الماتىدا ناۋرىز مەيرامىن اتاپ ءوتۋ اياسىندا اۋقىمدى چەللەندج ءوتتى. 20 ناۋرىز كۇنى ساعات 11:00-دە قالانىڭ سەگىز اۋدانىندا مىڭداعان وقۋشى رەسپۋبليكالىق اكسياعا قاتىسىپ، دومبىرادا كۇيلەر ورىندادى، دەپ حابارلايدى aqshamnews.kz
ۇلتتىق كيىم كيگەن جاس مۋزىكانتتار «اداي»، «بالبىراۋىن» جانە «ەركە سىلقىم» كۇيلەرىن ورىنداپ، قالانىڭ كوشەلەرىن قازاقتىڭ كۇيىمەن تەربەتتى. چەللەندجدىڭ باستى ماقساتى – وسكەلەڭ ۇرپاقتىڭ رۋحاني-ادامگەرشىلىك قۇندىلىقتارىن قالىپتاستىرۋ، ۇلتتىق مۋزىكالىق مۇرانى ساقتاۋ جانە ناسيحاتتاۋ.
مۋزىكالىق فلەشموب ەلىمىزدىڭ ءار قالاسىن ۇلتتىق اسپاپتىڭ كۇمبىرىمەن بىرىكتىرىپ، جاس دومبىراشىلاردىڭ ءداستۇرلى مۋزىكاعا دەگەن سۇيىسپەنشىلىگىن كورسەتتى.
الماتى قالاسى ءبىلىم باسقارماسى