بۇل تۋرالى ورتالىق كوممۋنيكاسيالار قىزمەتىنىڭ الاڭىندا وتكەن بريفينگ بارىسىندا الماتى قالاسىنىڭ اكىمى دارحان ساتىبالدى مالىمدەدى. ونىڭ ايتۋىنشا، پوليورتالىقتى دامۋمەن بىرگە الماتى جاسىل ءارى ورنىقتى مەگاپوليسكە اينالادى.
بۇل جۇمىسقا لوندون، ماسكەۋ، شانحايدىڭ جانە ەلىمىزدىڭ ۇزدىك ساراپشىلارى مەن ۋربانيستەرى تارتىلىپ وتىر. كورىكتەندىرۋ ستاندارتتارىن ءتيىمدى ىسكە اسىرۋ ماقساتىندا قالالىق ۋربانيستيكا ورتالىعى قۇرىلدى.
"2026-2027 جىلدارى 38 قوعامدىق كەڭىستىكتى قۇرۋ جانە جاڭعىرتۋ جوسپارلانعان. ولاردىڭ قاتارىندا تۇڭعىش پرەزيدەنت ساياباعى، اۋەجاي كولى جاعالاۋى، ەسەنتاي، ۇلكەن الماتى وزەندەرى جانە باسقا دا ماڭىزدى دەمالىس ايماقتارى بار. "قاسبەتتەن قاسبەتكە دەيىن" قاعيداتى بويىنشا 68 كوشە جاڭعىرتىلادى. ونىڭ اياسىندا عيماراتتار جاڭارىپ، زاماناۋي شامدار ورناتىلادى، تروتۋارلار توسەلىپ، اۋماقتار كورىكتەندىرىلەدى"، – دەدى دارحان ساتىبالدى.
اكىمنىڭ ايتۋىنشا، قالا تازالىعىن قامتاماسىز ەتۋ ءۇشىن "الماتى تازالىق" كوممۋنالدىق كاسىپورنىنىڭ جۇمىسى كۇشەيتىلدى. اتاپ ايتقاندا، قىزمەتكەرلەر سانى 600 ادامنان 2 000 ادامعا دەيىن ۇلعايدى، ەڭبەكاقى مولشەرى 170 مىڭ تەڭگەدەن 370 مىڭ تەڭگەگە دەيىن ارتتى، سونداي-اق 330 بىرلىك جاڭا ارنايى تەحنيكا ساتىپ الىندى.
سونداي-اق، "جاسىل الماتى" ءبىرىڭعاي وپەراتورى قۇرىلدى. ونىڭ قاراماعىنا 400 گەكتاردان استام جاسىل اۋماق كەزەڭ-كەزەڭىمەن بەرىلىپ جاتىر. بۇعان قوسا، "تازا قازاقستان" رەسپۋبليكالىق اكسياسى اياسىندا جىل باسىنان بەرىپ الماتىدا 9،4 مىڭ گەكتاردان استام اۋماق تازارتىلىپ، 58 مىڭ كۋب مەتردەن استام قوقىس شىعارىلدى. بۇل جۇمىس 2026 جىلى دا جالعاسادى.