المالى اۋدانىندا 27-29 قاڭتار ارالىعىندا قوعامدىق ءتارتىپتى ساقتاۋ جانە كوشى-قون زاڭناماسىنىڭ تالاپتارىن قامتاماسىز ەتۋگە باعىتتالعان جەرگىلىكتى جەدەل-پروفيلاكتيكالىق ءىس-شارا وتكىزىلدى، – دەپ حابارلايدى Aqshamnews.kz Polisia.kz-كە سىلتەمە جاساپ.
مۇنداي اۋداندىق تەكسەرۋلەر جۇيەلى تۇردە جۇرگىزىلىپ، كەزەڭ-كەزەڭىمەن قالانىڭ بارلىق اۋدانىن قامتيدى. بۇعان دەيىن وسىنداي ءىس-شارالار مەگاپوليستىڭ وزگە دە اۋداندارىندا، ونىڭ ىشىندە مەدەۋ اۋدانىندا ۇيىمداستىرىلدى. المالى اۋدانىندا وتكەن ءۇش كۇندىك ءىس-شارا بارىسىندا پوليسيا قىزمەتكەرلەرى كوشى-قون زاڭناماسىنىڭ 141 بۇزۋشىلىق دەرەگىن انىقتادى. ونىڭ ىشىندە 21 شەتەل ازاماتى قازاقستان رەسپۋبليكاسىنىڭ اۋماعىنان شىعارىلىپ، تاعى 25 ادام جەكە باسىن انىقتاۋ جانە ءارى قارايعى قاراۋ ءۇشىن قابىلداۋ-تاراتۋ ورنىنا ورنالاستىرىلدى. تەكسەرۋ ناتيجەسىندە شەتەل ازاماتتارىنىڭ ەلدە بولۋ ءتارتىبىن بۇزۋى، زاڭسىز ەڭبەك قىزمەتىمەن اينالىسۋى، سونداي-اق شەتەلدىكتەردىڭ ەلدە زاڭدى بولۋىن قامتاماسىز ەتپەگەن قابىلداۋشى تاراپتىڭ جاۋاپكەرشىلىگىنە قاتىستى دەرەكتەر انىقتالدى. بۇدان بولەك، تىركەۋسىز جانە قۇجاتسىز تۇرۋ جاعدايلارى تىركەلدى. اتاپ ايتقاندا، ءتيىستى رۇقسات قۇجاتتارىنسىز ەڭبەك قىزمەتىن جۇزەگە اسىرعان شەتەل ازاماتتارىنىڭ توبى انىقتالدى. جەكە باسى انىقتالعاننان كەيىن ولار جاۋاپكەرشىلىككە تارتىلىپ، ەل اۋماعىنان شىعارىلدى. قازىرگى ۋاقىتتا اتالعان تۇلعالاردى جۇمىسقا تارتقان جۇمىس بەرۋشىنى جاۋاپكەرشىلىككە تارتۋ ماسەلەسى قارالۋدا. سونىمەن قاتار ءىس-شارا اياسىندا اليمەنتتىك مىندەتتەمەلەردى ورىنداۋدان جالتارىپ جۇرگەن ازاماتتار دا انىقتالدى.
– اۋداندىق جەدەل-پروفيلاكتيكالىق تەكسەرۋلەر — جوسپارلى ءارى كەزەڭ-كەزەڭىمەن جۇرگىزىلەتىن جۇيەلى جۇمىس. ءبىز قالانىڭ اۋداندارىن بىرتىندەپ قامتىپ، كوشى-قون زاڭناماسىنىڭ بۇزىلۋىن انىقتايمىز جانە شەتەل ازاماتتارى مەن قابىلداۋشى تاراپتىڭ ارەكەتتەرىنە قۇقىقتىق باعا بەرەمىز. نەگىزگى ماقسات — ءتارتىپ ورناتۋ جانە الدىن الۋ، بۇل ءبىرجولعى شارالار ەمەس، — دەپ اتاپ ءوتتى الماتى قالاسى پوليسيا دەپارتامەنتى كوشى-قون قىزمەتى باسقارماسىنىڭ باستىعى ەركىن امانتايەۆ.