جاس كاسىپكەرلەر بيزنەس جوبالارىن 2،5% تومەن پايىزبەن جۇزەگە اسىرا الاتىن بولادى.
شاعىن نەسيەلەۋ كونكۋرستىق نەگىزدە 21 مەن 35 جاسقا دەيىنگى جاستار اراسىندا جۇزەگە اسىرىلادى، دەپ حابارلايدى Almaty-akshamy.kz
بۇل جونىندە وڭىرلىك كوممۋنيكاسيالار قىزمەتىنىڭ الاڭىندا «اگرارلىق نەسيە كورپوراسياسىنىڭ» الماتى قالاسى بويىنشا فيليالىنىڭ وكىلدەرى حابارلادى.
«بۇل باعدارلاما بويىنشا رەسپۋبليكاعا 28،9 ملرد تەڭگە ءبولىندى، ونىڭ 4،8 ملرد تەڭگەسى الماتى جاستارىنا ءبولىندى. بۇل مىڭعا جۋىق كاسىپكەرلەر مەن جاستار. الماتى قالاسى بويىنشا 200 كاسىپكەر مەن جاستارعا كەڭەس بەرىلىپ، 20 كاسىپكەردىڭ ءوتىنىشى قابىلداندى، ونىڭ تورتەۋى كوميسسيا قاراۋىنا جىبەرىلدى»، - دەدى الماتى قالاسى بويىنشا فيليال ديرەكتورىنىڭ نەسيەلەۋ جونىندەگى ورىنباسارى ايكەن سەيتقاس.
سپيكەردىڭ ايتۋىنشا، ءوتىنىش بەرەر ساتتە جەكە كاسىپكەر رەتىندە تىركەلۋ مەرزىمى 5 جىلدان اسپاۋى كەرەك. باعدارلاماعا جۇمىسشى جاستاردىڭ وكىلدەرى دە قاتىسا الادى.
شاعىن نەسيەنىڭ كولەمى 5 ملن تەڭگەگە دەيىن بەكىتىلگەن، مال شارۋاشىلىعى جوبالارى ءۇشىن وتەۋ مەرزىمى - 7 جىلعا دەيىن، ال بيزنەستىڭ باسقا باعىتتارى ءۇشىن 5 جىلعا دەيىن. نەگىزگى بورىش پەن سىياقىنى وتەۋ كەزىندە شاعىن نەسيە مەرزىمىنىڭ ۇشتەن بىرىنە دەيىن جەڭىلدىك كەزەڭ قاراستىرىلعان.
مىندەتتى شارت – كەپىل مۇلىكتىڭ بولۋى. كەپىل رەتىندە جىلجىمالى جانە جىلجىمايتىن مۇلىك قابىلدانادى. كەپىل بولماعان جاعدايدا كەپىل بەرۋشى رەتىندە ءۇشىنشى تۇلعالاردى تارتۋعا بولادى بولادى (اتا-انا، تۋىس جانە ت.ب.).
نەسيە بەرۋ تۋرالى شەشىمدى قالا اكىمدىگى جانىنان قۇرىلعان ارنايى كوميسسيا قابىلدايدى. كوميسسيا قۇرامىنا قالالىق ءماسليحات دەپۋتاتتارى، مەملەكەتتىك ورگانداردىڭ، «اتامەكەن» كاسىپكەرلەر پالاتاسىنىڭ، بيزنەس-قوعامداستىقتاردىڭ جانە ب ا ق وكىلدەرى كىرەدى.
«ۇمىتكەرلەر وزدەرىنىڭ بيزنەس-جوبالارىن كوميسسيا وتىرىسىندا ۇسىنىپ، ولاردىڭ اراسىنان ەڭ پەرسپەكتيۆالىسىن كوميسسيا تاڭدايدى. جوبا وزەكتى، دالەلدى، ەكونوميكالىق نەگىزدەلگەن، الەۋمەتتىك ماڭىزى بار، ومىرشەڭ جانە ونىڭ ناقتى ءىس-قيمىل جوسپارى بولۋى كەرەك. بۇل رەتتە تۇرعىن ۇيلەردى، جەر ۋچاسكەلەرىن، باعالى قاعازداردى ساتىپ الۋعا جانە جوندەۋگە، قارۋ-جاراق، ەسىرتكى جانە باسقا دا مۇلىكتى ءوندىرۋ مەن ساتىپ الۋعا نەسيە بەرۋگە تىيىم سالىنادى»، - دەپ تۇيىندەدى ءسوزىن ءا. سەيىتقاس.
قاجەتتى قۇجاتتار ءتىزىمى:
- جەكە باسىن كۋالاندىراتىن قۇجات؛
- جوبا بويىنشا بيزنەس-جوسپار؛
- قىزمەت كورسەتەتىن بانكتەن شوتتىڭ بار ەكەنىن راستايتىن انىقتامالار؛
- قارجى ۇيىمدارىنان (نەسيە بولعان كەزدە) نەسيە بەرەشەگىنىڭ، ونىڭ ىشىندە مەرزىمى وتكەن بەرەشەكتىڭ بولۋى تۋرالى انىقتامالار؛
- قاتىسۋشىنىڭ/ۇمىتكەردىڭ جالاقىسىن جانە (نەمەسە) وزگە دە تابىستارىن راستايتىن قۇجات (جيناقتاۋشى زەينەتاقى قورىنان ءۇزىندى كوشىرمە)؛
- كەپىل مۇلىكتى باعالاۋ تۋرالى ەسەپ؛
- كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتار.
ءوتىنىش بەرۋ ءۇشىن الماتى قالاسى، ساتپايەۆ كوشەسى، 5 مەكەنجايىندا ورنالاسقان «اگرارلىق نەسيە كورپوراسياسى» اق فيليالىنا قۇجاتتاردى تاپسىرۋ قاجەت. شاعىن نەسيەلەۋ بويىنشا تولىق اقپاراتتى كورپوراسيانىڭ agrocredit.kz سايتىنان بىلۋگە بولادى.