ەلىمىزدە وقۋشىلاردىڭ ءبىلىم جەتىستىكتەرىنە مونيتورينگ جۇرگىزۋ باستالدى

مونيتورينگ 26 ءساۋىر مەن 11 مامىر ارالىعىندا بولادى.

بيىل ءبىلىم الۋشىلاردىڭ ءبىلىم جەتىستىكتەرىنىڭ مونيتورينگىن وتكىزۋ كەزىندە اكادەميالىق ادالدىق قاعيداتتارىنىڭ ساقتالۋىن باقىلاۋ ءۇشىن وقۋ-اعارتۋ مينيسترلىگىنىڭ قىزمەتكەرلەرى، ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ اۋماقتىق دەپارتامەنتتەرى، «ورلەۋ» بىلىكتىلىكتى ارتتىرۋ ۇلتتىق ورتالىعى جانە پەداگوگيكالىق جوعارى وقۋ ورىندارىنىڭ قىزمەتكەرلەرى تارتىلدى، دەپ حابارلايدى Almaty-akshamy.kz Elorda.info-عا سىلتەمە جاساپ.

وتكىزۋ فورماتى حالىقارالىق زەرتتەۋلەر سەكىلدى ستاندارت بويىنشا ءار اۋديتوريادا تەست-اكىمشىلەر بولادى.

ءبىلىم بەرۋ سالاسىنداعى ساپانى قامتاماسىز ەتۋ كوميتەتىنىڭ ءبىلىم سالاسىنداعى ساپانى قامتاماسىز ەتۋ ساياساتى باسقارماسىنىڭ باسشىسى دينارا ءابىلقانوۆانىڭ ايتۋىنشا، مونيتورينگ فۋنكسيونالدىق ساۋاتتىلىق دەڭگەيىن باعالاۋعا جانە العان بىلىمدەرىن مەكتەپ قابىرعاسىندا جانە ومىرلىك جاعدايلاردا قولدانا بىلۋگە باعىتتالعان.

«ءبىلىم ساپاسى تۋرالى ناقتى دەرەك الۋ ءۇشىن كوپتەگەن ەلدەر ءبىلىم الۋشىلاردىڭ وقۋ جەتىستىكتەرىن ۇلتتىق دەڭگەيدە ۇنەمى باعالاپ وتىرادى. وسىلايشا، ماڭىزدى سۇراقتارعا جاۋاپ الادى. وقىتۋ قانشالىقتى جۇيەلەنگەن؟ وقۋشىلاردىڭ ءبىلىم الۋ دەڭگەيى قانداي جانە ولار قوعامعا ەنۋگە قانشالىقتى دايىن؟ مىنە، وسى سۇراقتارعا جاۋاپ الۋ ءبىزدىڭ ءبىلىم بەرۋ جۇيەمىز ءۇشىن دە ماڭىزدى. تەك ءببجم-نىڭ وبەكتيۆتى ناتيجەلەرى عانا دۇرىس قورىتىندى جاساۋعا جانە ءتيىستى شەشىمدەر قابىلداۋعا مۇمكىندىك بەرەدى»، - دەيدى باسقارما باسشىسى.

تەستىلەۋ مەملەكەتتىك باقىلاۋ نىسانى ەمەس. سونداي-اق ءبىلىم الۋشى، ءبىلىم بەرۋ ۇيىمدارى ءۇشىن دە قۇقىقتىق سالدارى جوق.

ببجم-گە 4 جانە 9-سىنىپتاردان 50 مىڭنان استام وقۋشىسى قاتىسادى. 1 472 مەكتەپتە ءۇش باعىت بويىنشا كومپيۋتەرلىك كەشەندى تەستىلەۋ تۇرىندە وتەدى. ول وقۋ، ماتەماتيكالىق جانە جاراتىلىستانۋ ساۋاتتىلىعى. مونيتورينگ 26 ءساۋىر مەن 11 مامىر ارالىعىندا بولادى.