الماتىدا اۋانى جاقسارتۋ جانە كولىك ينفراقۇرىلىمىن دامىتۋ باعىتىندا كەشەندى شارالار قولعا الىندى. بۇل تۋرالى قالا اكىمىنىڭ ورىنباسارى الماسحان سماتلايەۆ وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مالىمدەدى.
العاش رەت الماتىلىق اگلومەراسيادا لاستاۋشى زاتتاردىڭ رۇقسات ەتىلگەن دەڭگەيىنە زەرتتەۋ جۇرگىزىلدى. وعان قالا اۋماعىمەن بىرگە 10 شاقىرىمدىق راديۋستاعى كولىك، جەكە ۇيلەر مەن مونشالار دا ەنگىزىلدى. ناتيجەسىندە جىلىنا 225 مىڭ توننادان استام شىعارىندىلار تىركەلدى، ونىڭ 189 مىڭى الماتىعا تيەسىلى. لاستانۋدىڭ 60%-عا جۋىعى كولىكتەن كەلەدى.
«قالادا كۇن سايىن 1،1 ملن-نان استام كولىك جۇرەدى. 2030 جىلعا قاراي الماتى حالقى 2،5 ملن ادامعا جەتىپ، ءار مىڭ تۇرعىنعا 311 كولىكتەن كەلمەك. بۇل جاعداي قوعامدىق كولىكتى – مەترو، LRT، BRT، اسپالى جولدار جانە وزگە باعىتتاردى جەدەل دامىتۋ قاجەتتىگىن كورسەتەدى»، – دەدى الماسحان سماتلايەۆ.
2025 جىلدان باستاپ اۆتوكولىك شىعارىندىلارىنا قاتىستى زاڭناما كۇشەيتىلدى: ەندى شەكتەن تىس لاستاۋعا ەسكەرتۋ جاسالمايدى، بىردەن ايىپپۇل سالىنادى. قايتالانعان جاعدايدا جەكە تۇلعالارعا – 10 اەك، زاڭدى تۇلعالارعا – 100 اەك، ال ورەسكەل بۇزۋشىلىق ءۇشىن تيىسىنشە 20 جانە 200 اەك ايىپپۇل قاراستىرىلعان.
ءقازىر اتموسفەرالىق اۋانى قورعاۋ ەرەجەلەرىنىڭ جوباسى دايىندالىپ جاتىر. قۇجات ءتيىستى ورگاندارمەن كەلىسىلگەن سوڭ جىل سوڭىنا دەيىن ءماسليحاتتىڭ قاراۋىنا ۇسىنىلادى. ول قالاداعى ەكولوگيالىق قاۋىپسىزدىكتى ارتتىرۋعا، تۇرعىندارعا تازا ءارى قولايلى ورتا قالىپتاستىرۋعا جانە اۋانىڭ لاستانۋىن ازايتۋعا باعىتتالعان.