الماتىدا كومەندانت ساعاتىن بۇزعانى ءۇشىن 84 ادام اكىمشىلىك جاۋاپقا تارتىلدى. بۇل تۋرالى قالالىق پوليسيا دەپارتامەنتىنىڭ باستىعى قانات تايمەردەنوۆ الماتىنىڭ تىنىس-تىرشىلىگىن قالپىنا كەلتىرۋ جونىندەگى قالالىق شتاب وتىرىسىندا ءمالىم ەتتى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
ونىڭ ايتۋىنشا، قالاداعى قوعامدىق ءتارتىپتى قامتاماسىز ەتۋگە جانە اسا ماڭىزدى نىسانداردى قورعاۋعا 3 800 پوليسيا مەن سارباز جۇمىلدىرىلدى. سونىمەن قاتار، ول الماتىدا پوليسيا جانە اسكەري قىزمەتكەرلەردەن قۇرىلعان جاياۋ پاترۋلدەر ءۇش اۋىسىمدى رەجيمدە جۇمىس ىستەپ جاتقانىن ايتتى.
«قالادا 5 بلوك-بەكەت جۇمىس ىستەپ تۇر. وعان 390 ادام جۇمىلدىرىلعان. قورعانىس مينيسترلىگى اسكەري قىزمەتكەرلەرى قالانىڭ بارلىق ماڭىزدى ستراتەگيالىق نىساندارىن قورعاپ تۇر. پوليسيا بانكتەردىڭ 49 ەسەپ ايىرىسۋ بولىمشەسىن كۇزەتكە الدى»، - دەدى ول.
«تەرروريزمگە قارسى وپەراسيا باستالعالى ىشكى ىستەر ورگاندارىنا جالپى 2300 ادام جەتكىزىلدى. ولاردىڭ 236-سى قاراقشى جانە جاپپاي تارتىپسىزدىككە قاتىسقاندار بولدى، ولار قاماۋعا الىندى. 84 ادام كومەندانتتىق ساعاتتى بۇزعانى ءۇشىن اكىمشىلىك جاۋاپقا تارتىلدى»، - دەدى قانات تايمەردەنوۆ.
سپيكەردىڭ سوزىنشە، 7 قارۋ-جاراق دۇكەنىنەن 1 347 قارۋ ۇرلانعان. وسىعان قاتىستى ارنايى تەرگەۋ توبى قۇرىلدى. وسى ساتكە دەيىن 127 قارۋ تاركىلەندى، ونىڭ 58ء-ى اڭشى دۇكەنىنەن ۇرلانعانى انىقتالدى.