الماتىداعى رايىمبەك باتىر كەسەنەسى اۋماعىندا اباتتاندىرۋ مەن قۇرىلىس جۇمىستارى باستالدى. جوبا اياسىندا تاريحي نىساننىڭ اينالاسى جاڭارتىلىپ، وسى زامانعى مۋزەي كەشەنى سالىنادى. وڭىرلىك كوممۋنيكاسيالار قىزمەتى الاڭىندا وتكەن بريفينگتە قالا اكىمىنىڭ ورىنباسارى ازامات قالدىبەكوۆ وسىلاي دەپ حابارلادى.
ونىڭ ايتۋى بويىنشا، جوبانىڭ باستى ماقساتى – كەسەنە اۋماعىن كيەلى ءارى تارتىمدى مادەني ورتالىققا اينالدىرۋ، قالا تۇرعىندارى مەن قوناقتارىنا تاريحي تۇلعانىڭ ەرلىگىن دارىپتەيتىن جاڭا كەڭىستىك ۇسىنۋ.
«قۇرىلىس جۇمىستارى بارىسىندا كەسەنە ماڭى تولىق اباتتانىپ، ەكى جاڭا عيمارات سالىنادى. ونىڭ ءبىرى – ەكى قاباتتى مۋزەي عيماراتى. ءبىرىنشى قاباتتا مۋلتيمەديالىق ەكسپوزيسيالار ورنالاسسا، ەكىنشى قاباتتا قازاق باتىرلارىنا ارنالعان تاريحي زال اشىلادى. مۋزەي زاماندىق VR جانە AR تەحنولوگيالارىمەن جابدىقتالادى» - دەپ اتاپ ءوتتى سپيكەر.
مۋزەيلەندىرۋ جۇمىستارى 2026 جىلدىڭ اقپان ايىندا باستالىپ، مامىر ايىندا تولىق اياقتالادى دەپ جوسپارلانعان. بۇل جوبا الماتىنىڭ تاريحي جانە تۋريستىك الەۋەتىن ارتتىرۋعا، ۇلتتىق قۇندىلىقتاردى جاڭعىرتىپ، كەلۋشىلەرگە رايىمبەك باتىردىڭ ەرلىك رۋحىن جاڭا فورماتتا تانىستىرۋعا باعىتتالعان.