2025 جىلعى جەلتوقسان ايىنىڭ باسىنان باستاپ الماتىدا ءورت قاۋىپسىزدىگىن قامتاماسىز ەتۋگە باعىتتالعان اۋقىمدى ءىس-شارالار قولعا الىندى. قالالىق توتەنشە جاعدايلار دەپارتامەنتىنىڭ مالىمەتىنشە، ۋاقتىلى دايىندىق پەن تۇرعىنداردىڭ جاۋاپتىلىعىنىڭ ارقاسىندا جاڭاجىلدىق مەرەكەلەر بارىنشا تىنىش ءوتتى. وڭىرلىك كوممۋنيكاسيالار قىزمەتىندە الماتى قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆ وسىلاي دەپ حابارلادى.
تجد قىزمەتكەرلەرى كەزەكشىلىك ۇيىمداستىرىپ، بۇقارالىق ءىس-شارالار وتەتىن بارلىق الاڭدا ءورتتىڭ الدىن الاتىن تەكسەرۋ جۇرگىزدى. پوليسيا دەپارتامەنتىمەن بىرلەسىپ، پيروتەحنيكالىق ونىمدەردىڭ زاڭسىز اينالىمىن انىقتاپ، جولىن كەسۋگە باعىتتالعان «پيروتەحنيكا» جەدەل-پروفيلاكتيكالىق ءىس-شارالار جوسپارى جۇزەگە اسىرىلدى. 2025 جىلعى 5 جەلتوقسان مەن 2026 جىلعى 3 قاڭتار ارالىعىندا 180 رەيد وتكىزىلىپ، 1000 كەلىدەن استام سەرتيفيكاتتالماعان پيروتەحنيكا تاركىلەندى، 137 اكىمشىلىك حاتتاما تولتىرىلدى، سونداي-اق تۇرعىندارعا پيروتەحنيكانى ءقاۋىپسىز پايدالانۋ تۋرالى شامامەن 900 ۇگىت-ناسيحات ماتەريالى تاراتىپ شىقتى.
«ءورت قاۋىپسىزدىگىنىڭ ءبىرىڭعاي كۇنى» اكسياسى اياسىندا «اتامەكەن» ۇكپ بازاسىندا قالانىڭ ۇلكەن بازارلارى مەن ساۋدا-ويىن-ساۋىق ورتالىعىنىڭ وكىلدەرىمەن دوڭگەلەك ۇستەل ءوتتى. كاسىپكەرلەرگە ءورت قاۋىپسىزدىگىنىڭ تالابىن ءتۇسىندىرىپ، ونى بۇزعانداردىڭ جاۋاپقا تارتىلاتىنى ايتىلدى.
تۇرعىندار اراسىندا دا اۋقىمدى پروفيلاكتيكالىق جۇمىس جۇرگىزىلدى: مەديابوردتاردا، ساۋدا ۇيلەرىنىڭ LED-ەكراندارىندا، ەمحانالار مەن حقكو-لاردا اقپارات تاراتىلدى. مەكتەپ پەن بالاباقشالاردا بالالار قاۋىپسىزدىگىنە ارنالعان سىنىپ ساعاتتارى مەن ساباقتار ۇيىمداستىرىلدى. پيروتەحنيكا ساتۋشىلار دا ءونىمدى ءقاۋىپسىز ساتىپ، ساقتاۋدى ۇيرەتەتىن نۇسقاۋلىقتان ءوتتى.
الماتى تجد مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆتىڭ ايتۋىنشا، قىزمەتتەردىڭ بىرلەسكەن جۇمىسى مەن تۇرعىنداردىڭ سانالى ارەكەتىنىڭ ارقاسىندا جاڭا جىل ءتۇنى قالا اۋماعىندا بىردە-بىر ءورت تىركەلمەپتى. 31 جەلتوقسان مەن 5 قاڭتار ارالىعىندا التى ءورت شىققانىمەن، قازا تاپقان، جاراقات العاندار جوق، ءبىر ادام قۇتقارىلدى.
«قالانىڭ بارلىق قىزمەتى تىنباي جۇمىس ىستەپ، تۇرعىندار دا جاۋاپتى بولعاندىقتان مەرەكە وسى جولى تىنىش ءوتتى»، - دەيدى ەركەبۇلان جۇماتايەۆ.