الماتىدا جامبىل توباياقوۆ اتىنداعى زەرتحانا-دارىسحانا اشىلدى

اكادەميكتىڭ اتىندا الماتى قالاسىندا كوشە جانە الماتى وبلىسى كەربۇلاق اۋىلىندا مەكتەپ بار.

الماتى ەنەرگەتيكا جانە بايلانىس ۋنيۆەرسيتەتىندە بەلگىلى عالىم، پروفەسسور جامبىل توباياقوۆ اتىنداعى زەرتحانا-دارىسحانا اشىلدى، دەپ حابارلايدى Almaty-akshamy.kz.

20 جەلتوقساندا جاراتىلىستانۋ عىلىمدارى اكادەمياسىنىڭ اكادەميگى،  قازاقستان رەسپۋبليكاسىنىڭ جۋرناليستەر وداعىنىڭ مۇشەسى، قازاقستان رەسپۋبليكاسىنىڭ “قازاق ءتىلى” قوعامىنىڭ باسقارما مۇشەسى، عىلىمي-ۇستاز، پروفەسسور توباياقوۆ جامبىل وشاقباي ۇلى اتىنداعى زەرتحانالىق ءدارىسحانانىڭ اشىلۋ سالتاناتى ءوتتى.

عالىم-پروفەسسور جامبىل توباياقوۆ 1975 جىلى  الماتىدا ەنەرگەتيكا ينستيتۋتىندا فيزيكا فاكۋلتەتىنىڭ نەگىزىن قالاپ، ونى 10 جىل بويى باسقارعان. 1994 جىلدان باستاپ ءومىرىنىڭ سوڭىنا دەيىن وسى جوو-نىڭ رەكتورىنىڭ تاربيە ءىسى جونىندەگى پرورەكتورى قىزمەتىن اتقاردى. ول پەداگوگ رەتىندە فيزيكا جانە ەنەرگەتيكا سالاسىنداعى كوپتەگەن ءىزباسار تاربيەلەپ، عىلىم سالاسىنىڭ وركەندەۋىنە ۇلەس قوستى. ءومىرىن عىلىمعا ارناعان عالىمنىڭ 100-دەن استام عىلىمي ەڭبەگى، ونداعان كىتابى، مونوگرافياسى، سوزدىگى بار. اكادەميكتىڭ اتىندا الماتى قالاسىندا كوشە جانە الماتى وبلىسى كەربۇلاق اۋىلىندا مەكتەپ بار.

بيىل ءوزى ەڭبەك ەتكەن الماتى ەنەرگەتيكا جانە بايلانىس ۋنيۆەرسيتەتىندە اشىلعان زەرتحانا-دارىسحانا سوڭعى تەحنولوگيالارمەن، جامبىل وشاقباي ۇلىنىڭ ءومىرى مەن قىزمەتىنەن حابار بەرەتىن ستەندتەرمەن جابدىقتالعان.

اتالمىش شارانى عارىشتىق ينجەنەريا كافەدراسى، تەلەكوممۋنيكاسيا جانە عارىشتىق ينجەنەريا ينستيتۋتى ۇيىمداستىرعان.