بۇل تۋرالى قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى ءدىن قىزمەتكەرلەرىنە جولداعان باعدارلىق بايانداماسىندا ايتتى، - دەپ حابارلايدى Aqshamnews.kz.
«اللاعا شۇكىر، حالقىمىزدىڭ يسلام ءدىنىن ۇستانۋى، سونىمەن قاتار قوعامدا ءدىني سانانىڭ كۇن ساناپ ارتۋى ادال تابىسقا دەگەن سۇرانىستى كۇشەيتتى. مۇسىلماندار كۇندەلىكتى قارجىلىق ىستەرىندە ءوسىمقورلىقتان، ادىلەتسىز كەلىسىمدەردەن جانە كۇماندى تابىستان ساقتانۋعا تىرىسادى. سونىڭ ناتيجەسىندە يسلام قارجىسى قاعيدالارىنا نەگىزدەلگەن ونىمدەر مەن قىزمەتتەرگە دەگەن قاجەتتىلىك ارتا ءتۇستى.
قوعامداعى بۇل سۇرانىس قارجى جۇيەسىنىڭ قۇرىلىمدىق وزگەرۋىنە تۇرتكى بولۋدا. ءداستۇرلى بانك قىزمەتتەرىمەن قوسا يسلامدىق قارجىلاندىرۋ، سەرىكتەستىككە نەگىزدەلگەن كەلىسىمدەر، ليزينگ، ساقتاندىرۋدىڭ يسلامدىق ءتۇرى سياقتى باعىتتارعا سۇرانىس ارتۋدا. بۇل قارجى جۇيەسىنىڭ ادىلەتتىلىك پەن الەۋمەتتىك جاۋاپكەرشىلىككە نەگىزدەلۋىنە جول اشۋدا. بۇل رەتتە حالىقتىڭ يسلامعا بەت بۇرۋى شاريعي قارجى سالاسىندا ءپاتۋالاردىڭ ءرولىن ارتتىرىپ وتىرعانىن ايتا كەتكەن ءجون.
قارجىعا قاتىستى ءدىني سۇراقتاردىڭ كوبەيۋىن جانە قوعامدا وسى سالاعا بايلانىستى سۇرانىستىڭ ارتۋىن ەسكەرىپ، قمدب يسلام قارجىسى سەكتورىن اشۋ تۋرالى شەشىم قابىلدادىم. اتالعان سەكتور قارجىلىق ونىمدەرگە شاريعي ساراپتاما جاساپ، قوعامعا سەنىمدى ءارى ءبىرىزدى ءپاتۋا ۇسىناتىن بولادى»،- دەدى باس ءمۇفتي ناۋرىزباي قاجى تاعان ۇلى.
ايتا كەتەيىك، ليزينگ، ساقتاندىرۋ، ينۆەستيسيا، وبليگاسيا، سيفرلىق اكتيۆتەر مەن ەلەكتروندى تولەم جۇيەلەرى سەكىلدى جاڭا قارجىلىق قۇرالدارعا شاريعات تۇرعىسىنان باعا بەرۋ – وسى سەكتوردىڭ باستى مىندەتتەرىنىڭ ءبىرى بولماق.