الماتى مادەنيەتتىڭ جاڭا فورماتتاعى ەلدىڭ رۋحاني جۇرەگى رەتىندەگى مارتەبەسىن نىعايتىپ كەلەدى.
الداعى جىلدارى قالادا جاڭا كىتاپحانالار، مۇراجايلار مەن تەاترلار اشىلىپ، تاريحي نىساندار جاڭعىرتىلىپ، زاماناۋي مادەني كەڭىستىكتەر قۇرىلادى. بۇل تۋرالى الماتى قالاسى اكىمىنىڭ ورىنباسارى ازامات قالدىبەكوۆ الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ايتتى.
«مادەنيەت – بۇل قالانىڭ كەلبەتى. الماتى ءاردايىم شىعارماشىل ادامداردى بىرىكتىرەتىن رۋحاني ورتالىق بولىپ كەلدى جانە قالاداعى ءار اۋدان وسى مادەني ەنەرگيانى سەزىنەتىندەي جاعداي جاساۋ باعىتىندا جۇمىس جۇرگىزىپ جاتىرمىز»، – دەدى ازامات قالدىبەكوۆ.
بۇگىندە الماتىدا تەاترلار مەن مۇراجايلاردان باستاپ گالەرەيالار مەن كىتاپحانالارعا دەيىن 100-دەن استام مادەنيەت مەكەمەسى جۇمىس ىستەيدى. ولاردى جىل سايىن ميلليونداعان قالا تۇرعىندارى مەن قوناقتارى تاماشالايدى. ال الداعى جىلدارى بۇل كورسەتكىش اۋقىمدى جاڭعىرتۋلاردىڭ ارقاسىندا ارتا تۇسپەك.
25 جىلدان بەرى العاش رەت قازاق مەملەكەتتىك سيركىندە كەشەندى رەكونسترۋكسيا باستالدى. اڭىزعا اينالعان عيماراتتىڭ تاريحي كەلبەتى ساقتالىپ، ىشكى قۇرىلىمى – ينجەنەرلىك جۇيەلەردەن باستاپ كورەرمەن زالىنا دەيىن – تولىق جاڭارتىلادى. سونىمەن قاتار، ناتاليا ساس اتىنداعى ورىس بالالار جانە جاسوسپىرىمدەر تەاترى مەن ءداستۇرلى ونەر تەاترى «الاتاۋ» كۇردەلى جوندەۋدەن وتۋدە.
الماتىنىڭ ورتالىقتاندىرىلعان كىتاپحانا جۇيەسىنىڭ 97% فيليالى جاڭعىرتۋدان ءوتتى: مۇندا وزدىگىنەن كىتاپ الۋ ستانسيالارى، سيفرلىق تەحنولوگيالار جانە ەرەكشە قاجەتتىلىكتەرى بار ادامدارعا ارنالعان وقۋ زالدارى اشىلدى.
2025 جىلدىڭ سوڭىنا دەيىن قالاداعى بەس اۋداندا مەكتەپتەر مەن تۇرعىن كەشەندەردىڭ جانىندا جاڭا زاماناۋي كىتاپحانالار اشىلادى.
«قازىرگى كىتاپحانا – بۇل جاي عانا كىتاپ سورەلەرى ەمەس، ول – قارىم-قاتىناس پەن ءوزىن-وزى دامىتۋعا ارنالعان ينتەللەكتۋالدى كەڭىستىك»، – دەپ اتاپ ءوتتى مادەنيەت باسقارماسىندا.
جىل سوڭىنا دەيىن Observatorium مۇراجايى اشىلىپ، «رايىمبەك باتىر» مۇراجاي كەشەنىنىڭ قۇرىلىسى اياقتالادى.
سونداي-اق، ساق مادەنيەتى ورتالىعىن، جاستار تەاترىن قۇرۋ جانە 2030 جىلعا دەيىن قالا بويىنشا 20 جاڭا كىتاپحانا اشۋ جوسپارلانىپ وتىر.