەكشە ءمان بەرەتىن ەرەكشە تالعامدى جان. ونىڭ 1960 جىلدارداعى Lincoln Continental جوباسى كورمەدە ناعىز نازار اۋدارارلىق دۇنيە بولدى.
سۋرەت: نۇربول ىنتىماق ۇلى/aqshamnews.kz
كولىك العاش اقش-تا، كەيىن ماسكەۋدە بولعان. سودان سوڭ قازاقستانعا جەتكىزىلگەن.
"كولىككە قىزىعۋشىلىق كىشكەنتاي كەزىمنەن بار. بۇل حوببي اكەمنەن دارىعان دەسەم دە بولادى. بۇل كولىكتى اقش-تان ماسكەۋگە، ودان كەيىن قازاقستانعا الىپ كەلگەن. ءۇش رەت رەستاۆراسيا جاسالدى. مەتالعا جەتكەندە ءشىرىپ كەتكەنىن كوردىك، ءبىراق ءبارىن سوڭىنا دەيىن جوندەپ شىقتىق. بيۋدجەتتى ەسەپتەگەن جوقپىن. بۇل – مەنىڭ ءومىرىم، مەنىڭ كوڭىلىمنەن شىققان دۇنيە"، - دەيدى ەركەن مىرزا.
سۋرەت: نۇربول ىنتىماق ۇلى/aqshamnews.kz
Lincoln Continental - اقش پرەزيدەنتى دجون كەننەديدىڭ قىزمەتتىك كولىگى بولعان. ءدال وسى مودەلدىڭ كابريولەت نۇسقاسىندا 1963 جىلى داللاس قالاسىندا قاستاندىق جاسالىپ، كەننەدي قازا تاپتى. بۇگىندە بۇل كولىكتىڭ قۇنى كوللەكسيالىق نارىقتا 30 مىڭنان 100 مىڭ دوللارعا دەيىن بارادى.
سۋرەت: نۇربول ىنتىماق ۇلى/aqshamnews.kz
Rolls-Royce-قا ءمىنىپ كورۋ باقىتى كىمدەرگە بۇيىردى؟
الەۋمەتتىك جەلىدە @g_e_class اتىمەن تانىمال الماتىلىق زاير رزايەۆ ءوزىنىڭ ەرەكشە Rolls-Royce Cullinan 2022 كولىگىن فەستيۆالگە اكەلدى.
سۋرەت: نۇربول ىنتىماق ۇلى/aqshamnews.kz
كولىكتىڭ استىن جابىق كوك، ءۇستىن اق تۇسكە بوياپ، سالونعا قىزعىلت سارى تۇستە ەرەكشە ستيل بەرگەن. "ەكستاز رۋحى" ءمۇسىنى دە ءدال سول تۇستە. ونى زاير ەركەلەتىپ "كارامەل" دەپ اتايدى ەكەن. ول ءتىپتى كولىك جارىق شامىنا دا جۇلدىزدى اسپان جاساتقان.
سۋرەت: نۇربول ىنتىماق ۇلى/aqshamnews.kz
ودان بولەك كاربون ارلەۋلەر، قازاقستان كارتاسى بەينەلەنگەن پانەل، ءتىپتى سكرۋدج ماكداك بەينەسى بەينەلەنگەن ءبىر قولىندا دوللار، ءبىر قولىندا تەڭگە ۇستاعان ساعات تا نازار اۋدارتادى. زايردىڭ ەرەكشەلىگى ول - كەلۋشىلەرگە كولىككە وتىرىپ كورۋگە رۇقسات بەردى.
"بۇل كولىك حالىق ءۇشىن جاسالعان. ءاربىر ادام وتىرسىن، سەزىنسىن دەدىم. ەرتەڭ بىرەۋ ەسىنە الىپ: “مەن Motorfest-تە Rolls-قا وتىرىپ كوردىم” دەسە، سونىڭ ءوزى جەتكىلىكتى"، – دەيدى ول.
سۋرەت: نۇربول ىنتىماق ۇلى/aqshamnews.kz
Rolls-Royce Cullinan - كومپانيا تاريحىنداعى العاشقى كروسسوۆەر. ونىڭ اتاۋى الەمدەگى ەڭ ءىرى گاۋھار تاستىڭ قۇرمەتىنە قويىلعان.
BMW Z8 - جۇمباق كولىك
فەستيۆالدە ەرەكشە نازارعا ىلىككەن كولىكتىڭ ءبىرى - BMW Z8. بۇل مودەل تەك 5700 دانامەن شەكتەلىپ شىعارىلعان اسا سيرەك كولىك. وكىنىشكە قاراي، كولىك يەسىمەن تىلدەسۋ مۇمكىن بولمادى.
سۋرەت: نۇربول ىنتىماق ۇلى/aqshamnews.kz
BMW Z8 - 1999 جىلى "The World Is Not Enough" فيلمىنە تۇسكەن. وندا دجەيمس بوند وسىنداي ماركالى كولىكتى جۇرگىزگەن. بۇگىندە بۇل اۆتو كوللەكسيونەرلەر اراسىندا كۋلت مارتەبەسىنە يە. الماتىداعى ۇلگىسى ەسكى قازاقستاندىق نومىرمەن كەلگەن، ءبىراق ونىڭ ناقتى تاريحى كوپكە بەيمالىم.
قىرعىزستاننان كەلگەن اڭىز
قىرعىزستاننان كەلگەن BMW E9 تە كورمەنىڭ ءسانىن كەلتىرە ءتۇستى. بۇل مودەل 1968–1975 جىلدارى شىعارىلىپ، BMW-نىڭ سپورتتاعى قايتا ورلەۋىنە سەبەپكەر بولعان.
سۋرەت: نۇربول ىنتىماق ۇلى/aqshamnews.kz
BMW E9 - ايگىلى 3.0 CSL نۇسقاسى ارقىلى اۆتوسپورتتا ۇلكەن جەتىستىكتەرگە جەتتى. ەگەر بۇل مودەل شىقپاعاندا، سول كەزەڭدە قارجىلىق قيىندىقتا بولعان BMW-دى Mercedes ساتىپ الۋى مۇمكىن ەدى دەگەن پىكىرلەر دە بار.
توپ-3 اتانعان ۇزدىك جوبالار قانداي؟
جىل سايىنعى ءداستۇر بويىنشا قازىلار القاسى ەڭ ەرەكشە سەگىز كولىكتى تاڭدادى. ولاردىڭ اراسىندا ۇزدىككە ۇشتىككە ىلىنگەندەرى:
1. كۋربانوۆ ەركەن (تاراز)— Lincoln Continental
2. رزايەۆ زاير (الماتى) — Rolls-Royce Cullinan
3. گەنناديي چەرنياۆسكيي (تاراز) — Volkswagen T2A