كەشە دەپۋتات ەرمۇرات ءباپي ايماقتاردى ارالاعان كەزدە "قاتتى قيىندىق كورىپ جۇرگەن حالىقتى بايقاماعانىن" ايتقان ەدى. وسىعان وراي Aqshamnews.kz ءتىلشىسى ءماجىلىس دەپۋتاتتارىنان بۇل پىكىرگە قاتىستى كوزقاراسىن سۇرادى.
رينات زايىتتىڭ ايتۋىنشا، ول ارالاعان وڭىردە قىمباتشىلىق قاتتى بايقالعان.
"ارينە، مۇمكىن ول باسقا جاقتارعا بارعان شىعار. ءوزىم ارالاعان وڭىردە كوپ. ءبارى نەسيەگە باتقان. ۋايىمى كوپ. ەڭبەك ىستەپ، مال باعايىن دەسە، اۋىلدا جەر جوق. ازىرگە بىلىنبەۋى مۇمكىن. مىنە، قىستا كومىردىڭ اڭگىمەسى باستالادى. جىلۋدىڭ اڭگىمەسى بار، سەبەبى تاريف ءوستى. مەن ەرمۇرات ءباپي سياقتى قازاق دەموكراتياسىنا قىزمەت ەتكەن ساقا دەپۋتاتتىڭ ويىمەن تالاسقىم كەلمەيدى. ونىڭ پىكىرىن دۇرىس-بۇرىس دەپ ايتا المايمىن"، - دەدى ول.
سونداي-اق، دەپۋتات زايىت قىمباتشىلىقتى وتباسىنىڭ تۇرمىس-تىرشىلىگى ارقىلى بايقاپ جۇرگەنىن ايتتى.
"مەن دۇكەنگە بارمايمىن. ايەلىم بارادى. ءبىراق ونىڭ ايتۋىنشا، قاتتى قىمباتشىلىق بولىپ جاتقان سياقتى"، - دەدى رينات زايىت.
قوستاناي وڭىرىنەن سايلانعان دەپۋتات ەركىن ءابىل دە باعانىڭ ءوسۋى ايماقتاردا سەزىلەتىنىن اتاپ ءوتتى.
"ارينە، وزىمىزدە بازارعا بارىپ ەت الامىز، سەزىپ جاتىرمىز. استاناداعىداي ەمەس ءبىراق قوستاناي دا سەزىلەدى. باسقا ەكونوميكالىق وڭىرلەرمەن سالىستىرعاندا جالاقى تومەن. بيىل، وكىنىشكە قاراي، ينفلياسيا - 11 پايىز. ۇكىمەت 5-8 پايىز قالادى دەپ وتىر. بۇل دا جوعارى پايىز دەپ ەسەپتەيمىن. ۇلتتىق قوردان اقشا الا بەرسەك، ينفلياسيا ەشقاشان توقتامايدى. سوندىقتان قىمباتشىلىقتى توقتاتۋ ءۇشىن بيۋدجەت ماسەلەسىن شەشۋىمىز كەرەك. قوستانايدا كوكونىستىڭ باعاسى ءوسىپ جاتىر. ول كۇزدە ارزانداۋى كەرەك ەدى، ءبىراق جاعداي وسىنداي"، - دەدى دەپۋتات.
دەپۋتات ابزال قۇسپان بولسا، استانانىڭ كەيبىر اۋداندارىندا حالىقتىڭ تۇرمىس قيىندىعى انىق كورىنەتىنىن ايتتى.
"مەنىڭ تاقىرىبىم باسقا بولعانىمەن، ەل اراسىندا جۇرگەن سوڭ قىمباتشىلىقتان قينالىپ جۇرگەن حالىقتىڭ بارىن بىلەمىن. دالەلدەۋدى قاجەت ەتپەيدى. استاناداعى "ارتەم" بازارىنىڭ ارتىنا بارساڭىز، جاعدايدى كورەسىز. وڭ جاعالاۋداعى قيىنشىلىقتى سەزىنەسىز، استانادا جۇرگەنىڭىزدى ۇمىتىپ قالۋىڭىز مۇمكىن"، - دەدى ول.
ەسكە سالايىق، بۇعان دەيىن ەرمۇرات ءباپي ايماقتاردى ارالاعان كەزدە "قاتتى قيىندىق كورىپ جۇرگەن حالىقتى بايقاماعانىن" ايتقان ەدى. كەيىن دەپۋتات بۇل ءسوزىن ءتۇسىندىرىپ، ءوز ايماعىندا حالىقتىڭ جاعدايىن سالىستىرمالى تۇردە جەتكىزگەنىن اتاپ ءوتتى.