شاعىن جانە ورتا بيزنەس (شوب) مەگاپوليستىڭ ەكونوميكالىق جۇيەسىندەگى نەگىزگى بۋىن، ول قالانىڭ تۇراقتى دامۋى مەن باسەكەگە قابىلەتتىلىگىن قامتاماسىز ەتەدى. بۇل تۋرالى وكق الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مالىمدەدى.
2026 جىلى جەرگىلىكتى بيۋدجەتتەن شوب-تى قولداۋعا 66 ملرد تەڭگە قاراستىرىلعان، بۇل بيىلعى كورسەتكىشتەن 30%-عا ارتىق. اكىمنىڭ باستاماسىمەن جانە ءماسليحات دەپۋتاتتارىنىڭ قولداۋىمەن ارناۋلى سالىق رەجيمى بويىنشا مولشەرلەمە 4%-دان 3%-عا دەيىن تومەندەتىلدى. وندىرىستىك الەۋەتتى ارتتىرۋ ماقساتىندا 2027 جىلدىڭ سوڭىنا دەيىن جالپى اۋدانى 226 مىڭ شارشى مەتردەن اساتىن 39 شاعىن ونەركاسىپ پاركىن ىسكە قوسۋ جوسپارلانىپ وتىر. سونىڭ ناتيجەسىندە 4،8 مىڭ جاڭا جۇمىس ورنى اشىلادى. نەگىزگى ماقسات – 2030 جىلعا قاراي شوب-تىڭ قالا ەكونوميكاسىنداعى ۇلەسىن قازىرگى 60%-دان 65%-عا دەيىن ارتتىرۋ.
"مەملەكەت باسشىسى وڭدەۋ ونەركاسىبىن دامىتۋعا باسىمدىق بەرە وتىرىپ، جاڭا ينۆەستيسيالىق كەزەڭدى ىسكە قوسۋدى تاپسىردى. بۇگىندە ينۆەستورلاردىڭ يندۋستريالىق ايماق پەن "يننوۆاسيالىق تەحنولوگيالار پاركى" ارنايى ەكونوميكالىق ايماعىندا ("يتپ" اەا) ورنالاسۋعا دەگەن سۇرانىس قازىرگى ۇسىنىستان اسىپ وتىر. وسىعان بايلانىستى يندۋستريالىق ايماقتىڭ اۋماعىن 634 گەكتارعا كەڭەيتۋ، "يتپ" اەا اۋماعىن ۇلعايتۋ جانە جەڭىلدىكتەر مەرزىمىن 2050 جىلعا دەيىن ۇزارتۋ جوسپارلانعان. 2026-2028 جىلدار ارالىعىندا جالپى قۇنى 2،3 ترلن تەڭگە بولاتىن 165 ينۆەستيسيالىق جوبانى جۇزەگە اسىرۋ كوزدەلگەن. بۇل قالا ەكونوميكاسىنىڭ الەۋمەتتىك-ەكونوميكالىق دامۋىنا قۋاتتى سەرپىن بەرەدى. 2030 جىلعا قاراي وڭدەۋ ونەركاسىبى ونىمدەرىنىڭ ەكسپورتى 40%-عا ءوسىپ، 7 ملرد اقش دوللارىنا جەتەدى"، – دەدى الماتى اكىمى.