كەشتە سازگەردىڭ جيىرماعا تارتا ءانى شىرقالدى
اۋىلىن اڭساعان ءاربىر قازاقتىڭ ساعىنىشىن جەتكىزىپ، كىندىگىنىڭ قانى تامعان جەرىن اڭساتقان «اۋىلىم» ءانىن بۇگىندە تۇتاس ەل بىلەدى. ءتاي-تاي باسقان بالادان، تاياق ۇستاعان قارياعا دەيىن جاتقا بىلەتىن اۋەزدى ءاننىڭ اۆتورىن كەشە قازاق ەلى ەسكە الدى. كەشتە سازگەردىڭ جيىرماعا تارتا ءانى شىرقالدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تەمىرجان بازاربايەۆتى ەسكە الۋ كەشىن، كۇيشى سەكەن تۇرىسبەكوۆ اقجايلاۋ كومپوزيسياسىمەن اشتى. الاكول اۋدانى جالعىزاعاش اۋىلىنان تۇلەپ ۇشقان سازگەردىڭ جاناشىر جاقىندارى مەن ونەرىن قولداۋشىلار قاتىستى.
«اۋىلىم ءانىن بىلمەيتىن ادام جوق. وكىنىشكە قاراي، ءاننىڭ اۆتورى كىم ەكەنىن ەشكىم بىلمەگەن. سازگەر ەلەۋسىز قالىپ كەلدى. سوندىقتان الەۋمەتتىك ادىلدىكتى ورناتايىن دەپ وسى ىسپەن اينالىسقانىما ءبىر جىل بولدى. بۇكىل ءانىن جيناپ ءبىرىنشى رەت شىعارىپ وتىرمىن»، – دەدى ۇيىمداستىرۋشى بولاتبەك قاتىقبايەۆ.
«مەنى ونەرگە باۋلىعان كىسى. تەك ءان ەمەس، ول 4 سيمفونيا، 20 شاقتى قورعا ارنالعان، بالالارعا ارنالعان سيكل، 200-گە تارتا ءان جيناعىن سەمەيدە ءبىز شىعاردىق»، – دەدى شاكارىم اتىنداعى سەمەي مەملەكەتتىك ۋنيۆەرسيتەتىنىڭ پروفەسسورى ايمۇحامبەت بەيسەنبەكوۆ.
ايتۋلى كەشتە ونەر جۇلدىزدارىنان بولەك، ءبىرتاۋار كومپوزيتوردىڭ جاقىندارى مەن شاكىرتتەرى كەلىپ، قۇندى كۇيتاباقتى جارىققا شىعاردى. كوزى تىرىسىندە جازعان اندەرىنىڭ دە جاڭا وڭدەلگەن نۇسقاسى كەشتە شىرقالدى.
«ءشامشى قالداياقوۆ اتامىزبەن بىرگە كونسەرۆاتورياعا تۇسكەن، ءبىر گرۋپپادا وقىعان ەكەن. تەمىرجان بازاربايەۆ ءشامشى اتامىزدىڭ العاشقى 4 ءانىنىڭ نوتاسىن جازىپ بەرگەن. ءشامشى اتامىز وقۋدان شىعىپ كەتكەننەن كەيىن بۇل كىسى دە سەمەي وڭىرىنە كەتىپ قالادى. سول جاقتا قالىپ قويىپ، ەكەۋىنىڭ اراسىنداعى شىعارماشىلىق بايلانىس ۇزىلەدى»، – دەگەن جۋرناليست، راديوجۇرگىزۋشى گۇلميرا ءنالىباي
ۆالس كورولى ءشامشى قالداياقوۆپەن ۇزەڭگىلەس بولعان دارىندى تۇلعا سول داۋىردەگى مۋزىكا مادەنيەتىنە جاڭا لەپ بەرگەن ونەر مايتالماندارىنىڭ كوشىن باستاعان. ال ونىڭ جاقۇت جىرلارعا ۇيلەستىرە جازعان اۋەنى ەل ەسىندە ماڭگى قالارى ءسوزسىز.