رەسەي فەدەراسياسىنىڭ ياروسلاۆل قالاسىندا لەونيد سوبينوۆ اتىنداعى ەكىنشى حالىقارالىق ۆوكال بايقاۋى (Sobinov International Vocal Competition) ءوتتى.
وسى بايقاۋدا اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ جەتەكشى ءسوليسى دامير ءسادۋاقاسوۆ ءۇشىنشى ورىن الدى، دەپ حابارلايدى Almaty-akshamy.kz ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.
ياروسلاۆل قالاسىنىڭ فيلارمونياسى ۇيىمداستىرعان بايقاۋعا ۆلاديمير چەرنوۆ (قازىلار القاسىنىڭ ءتوراعاسى، رەسەي-اقش)، نەللي ميريچويۋ (ۇلىبريتانيا)، رۋبەن ليسيسيان، ولگا كاپانينا (رەسەي ۇلكەن تەاترى وپەرا ترۋپپاسىنىڭ كاستينگ-ديرەكتورى) جانە «TACT Management» اگەنتتىگىنىڭ ارت مەنەدجەرى الەكس گريگوريەۆ (نيدەرلاندى) قازىلىق ەتتى.
12 ۇمىتكەر وركەستردىڭ سۇيەمەلدەۋىمەن ەكى اريا ورىندادى (ورىسشا جانە شەت تىلىندە). وسىدان كەيىن قازىلار القاسى كەڭەسىپ، ۇزدىكتەردى انىقتادى.