الماتى قالاسىنىڭ پوليسەيلەرى ق ر ءىىم كيبەرقىلمىسقا قارسى كۇرەس دەپارتامەنتى مەن قالالىق پروكۋراتۋرانىڭ قولداۋىمەن ينتەرنەت-الاياقتىقپەن اينالىسقان ەكى كەڭسەنىڭ ارەكەتىن اشكەرەلەدى.
جەدەل-ىزدەستىرۋ شارالارى بارىسىندا شەتەلدىك ازامات باسشىلىق ەتكەن Call-ورتالىق انىقتالدى، دەپ حابارلايدى aqshamnews.kz Polisia.kz-كە سىلتەمە جاساپ.
الاياقتار وڭتۇستىك ازيا ەلدەرىندەگى بانك شوتتارىندا بۇعاتتالعان دەپوزيتتەردەگى قاراجاتتى شەشىپ الۋعا كومەكتەسەمىز دەگەن جالعان ۋادە بەرىپ، ازاماتتاردى الداعان.
— Call-ورتالىق قىزمەتكەرلەرىنىڭ نەگىزگى مىندەتى – كۋراتورلاردىڭ نۇسقاۋىمەن دروپ-شوتتارعا تۇسكەن قاراجاتتى باقىلاۋ جانە ولاردى باسقا شوتتارعا اۋدارۋ بولدى. بۇل قاراجات ءارتۇرلى تولەم جۇيەلەرى ارقىلى تاراتىلىپ وتىرعان. سونداي-اق كەڭسەلەردى ءتىنتۋ كەزىندە اقشالاي وپەراسيالاردى وڭدەۋ ماقساتىندا قولدانىلعان 100-دەن استام جۇيەلىك بلوك تاركىلەندى. الماتى حالىقارالىق اۋەجايىندا وسى قىلمىستىق ىسكە قاتىسى بار تاعى ءبىر ادام ەلدەن قاشپاق بولعان ساتىندە ۇستالدى، — دەپ مالىمدەدى الماتى قالالىق پد كيبەرقىلمىسقا قارسى كۇرەس باسقارماسىنىڭ باستىعى انەس قالدىبايەۆ.
تەرگەۋ بارىسىندا كەڭسە قىزمەتكەرلەرىنىڭ بۇل جۇمىستى ينتەرنەت ارقىلى تاپقانى بەلگىلى بولدى. ولاردى سۇحباتتاسۋ كەزەڭىنەن باستاپ وقىتۋعا دەيىن كەڭسە مەڭگەرۋشىلەرى ۇيىمداستىرعان. جاڭا قىزمەتكەرلەرگە تاپسىرمالار بەرىلىپ، ولاردىڭ نەگىزگى مىندەتى – P2P-تولەمدەرىنە بايلانىستى قاراجات اۋدارىمدارىن وڭدەۋ ەكەنى تۇسىندىرىلگەن. قىزمەتكەرلەرگە جەكە ۇيالى تەلەفون پايدالانۋعا تىيىم سالىنعان جانە قۇپيالىلىق قاتاڭ ساقتالعان. قازىرگى تاڭدا تەرگەۋ امالدارى جالعاسۋدا. ءۇش ادام قاماۋعا الىنىپ، تاعى 26 كۇدىكتىگە قاتىستى تەرگەۋ جۇرگىزىلىپ جاتىر.