تۇركياداعى جەر سىلكىنىسى قۇرباندارىنىڭ سانى مىڭنان استى

جەر سىلكىنىسىنىڭ قايتالانۋىنان قاۋىپتەنگەن تۇركيا بيلىگى تۇرعىنداردى ۇيلەرىنە قايتپاۋعا شاقىردى

تۇركياداعى جەر سىلكىنىسىنەن قۇربان بولعاندار سانى 1014 ادامعا جەتتى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.

اتالعان مالىمەتتەردى تۇركيانىڭ توتەنشە جاعدايلاردىڭ الدىن الۋ مەن جويۋ باسقارماسى جاريالاعان.

تۇركيانىڭ وڭتۇستىك-شىعىسىنداعى كاحرامانماراش پروۆينسياسىندا ورنالاسقان ءزىلزالا قۇرباندارىنىڭ سانى مىڭنان استى، كەمىندە 7 مىڭ ادام جاراقات الدى.

تۇركيانىڭ توتەنشە جاعدايلاردىڭ الدىن الۋ مەن جويۋ باسقارماسىنىڭ مالىمەتىنشە، كاحرامانماراش، كيليس، ديارباكىر، ادانا، وسمانيە، گازيانتەپ، شانلىۋرفا، اديامان، مالاتيا جانە حاتاي پروۆينسيالارىندا 2824 عيمارات قيراعان.

جەر سىلكىنىسىنىڭ قايتالانۋىنان قاۋىپتەنگەن تۇركيا بيلىگى تۇرعىنداردى ۇيلەرىنە قايتپاۋعا شاقىردى.

مەملەكەت باسشىسى قاسىم-جومارت توقايەۆ تۇركيا پرەزيدەنتى رەجەپ تاييپ ەردوعانعا كوڭىل ايتتى جانە ۇكىمەتكە تۇركياعا شۇعىل كومەك كورسەتۋدى تاپسىردى.

ءسىم مالىمەتى بويىنشا، قازىرگى ساتكە دەيىن وندا قازاقستان ازاماتتارى زارداپ شەكتى دەگەن اقپارات كەلىپ تۇسكەن جوق.