الماتىدا وقۋ-اعارتۋ مينيسترلىگىنىڭ رەسپۋبليكالىق عىلىمي-پەداگوگيكالىق كىتاپحاناسى مەن «كىتاپ وقيتىن ۇلت – چيتايۋششايا ناسيا» قوعامدىق قورى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى.
مەموراندۋمعا رەسپۋبليكالىق عىلىمي-پەداگوگيكالىق كىتاپحانانىڭ ديرەكتورى ءاليا سايدەمبايەۆا جانە «كىتاپ وقيتىن ۇلت – چيتايۋششايا ناسيا» قورىنىڭ تەڭ ءتوراعاسى شىڭعىس جۇماعالي قول قويدى. ءاليا سايدەمبايەۆا بۇل قۇجات «كىتاپ وقيتىن ۇلت» جوباسى اياسىنداعى تاراپتاردىڭ ارىپتەستىگىن رەسمي تۇردە بەكىتىپ، ەلىمىزدە تۇراقتى وقۋ مادەنيەتىن قالىپتاستىرۋعا، سىني ويلاۋدى دامىتۋعا جانە قازاقستاندىقتاردىڭ زياتكەرلىك الەۋەتىن ارتتىرۋعا باعىتتالعان بىرلەسكەن جۇمىستى ۇيىمداستىرۋعا جوش اشادى.
ال شىڭعىس جۇماعالي «كىتاپ وقيتىن ۇلت» جوباسى مەملەكەت باسشىسى قاسىم-جومارت توقايەۆتىڭ ۇلتتىق قۇرىلتايدا ايتقان باستاماسى اياسىندا جۇزەگە اسىرىلىپ جاتقانىن اتاپ ءوتتى.
- جوبانىڭ باستى ماقساتى — قوعامدا تۇراقتى كىتاپ وقۋ مادەنيەتىن قالىپتاستىرۋ جانە قازاقستاندى الەمدەگى ەڭ كوپ وقيتىن ون ەلدىڭ قاتارىنا قوسۋ، - دەدى ول.
2025 جىلدىڭ قىركۇيەگىندە جوبا پيلوتتىق رەجيمدە قاراعاندى وبلىسىندا، قوستاناي وبلىسىندا جانە شىمكەنت قالاسىندا باستالدى. ەندى وعان الماتى قالاسى دا قوسىلادى. قازىرگى ۋاقىتتا جوباعا 189 مىڭنان استام ادام قاتىسىپ جاتىر.
جوبا حالىقتىڭ ءارتۇرلى توپتارىن قامتيدى جانە مىنا باعىتتار بويىنشا جۇرگىزىلەدى:
− «كىتاپ وقيتىن مەكتەپ» (6–10 سىنىپ وقۋشىلارى)؛
− «كىتاپ وقيتىن كوللەدج» جانە «كىتاپ وقيتىن ۋنيۆەرسيتەت» (ستۋدەنتتەر)؛
− «كىتاپ وقيتىن پەداگوگ» (ۇستازدار)؛
− «كىتاپ وقيتىن اۋلەت» (وتباسىلار)؛
− «كىتاپ وقيتىن مەملەكەتتىك قىزمەتشى» (مەملەكەتتىك قىزمەتشىلەر).
- ءار باعىت ءۇشىن ساراپشىلار قاتىسۋشىلاردىڭ جاسى مەن قىزىعۋشىلىعىنا سايكەس قازاق جانە ورىس تىلدەرىندە 15 كىتاپتان تۇراتىن ءتىزىم قۇراستىردى. تىزىمگە جالپىۇلتتىق داۋىس بەرۋ ناتيجەسىندە تاڭدالعان «قازاقستان ادەبيەتىنىڭ 100 تانىمال كىتابى» جوباسىنىڭ شىعارمالارى مەن الەمدىك بەستسەللەرلەر ەنگىزىلگەن، - دەدى شىڭعىس جۇماعالي.