قازاقستان رەسپۋبليكاسىنىڭ سىرتقى ىستەر مينيسترلىگى 2026 جىلعى 13 قاڭتاردا قارا تەڭىز اكۆاتورياسىندا كاسپيي قۇبىرى كونسورسيۋمىنىڭ تەڭىز تەرمينالىنا باعىت العان ءۇش تانكەرگە ۇشقىشسىز ۇشۋ اپپاراتتارى ارقىلى جاسالعان شابۋىلدارعا بايلانىستى الاڭداۋشىلىق بىلدىرەدى، - دەپ حابارلايدى Aqshamnews.kz.
وسىعان بايلانىستى قازاقستان تاراپى ءبىرقاتار ەۋروپالىق مەملەكەتتەردىڭ ەلشىلەرىمەن شۇعىل كەزدەسۋلەر وتكىزىپ، سونداي-اق اقش جانە باسقا دا شەتەلدىك سەرىكتەستەرمەن كونسۋلتاسيالار جۇرگىزدى. اتالعان كەزدەسۋلەر بارىسىندا حالىقارالىق قۇقىق نورمالارىن قاتاڭ ساقتاۋ، سونداي-اق كومىرسۋتەك رەسۋرستارىن تاسىمالداۋدىڭ، ونىڭ ىشىندە تەڭىز جولدارىنداعى قاۋىپسىزدىگىن قامتاماسىز ەتۋ جونىندە قاجەتتى شارالار قابىلداۋدىڭ ماڭىزدىلىعىنا ەرەكشە نازار اۋدارىلدى.
قازاقستان رەسپۋبليكاسىنىڭ قانداي دا ءبىر قارۋلى قاقتىعىستارعا قاتىسپايتىنى، جاھاندىق جانە ەۋروپالىق ەنەرگەتيكالىق قاۋىپسىزدىكتى نىعايتۋعا تۇراقتى تۇردە ۇلەس قوسىپ كەلە جاتقانى اتاپ ءوتىلدى. سونىمەن قاتار ەلىمىز ەنەرگيا رەسۋرستارىن حالىقارالىق تالاپتارعا تولىق سايكەس ءارى ۇزدىكسىز جەتكىزۋدى قامتاماسىز ەتىپ وتىرعانى ايتىلدى. وسى تۇرعىدا اتالعان تانكەرلەردىڭ بارلىق قاجەتتى رۇقسات قۇجاتتارى بولعانى جانە تالاپقا ساي سايكەستەندىرۋ قۇرالدارىمەن جابدىقتالعانى كورسەتىلدى.
مينيسترلىك سوڭعى ۋاقىتتا مۇنداي وقيعالاردىڭ جيىلەۋى حالىقارالىق ەنەرگەتيكالىق ينفراقۇرىلىمنىڭ ءقاۋىپسىز ءارى تۇراقتى جۇمىس ىستەۋىنە تونەتىن تاۋەكەلدەردىڭ ارتىپ كەلە جاتقانىن بىلدىرەتىنىن اتاپ ءوتىپ، سەرىكتەستەردى وسىنداي ينسيدەنتتەردىڭ الدىن الۋ ماقساتىندا بىرلەسكەن ءارى ۇيلەستىرىلگەن شارالار ازىرلەۋ ءۇشىن تىعىز ءوزارا ءىس-قيمىل جاساۋعا شاقىردى.