قازاقستاننىڭ ازىق-تۇلىك ونەركاسىبى بۇگىندە تەك ۇن مەن ماكارون ونىمدەرىمەن شەكتەلمەيدى. ءقازىر بۇل – تۇيە سۇتىنەن بالمۇزداق ازىرلەنەتىن، وندىرىستىك قالدىقتاردى قايتا وڭدەۋ جولدارى ىزدەلەتىن جانە جاڭا ءونىم تۇرلەرى جاسالاتىن جوعارى تەحنولوگيالى سالا. وسى يننوۆاسيالاردىڭ ارتىندا كىمدەر تۇر؟ نەگىزگى تۇلعا – تاعام ءوندىرىسىنىڭ تەحنولوگى. الماتىدا مۇنداي مامانداردى قالاي دايارلايتىنى، ولاردىڭ ەڭبەك نارىعىنداعى سۇرانىسى مەن كاسىبي امبيسيالارى تۋرالى ميتۋ كوللەدجىنىڭ ديرەكتورى مايرا شالابايەۆامەن سۇحباتتا اڭگىمەلەيمىز.
مايرا حۋساينوۆنا، اڭگىمەنى باستى سۇراقتان باستايىق. بۇگىنگى تاڭدا قازاقستاندا تاعام ونىمدەرى تەحنولوگى ماماندىعى قانشالىقتى سۇرانىسقا يە؟
اشىعىن ايتساق، بۇل – ەڭ «اش قالدىرمايتىن» ءارى بولاشاعى زور ماماندىقتاردىڭ ءبىرى. ادامدار ءارقاشان تاماقتانۋىن توقتاتپايتىندىقتانتەحنولوگتارعا دەگەن قاجەتتىلىك ارتا بەرەدى. ءبىراق قازىرگى تالاپ باسقا: كونۆەيەردە تەك باقىلاۋشى ەمەس، جاڭاشىل ويلايتىن مامان كەرەك. وتاندىق نارىق يمپورتقا تولى، ال جەرگىلىكتى ءونىم باسەكەگە قابىلەتتى بولۋى ءۇشىن ساپالى، ءقاۋىپسىز ءارى بىرەگەي بولۋى شارت. مىنە، وسى تۇستا جاڭا يدەيالار مەن ءبىلىم قاجەت. رەسەپتۋرانى ساقتاپ قانا قويماي، ونى جەتىلدىرىپ، جاڭا ونىمدەر جاساي الاتىن تەحنولوگتار – كەز كەلگەن زاماناۋي كاسىپورىننىڭ التىن قورى. ولارعا سۇرانىس وتە جوعارى: كونديتەر فابريكالارىنان باستاپ، ءىرى ءسۇت جانە ەت وڭدەۋ كومبيناتتارىنا دەيىن.
ياعني يدەيا زەرتحانادان ناقتى وندىرىسكە دەيىنگى جولدان وتەدى عوي. ستۋدەنتتەردى وسىعان قالاي ۇيرەتەسىزدەر؟
بۇل – تۇتاس ءبىر تىزبەك، ءبىز ستۋدەنتتەردى سوعان تولىقتاي ەنگىزۋگە تىرىسامىز. الدىمەن تەوريالىق نەگىزدەمە مەن زەرتحانالىق تاجىريبە: رەسەپتۋرا مەن تەحنولوگيالىق رەجيمدەردى تاڭداۋ. ودان كەيىن كوللەدجدەگى زەرتحانادا وندىرىستىك جاعدايعا بارىنشا جاقىن ورتادا سىنامالىق ءونىم شىعارىلادى. وسى كەزەڭدە ءونىمنىڭ ءدامى، ءتۇسى، قۇرىلىمى، ساقتاۋ مەرزىمى زەرتتەلەدى.
كەلەسى اسا ماڭىزدى كەزەڭ رەتىندە ءونىمدى نەمەسە جوبانى ىسكە اسىرۋعا قاجەتتى بارلىق تەحنيكالىق قۇجاتتامانى ازىرلەۋ قاراستىرىلادى. بۇل قۇجاتتامالارعا تەحنولوگيالىق نۇسقاۋلىقتار، رەسەپتۋرالار، وندىرىستىك پروسەستەردىڭ سيپاتتاماسى، قاۋىپسىزدىك تالاپتارى مەن ساپانى باقىلاۋ تەتىكتەرى كىرەدى. اتالعان قۇجاتتار جوبانىڭ جۇيەلى، ءتيىمدى جانە ستاندارتتارعا سايكەس جۇزەگە اسىرىلۋىن قامتاماسىز ەتەدى. سەبەبى ءتيىستى قۇجاتتاماسىز ەڭ وزىق ءارى يننوۆاسيالىق يدەيانىڭ ءوزى تاجىريبەلىك دەڭگەيدە قالىپ، وندىرىستىك ورتاعا ەنگىزىلمەي قالۋى مۇمكىن.
سونىمەن قاتار جوبانىڭ ەكونوميكالىق نەگىزدەمەسىن ازىرلەۋ دە ماڭىزدى كەزەڭدەردىڭ ءبىرى بولىپ تابىلادى. بۇل باعىتتا ءونىمنىڭ وزىندىك قۇنىن ەسەپتەۋ، وندىرىستىك شىعىنداردى تالداۋ، باعا ساياساتىن قالىپتاستىرۋ، رەنتابەلدىلىك دەڭگەيىن انىقتاۋ جانە جوبانىڭ قارجىلىق تۇراقتىلىعىن باعالاۋ ماسەلەلەرى قاراستىرىلادى. ەكونوميكالىق ەسەپتەۋلەر جوبانىڭ تيىمدىلىگىن دالەلدەۋگە جانە ونىڭ ۇزاق مەرزىمدى پەرسپەكتيۆادا تابىستى بولۋىن قامتاماسىز ەتۋگە مۇمكىندىك بەرەدى.
اتالعان ۇدەرىستەرگە كاسىبي دايارلىق بارىسىندا ەرەكشە نازار اۋدارىلادى. اتاپ ايتقاندا، «ازىق-تۇلىك ونىمدەرىن ءوندىرۋ تەحنولوگياسى» ماماندىعىندا تەحنولوگيالىق قۇجاتتامانى دۇرىس ازىرلەۋ، ءوندىرىس پروسەسىن جوسپارلاۋ جانە ساپا كورسەتكىشتەرىن ساقتاۋ داعدىلارى قالىپتاستىرىلسا، «ەسەپ جانە اۋديت» ماماندىعىندا ەكونوميكالىق ەسەپتەۋلەر جۇرگىزۋ، قارجىلىق تالداۋ جاساۋ جانە جوبانىڭ تيىمدىلىگىن باعالاۋ ماسەلەلەرى تەرەڭدەتىلىپ وقىتىلادى. بۇل ءوز كەزەگىندە ءبىلىم الۋشىلاردىڭ تەوريالىق ءبىلىمىن تاجىريبەمەن ۇشتاستىرىپ، ناقتى وندىرىستىك جانە كاسىپكەرلىك مىندەتتەردى شەشۋگە قابىلەتتى مامان رەتىندە قالىپتاسۋىنا ىقپال ەتەدى.
«گليۋتەنسىز كەكس ءوندىرۋ ءتاسىلى» پايدالى مودەلىنە پاتەنت الۋدىڭ ءوندىرىس ءۇشىن ماڭىزى قانداي؟
گليۋتەنگە توزىمسىزدىگى بار ادامدارعا گليۋتەنسىز ونىمدەردى تۇراقتى تۇردە تۇتىنۋ ۇسىنىلادى. الايدا قازاقستان نارىعىندا مۇنداي ونىمدەر وتە سيرەك كەزدەسەدى جانە كوبىنەسە شەتەلدەن يمپورتتالادى. بۇل ولاردىڭ جوعارى باعاسىنا، ساقتاۋ مەرزىمىنىڭ قىسقارۋىنا جانە ۇزاق ساقتاۋ كەزىندە ساپاسىنىڭ تومەندەۋىنە اكەلەدى. «گليۋتەنسىز كەكس ءوندىرۋ ءتاسىلى» اتتى پايدالى مودەلگە №9810 پاتەنت 08.11.2023 ج. ارنايى پاندەر وقىتۋشىلارى يەلەندى.
وقۋ ورىندارىندا شاعىن بيزنەس جوباسىن قۇرۋدىڭ نەگىزگى ماقساتى قانداي؟
قازىرگى تاڭدا قازاقستاندا شاعىن جانە ورتا بيزنەس ەكونوميكانىڭ تۇراقتى دامۋىنىڭ نەگىزگى قوزعاۋشى كۇشى بولىپ تابىلادى. نارىقتىق قاتىناستاردىڭ دامۋى، جاڭا تەحنولوگيالاردىڭ ەنگىزىلۋى مەن حالىقتىڭ كاسىپكەرلىك بەلسەندىلىگىنىڭ ارتۋى – بيزنەس جۇرگىزۋدىڭ وزەكتى جانە ءتيىمدى باعىتتارىن قالىپتاستىرۋدا ماڭىزدى ءرول اتقارادى. سونىمەنقاتار كوللەدجدە باستاۋ الىپ وتىرعان «Metu cakes» شاعىن كاسىپتىك بيزنەسى كونديتەرلىك ونىمدەر، ناۋبايحانا جانە ۇننان جاسالعان ونىمدەر ءوز بيزنەس جوسپارلارىن ىسكە اسىرۋدا جانە 2025 جىلدىڭ قازان ايىندا وقىتۋشىلار مەن «تۋريزم» ماماندىعى بويىنشا ءبىلىم الاتىن ستۋدەنتتەردىڭ باستاماسىمەن «Step Up» جاستار كاسىپكەرلىك ورتالىعى اشىلدى. اتالعان ورتالىقتىڭ قۇرىلۋى ءبىلىم بەرۋ مەن تاجىريبەنى ۇشتاستىرۋ، ستۋدەنتتەردىڭ كاسىپكەرلىك قۇزىرەتتەرىن دامىتۋ، سونداي-اق تۋريزم سالاسىندا يننوۆاسيالىق يدەيالاردى جۇزەگە اسىرۋ ماقساتىندا قولعا الىندى.
«Step Up» تۋريستىك بىرلەستىگى ستۋدەنتتەردىڭ كاسىبي الەۋەتىن ارتتىرۋعا، ولاردىڭ باستاماشىلدىعى مەن شىعارماشىلىق ويلاۋ قابىلەتىن دامىتۋعا باعىتتالعان. ورتالىق اياسىندا تۋريزم يندۋسترياسىنا قاتىستى جوبالار ازىرلەنىپ، ستارتاپ-يدەيالاردى قولداۋ، تاجىريبەلىك جۇمىستاردى ۇيىمداستىرۋ، سونىمەن قاتار كاسىپكەرلىك داعدىلاردى قالىپتاستىرۋعا ارنالعان ءىس-شارالار وتكىزىلۋدە.
ورتالىقتىڭ قىزمەتى وقىتۋشىلاردىڭ ادىستەمەلىك قولداۋىمەن جانە ستۋدەنتتەردىڭ بەلسەندى قاتىسۋىمەن جۇزەگە اسىرىلادى. بۇل ءوز كەزەگىندە ءبىلىم الۋشىلاردىڭ تەوريالىق ءبىلىمىن تاجىريبەمەن ۇشتاستىرىپ، ەڭبەك نارىعىندا سۇرانىسقا يە مامان رەتىندە قالىپتاسۋىنا مۇمكىندىك بەرەدى. «Step Up» جاستار كاسىپكەرلىك ورتالىعى قازىرگى زامان تالاپتارىنا ساي باسەكەگە قابىلەتتى، كاسىپكەرلىك ويلاۋ قابىلەتى جوعارى جاس مامانداردى دايارلاۋعا باعىتتالعان ماڭىزدى الاڭ بولىپ تابىلادى.
قازىرگى تاڭدا ءبىلىم بەرۋ سالاسىندا جاڭا تەحنولوگيالاردىڭ ءرولى قانداي؟
قازىرگى ءبىلىم بەرۋ جۇيەسىندە تەحنولوگيالاردىڭ ءرولى وتە زور. سيفرلىق قۇرالدار، ونلاين-پلاتفورمالار جانە جاساندى ينتەللەكت ءبىلىم مازمۇنىن جاڭارتىپ، وقىتۋدىڭ جاڭا فورماتتارىن قالىپتاستىرىپ جاتىر. بۇرىن تەوريالىق ماتەريالدار باسىم بولسا، ءقازىر پراكتيكالىق داعدىلار مەن سيفرلىق قۇزىرەتتەر الدىڭعى ورىنعا شىقتى.
تەحنولوگيالاردىڭ ەنگىزىلۋى ءبىلىم بەرۋ باعدارلاماسىنا قالاي اسەر ەتتى؟
ەڭ الدىمەن باعدارلامانىڭ مازمۇنى جاڭاردى. جاڭا سيفرلىق قۇزىرەتتەر – مەدياساۋاتتىلىق، باعدارلامالاۋ، اقپاراتتىق قاۋىپسىزدىك، دەرەكتەردى تالداۋ – وقۋ جوسپارلارىنا ەنگىزىلدى. ەكىنشىدەن، ساباق بەرۋ فورماتى دا وزگەرىپ، ءداستۇرلى ادىستەردىڭ ورنىنا ينتەراكتيۆتى وقىتۋ كەڭىنەن قولدانىلا باستادى. بەينەساباقتار، ۆيرتۋالدى زەرتحانالار وقىتۋدىڭ ءداستۇرلى ادىستەرىن تولىقتىرىپ، ستۋدەنتتەردىڭ قىزىعۋشىلىعىن ارتتىردى. بۇگىنگى تاڭدا ەڭبەك نارىعى تەحنولوگيالاردى يگەرە الاتىن مامانداردى تالاپ ەتەدى.
تالاپكەرلەر مەن اتا-انالاردى ءجيى مازالايتىن سۇراق: كوللەدج ديپلومى سۇرانىسقا يە بولۋ ءۇشىن جەتكىلىكتى مە، الدە مىندەتتى تۇردە جوعارى وقۋ ورنىن ءبىتىرۋ كەرەك پە؟
ءبىرجاقتى جاۋاپ جوق، ءبارى مانساپتىق ماقساتقا بايلانىستى. كوللەدج ديپلومى – جۇمىسشى ماماندىعى مەن ورتا بۋىن مامانى بىلىكتىلىگىن بەرەدى. تۇلەك بىردەن وندىرىستە جۇمىس ىستەۋگە دايىن: اۋىسىم شەبەرى، جەلى وپەراتورى، لابورانت، سەح تەحنولوگى قىزمەتتەرىنەن باستاۋعا بولادى. بۇل – تاجىريبەگە باعىتتالعان ءبىلىم، سوندىقتان ءبىزدىڭ تۇلەكتەردى جۇمىس بەرۋشىلەر سوڭعى كۋرستان-اق الىپ كەتەدى.
ال جوعارى وقۋ ورنى تەرەڭ تەوريالىق جانە پراكتيكالىق دايىندىق بەرەدى. بۇل – جوعارى باسقارۋ دەڭگەيىنە، زەرتتەۋشى نەمەسە عالىم بولۋعا باستايتىن جول. كوپتەگەن تۇلەكتەرىمىز 2–3 جىل جۇمىس ىستەگەننەن كەيىن ءوز باعىتىن انىقتاپ، جوو-عا قىسقارتىلعان وقۋ تۇرىمەن تۇسەدى.
وقىتۋ ادىستەرىندە قانداي وزگەرىستەر بايقالادى؟
وقىتۋ ادىستەرى بۇرىنعىدان دا كوپتۇرلى بولدى. ءقازىر وقىتۋشىلار جوبالىق وقىتۋ، ينتەراكتيۆتى، پراكتيكالىق جانە توپتىق سيفرلىق جۇمىستاردى ءجيى قولدانادى.. ءقازىر وقىتۋشىلارۆيدەوساباقتاردى، انيماسيالاردى، ينتەراكتيۆتى تاپسىرمالاردى، ۆيرتۋالدى زەرتحانالاردى ءجيى قولدانادى. بۇل ادىستەر وقۋشىنىڭ پانگە قىزىعۋشىلىعىن ارتتىرىپ، وقۋ ماتەريالىنتەرەڭىرەك تۇسىنۋگە مۇمكىندىك بەرەدى. بۇل – تەحنولوگيالاردىڭ ەڭ ۇلكەن ارتىقشىلىقتارىنىڭ ءبىرى.
الداعى ۋاقىتتا ءبىلىم بەرۋ باعدارلاماسى قالاي وزگەرەدى دەپ ويلايسىز؟
بولاشاقتا جاساندى ينتەللەكتكە نەگىزدەلگەن ءاداپتيۆتى وقىتۋ جۇيەلەرى كەڭ تارالادى. ءبىلىم بەرۋ باعدارلاماسى ودان ءارى سيفرلاندىرۋعا، جاساندى ينتەللەكتتى قولدانۋعا، ۆيرتۋالدى زەرتحانالاردى كەڭەيتۋگە، جەكە وقۋ تراەكتوريالارىن قالىپتاستىرۋعا باعىتتالادى. بۇل وزگەرىستەر جاڭا بۋىن ماماندارىن تاربيەلەۋگە، ولاردىڭ باسەكەگە قابىلەتتىلىگىن ارتتىرۋعا جول اشادى. وقۋلىقتاردىڭ باسىم بولىگى سيفرلىق فورماتقا وتەدى. ءۇي تاپسىرمالارىن تەكسەرۋ، وقۋ جوسپارىن كىرىكتىرۋ، ستۋدەنتتىڭ قابىلەتىن بولجاۋ سياقتى فۋنكسيالار اۆتوماتتاندىرىلۋى مۇمكىن. قىسقاشا ايتقاندا، بولاشاقتاعى ءبىلىم بەرۋ باعدارلاماسى تەحنولوگياعا نەگىزدەلگەن، يكەمدى، جەكە باعىتتالعان جانە ومىرمەن تىعىز بايلانىستى بولماق. ءبىراق تەحنولوگيا قانشالىقتى دامىسا دا، وقىتۋشىنىڭءرولى جويىلمايدى. سەبەبى ءبىلىم – تەك اقپارات بەرۋ ەمەس، ادامدى تاربيەلەۋ، بولاشاق ماماننىڭ بويىنا ادامگەرشىلىك، رۋحاني، پاتريوتتىق قۇندىلىقتار سياقتى قاسيەتتەردى قالىپتاستىرۋ.
ايتپاقشى، الماتى كوللەدجدەرى ستۋدەنتتەرىنىڭ دايارلىق دەڭگەيىن دامىعان ەلدەردەگى قاتارلاستارىمەن سالىستىرساڭىز، قالاي باعالار ەدىڭىز؟
تەوريالىق ىرگەلى ءبىلىم جاعىنان ستۋدەنتتەر دايىندىقتار وتەدى. ءبىز ولاردى وڭىرىمىزگە ءتان ءارتۇرلى شيكىزاتپەن جۇمىس ىستەۋگە ۇيرەتەمىز. ول وتە مىقتى پراكتيكالىق تاجىريبە. كوللەدجدىڭ الەۋمەتتىك سەرىكتەس كاسىپورىندارىمەن تىعىز بايلانىسىنىڭ ارقاسىندا ستۋدەنتتەر ءبىرىنشى كۋرستان باستاپ ناقتى ءوندىرىستى كورەدى، ۇزاق مەرزىمدى تاجىريبەدەن وتەدى. ولار تەك ەسەپتەپ قانا قويماي، وندىرىستەگى ماسەلەنى جەدەل شەشۋگە قابىلەتتى.
بءىز زاماناۋي تەحنولوگيالاردى قازاقستاننىڭ بىرەگەي شيكىزات الەۋەتىمەن ۇيلەستىرە وتىرىپ، ءوز جولىمىزدى قالىپتاستىرىپ كەلەمىز. بءىزدىڭ تۇلەكتەر ۇزدىك تاجىريبە مەن ەلىمىزدە سۇرانىسقا يە ءوز ءىسىنىڭ مىقتى ماماندارىن دايارلاپ شىعارامىز.
جاڭا تەحنولوگيالاردى ەنگىزۋدىڭ نەگىزگى ماقساتى قانداي؟
كوللەدجىنىڭ بۇگىنگى باستى ستراتەگيالىق ماقساتى – ەڭبەك نارىعىنداعى وزگەرىستەرگە جىلدام بەيىمدەلەتىن، سيفرلىق ساۋاتتى، جوعارى تەحنولوگيالىق جوبالاردى جۇزەگە اسىرا الاتىن بىلىكتى مامان دايارلاۋ. بۇگىنگى كۇنى تەلەكوممۋنيكاسيا، IT، وندىرىستىك تەحنولوگيالار سالاسى وتە قارقىنمەن دامىپ جاتىر.
سوندىقتان ءبىلىم بەرۋ مازمۇنى تەك تەوريالىق ەمەس، ەڭ باستىسى پراكتيكالىق جانە يننوۆاسيالىق باعىتتا بولۋى قاجەت. جاڭا تەحنولوگيالاردى ەنگىزۋ ارقىلى ءبىز:
ستۋدەنتتەردىڭ كاسىبي قۇزىرەتتەرىن ارتتىرامىز؛
وقىتۋ پروسەسىن زاماناۋي ستاندارتتارعا سايكەستەندىرەمىز؛
ءبىلىم الۋشىلاردى ناقتى وندىرىسكە بەيىمدەيمىز؛
جۇمىس بەرۋشىلەردىڭ تالاپتارىنا تىكەلەي جاۋاپ بەرەتىن داعدىلار قالىپتاستىرامىز.
كوللەدج الداعى ۋاقىتتا قانداي تەحنولوگيالىق ءىس-شارالار وتكىزۋدى جوسپارلاپ وتىر؟
الداعى ۋاقىتتا بىرنەشە ءىرى كولەمدى ءىس-شارا وتكىزۋدى جوسپارلاپ وتىرمىز. اتاپ ايتقاندا قالالىق، رەسپۋبليكالىق حاكاتوندار، جۇمىس بەرۋشىلەردىڭ فورۋمى، كاسىپتىك پراكتيكاداعى ماستەر كلاستار، وندىرىستەن كەلگەن ماماندارمەن كەزدەسۋلەر.
بۇل شارالاردىڭ ەڭ باستى قۇندىلىعى – ستۋدەنتتەردىڭ ناقتى داعدىلاردى مەڭگەرۋى. ەڭبەك نارىعىندا قاجەت داعدىلاردى ەرتە جاسىنان قالىپتاستىرادى، كومپانيالارمەن تىكەلەي بايلانىس ورناتادى، حاكاتونداردا، سەمينارلاردا تاجىريبە جيناپ، پورتفوليو قالىپتاستىرادى.
كوپتەگەن ستۋدەنتتەرىمىز ءىس-شارالاردان كەيىن پراكتيكاعا نەمەسە جۇمىسقا ۇسىنىس الىپ جاتادى
كوللەدج حالىقارالىق بايلانىستاردى دامىتۋ بويىنشا جۇمىس جۇرگىزەدى مە؟
كوللەدج شەتەلدىك وقۋ ورىندارىمەن، ءبىلىم بەرۋ ۇيىمدارىمەن جانە ءارتۇرلى حالىقارالىق ورتالىقتارمەن سەرىكتەستىك ورناتۋعا ۇمتىلادى. اتاپ ايتقاندا قىرعىزستان، وزبەكستان كوللەدجدەرىمەن حالىقارالىق بايلانىسورناتىلدى. الداعى ماقساتتا تۇركيا، جۇڭگو جانەباسقا دا تدم ەلدەرىندە حالىقارالىق بايلانىس ورناتۋ ويدا بار.
بۇل جۇمىس اياسىندا:
سياقتى باعىتتار قاراستىرىلادى.
كوللەدجدە اكادەميالىق ۇتقىرلىق باعدارلاماسى جۇزەگە اسىرىلا ما؟
ءيا، كوللەدجدە اكادەميالىق ۇتقىرلىق باعدارلاماسى جۇزەگە اسىرىلادى.
باعدارلاما اياسىندا ءبىلىم الۋشىلار مەن پەداگوگتار باسقا وقۋ ورىندارىندا ءبىلىم الۋعا، تاجىريبە الماسۋعا، قىسقا مەرزىمدى كۋرستارعا، سەمينارلارعا جانە وندىرىستىك پراكتيكاعا قاتىسۋ مۇمكىندىگىنە يە.
كوللەدج ىشكى (قازاقستان ىشىندەگى) جانە سىرتقى (حالىقارالىق) سەرىكتەس وقۋ ورىندارىمەن بىرلەسە وتىرىپ، اكادەميالىق ۇتقىرلىقتى دامىتۋ باعىتىندا جۇمىستار جۇرگىزەدى. باعدارلامانىڭ ماقساتى – ءبىلىم الۋشىلاردىڭ كاسىبي داعدىلارىن ارتتىرۋ، كوكجيەگىن كەڭەيتۋ، الدىڭعى قاتارلى تاجىريبەلەرمەن تانىسۋ جانە باسەكەگە قابىلەتتى ماماندار دايارلاۋ.
وقىتۋشىلار جاڭا تەحنولوگيالىق وزگەرىستەرگە قالاي بەيىمدەلۋدە؟
وقىتۋشىلار – كوللەدجدىڭ باستى قوزعاۋشى كۇشى. سوندىقتان ءبىز پەداگوگتاردىڭ كاسىبي دامۋىنا ەرەكشە كوڭىل بولەمىز. وقىتۋشىلارىمىز جىل سايىن سيفرلىق پەداگوگيكا، EdTech، WorldSkills ستاندارتتارى بويىنشا كۋرستار وتەدى، جاڭا IT قۇرالدارىمەن جۇمىس ىستەۋ بويىنشا ىشكى ترەنينگتەر ۇيىمداستىرىلادى؛
بۇل جۇمىستار وقىتۋشىلاردىڭ جاڭاشىلدىققا بەيىمدەلۋىنە جانە ساباق ساپاسىنىڭ ارتۋىنا تىكەلەي اسەر ەتەدى.
كوللەدجدە ءبىلىم الۋشىلار مەن پەداگوگتاردىڭ بىلىكتىلىگىن ارتتىرۋ كۋرستارى ۇيىمداستىرىلا ما؟
ءيا، كوللەدجدە ءبىلىم الۋشىلار مەن پەداگوگتاردىڭ بىلىكتىلىگىن ارتتىرۋ كۋرستارى ۇيىمداستىرىلادى.
كوللەدج جىل سايىن پەداگوگتاردىڭ كاسىبي قۇزىرەتتىلىگىن دامىتۋ ماقساتىندا زاماناۋي وقۋ ادىستەمەلەرى، سيفرلىق ساۋاتتىلىق، ينكليۋزيۆتى ءبىلىم بەرۋ، STEM تەحنولوگيالارى، دۋالدى وقىتۋ جانە پاندىك شەبەرلىك باعىتتارى بويىنشا بىلىكتىلىكتى ارتتىرۋ كۋرستارىن وتكىزەدى.
سونىمەن قاتار ءبىلىم الۋشىلار ءۇشىن دە قوسىمشا وقىتۋ كۋرستارى، كاسىبي داعدىلاردى دامىتۋ ترەنينگتەرى، وندىرىستىك شەبەرلىك ساباقتارى جانە ءتۇرلى باعىتتاعى قوسىمشا ءبىلىم بەرۋ باعدارلامالارى قاراستىرىلعان.
بۇل كۋرستار وقۋ پروسەسىنىڭ ساپاسىن ارتتىرۋعا، پەداگوگتار مەن ستۋدەنتتەردىڭ كاسىبي دامۋىنا جانە ەڭبەك نارىعىندا باسەكەگە قابىلەتتى بولۋىنا ىقپال ەتەدى.