الماتىدا «ناۋقاس» بالانىڭ ەمىنە اقشا جيناعان ەكى قىز ۇستالدى

كۇدىكتىلەردىڭ ءبىرى سپورتشى، تاەكۆاندومەن اينالىسقان

الماتىدا 22 جانە 23 جاستاعى قىزدار الەۋمەتتىك جەلى ارقىلى الاياقتىق جاسادى دەگەن كۇدىكپەن ۇستالدى، دەپ حابارلايدى Almaty-akshamy.kz قالالىق پد-نە سىلتەمە جاساپ.

بارلىعى بەلگىلى بلوگەردىڭ الاياقتىق تۋرالى اۋەزوۆ اۋداندىق پوليسياسىنا ارىزدانۋىنان باستالدى. ونىڭ ايتۋىنشا، ەكى بويجەتكەن ناۋقاس بالاعا كومەك سۇراي وتىرىپ، قولدان جاسالعان قۇجاتتاردى پايدالانىپ، پاراقشاسىنا پوست جاريالاۋعا كوندىرگەن. بلوگەردىڭ ۇلكەن اۋديتورياسى جاناشىرلىق تانىتىپ، كومەككە شاقىرۋدى نازاردان تىس قالدىرماي، بەلسەندى تۇردە قاراجات اۋدارا باستادى. 

«قابىلدانعان شارالاردىڭ قورىتىندىسى بويىنشا وسى قىلمىسقا كۇدىكتىلەر انىقتالدى جانە ۇستالدى. ولار اقمولا وبلىسىنىڭ تۇرعىندارى. العاشقى جاۋاپ الۋدا قىزدار ءوز ىس-ارەكەتتەرىن مويىندادى. اتالعان دەرەك بويىنشا تەرگەۋ امالدارى جۇرگىزىلۋدە»، – دەدى اۋەزوۆ اۋداندىق پب-نا قاراستى پوليسيا ءبولىمى باستىعىنىڭ ورىنباسارى تيمۋر مۋلينوۆ. 

كۇدىكتىلەردىڭ ءبىرى سپورتشى، تاەكۆاندومەن اينالىسقان. بۇرىن ونىڭ زاڭمەن ماسەلەلەرى بولعان جانە ۇرلىق ءۇشىن جاۋاپقا تارتىلعان. ونىڭ قۇربىسى س.ەسىمدى ازاماتشا – مانيكيۋر جاساۋ شەبەرى. ءقازىر تەرگەۋشىلەر بۇل دەرەكتەن باسقا دا ەپيزودتار بار-جوعىن انىقتاپ جاتىر.