قالا كۇنى قارساڭىندا مەگاپوليستە حالىقارالىق InterContinental Hotels Group قوناق ءۇي جەلىسىنىڭ وتەلى اشىلدى، دەپ حابارلايدى almaty-akshamy.kz
ءۇش جۇلدىزدى Holiday Inn Express قوناق ءۇيى مەيماندارعا جوعارى دەڭگەيدەگى قىزمەت كورسەتۋدى، جايلى ورىندى جانە جەكە پايىمدى ۇسىنادى. مۇمكىندىگى شەكتەۋلى ادامدارعا ارنالعان بولمەلەر دە قاراستىرىلعان. بولمەلەردىڭ قىزمەت كورسەتۋ ساپاسى مەن جايلىلىعى IHG ستاندارتتارىنا ساي.
الماتى اكىمى باقىتجان ساعىنتايەۆ نىساننىڭ اشىلۋى قالانىڭ تۋريستىك ينفراقۇرىلىمىنىڭ دامۋىنا وڭ اسەر ەتەتىنىن اتاپ ءوتتى. بۇل جوبا مەگاپوليستەگى نومىرلىك قوردى 184 نومىرگە ارتتىرۋعا مۇمكىندىك بەرەدى.
ەسكە سالساق، الماتى – ەلگە كەلەتىن تۋريستەر سانى بويىنشا قازاقستاندىق باسقا قالالاردىڭ اراسىندا كوشباسشى. تەك وسى جىلدىڭ العاشقى ەكى توقسانىندا قالاعا جارتى ميلليوننان استام تۋريست كەلدى.
كەزدەسۋلەر، ىسكەرلىك كونفەرەنسيالار وتكىزۋ ءۇشىن قوناق ۇيدە جالپى الاڭى 99 شارشى مەتر بولاتىن 3 كونفەرەنس-زال بار. وتەل قالانىڭ ورتالىق بولىگىندە ورنالاسقان، مەترو ستانسيالارى، سوسو جانە ساياباق ايماقتارى قولجەتىمدى. جوباعا 4،3 ملرد تەڭگەدەن استام ينۆەستيسيا تارتىلىپ، 50 جۇمىس ورنى قۇرىلدى.
