بۇل - بيىل تىركەلگەن العاشقى جاعداي
الماتىلىق دارىگەرلەر 11 جاسار قىزعا شۇعىل وپەراسيا جاساپ، اسقازانىنان ءبىر كەلى شاش الىپ شىقتى، دەپ حابارلايدى Almaty-akshamy.kz Qazaqstan.tv-گە سىلتەمە جاساپ.
جەتكىنشەكتىڭ ءىشى اۋىرىپ، ءبىر اپتا بويى قۇسىپ، تابەتى بولماعان سوڭ، مەديسينالىق كومەككە جۇگىنگەن. تەكسەرۋ كەزىندە، اس قورىتۋ جۇيەسىنەن بوگدە زات انىقتالىپ، «اسقازاننىڭ تريحوبەزوارى» دەگەن دياگنوز قويىلعان.
دارىگەرلەر ناۋقاسقا وپەراسيا جاساپ، ۇزىندىعى 16 سم، سالماعى ءبىر كەلىگە جەتەتىن شاش پەن جۇننەن جينالعان زاتتى الىپ تاستاعان. قالالىق «بالالار شۇعىل مەديسينالىق كومەك كورسەتۋ ورتالىعىنىڭ» مالىمەتىنشە، مۇنداي جاعداي سيرەك كەزدەسەدى. بۇل - بيىل تىركەلگەن العاشقى جاعداي.
«نەگىزى جىلداپ پايدا بولادى عوي. ايلاپ. ءبىر كۇندە، ءبىر اپتادا پايدا بولمايدى. بالادا جاعىمسىز ادەتتەر بولعان عوي. شاشىن تىستەپ، شايناپ جۇتا بەرگەن عوي. ۇيىنە وسى اپتانىڭ اياعىندا شىعارامىز»، - دەيدى بالالار شۇعىل مەديسينالىق جاردەم ورتالىعىنىڭ ءبولىم مەڭگەرۋشىسى ساماتبەك ءابدىماناپ ۇلى.