الماتى مۋزەيىندە مۇحتار اۋەزوۆ اتىنداعى قازاق ۇلتتىق دراما تەاترىنىڭ 100 جىلدىعىنا وراي «عاسىر جاساعان ۇلت تەاترى» اتتى كورمە سالتاناتتى تۇردە اشىلدى، - دەپ حابارلايدى Aqshamnews.kz.
كورمەدە الماتى مۋزەيى مەن م. اۋەزوۆ اتىنداعى قازاق ۇلتتىق دراما تەاترى مۋزەيىنىڭ قورىنان الىنعان تەاتر تاريحىنا قاتىستى بىرەگەي ارحيۆتىك قۇجاتتار مەن فوتوسۋرەتتەر، 1940 جىلداردان بۇگىنگى كۇنگە دەيىنگى سپەكتاكل افيشالارى ۇسىنىلدى.
اسىرەسە، قازاق تەاتر ونەرىنىڭ كورنەكتى مايتالماندارى كيگەن ساحنالىق كوستيۋمدەر ەرەكشە نازاردا. اتاپ ايتقاندا، ا.مولدابەكوۆتىڭ «ۆانيا اعا» سپەكتاكلىندەگى، ش.جانداربەكوۆانىڭ «اقان سەرى – اقتوقتى» قويىلىمىنداعى، ز.ءشارىپوۆانىڭ «وتەللو» سپەكتاكلىندە دەزدەمونا رولىندە كيگەن، سونداي-اق ت.جامانقۇلوۆتىڭ ابىلاي حان بەينەسىندەگى ساحنالىق كيىمدەرى جانە باسقا دا قۇندى ەكسپوناتتار كورمەگە قويىلدى.
كورمەنىڭ نەگىزگى ماقساتى – عاسىرلىق تاريحى بار ۇلتتىق تەاتردىڭ شىعارماشىلىق جولىن كەڭىنەن ناسيحاتتاۋ، كورەرمەندى قازاق تەاتر ونەرىنىڭ دامۋ كەزەڭدەرىمەن تانىستىرۋ جانە جاس ۇرپاقتىڭ رۋحاني-مادەني قۇندىلىقتارعا دەگەن قىزىعۋشىلىعىن ارتتىرۋ.
كورمەنىڭ اشىلۋ راسىمىنە الماتى قالاسى مادەنيەت باسقارماسىنىڭ وكىلدەرى، شىعارماشىلىق ينتەلليگەنسيا، ونەر قايراتكەرلەرى، بۇقارالىق اقپارات قۇرالدارىنىڭ وكىلدەرى، سونداي-اق قالا تۇرعىندارى مەن قوناقتارى قاتىستى.
كورمە اقپان ايىنىڭ سوڭىنا دەيىن جالعاسادى.