قۇقىقتىق كەڭەس بەرۋ – ازاماتتاردىڭ ساۋاتىن ارتتىرىپ، مەملەكەتتىك قىزمەتتەردى الۋ ءتارتىبىن تەرەڭىرەك تۇسىنۋگە جول اشادى. وسى ماقساتتا بۇگىن، 30 مامىردا الماتى قالاسىنىڭ ادىلەت دەپارتامەنتى اكىمدىكپەن بىرلەسىپ، «حالىق زاڭگەرى» اكسياسىن وتكىزىپ جاتىر، - دەپ حابارلايدى aqshamnews.kz ءتىلشىسى.
بۇل اكسيا – حالىق پەن مەملەكەتتىك ورگاندار اراسىنداعى بايلانىس پەن سەنىمدى نىعايتاتىن ءتيىمدى الاڭ. ءىس-شارا اياسىندا تاجىريبەلى زاڭگەرلەر مەن ادۆوكاتتار، ادىلەت دەپارتامەنتىنىڭ ماماندارى تۇرعىنداردى تولعاندىرعان ساۋالدارعا جاۋاپ بەرىپ، باعىت-باعدار كورسەتەدى.
الماتى قالاسى ادىلەت دەپارتامەنتىنىڭ رەسمي وكىلى شىنار ماقسات قىزىنىڭ ايتۋىنشا، بۇل اكسيا ەلىمىزدە جىل سايىن ءداستۇرلى تۇردە وتكىزىلىپ كەلەدى. ال بيىل الماتى قالاسىندا ۇيىمداستىرىلعان شارانىڭ اۋقىمى بۇرىنعىدان الدە قايدا كەڭىرەك. اكسيا ءۇش بىردەي جوعارى وقۋ ورنىندا – اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە، د.قونايەۆ اتىنداعى جانە كاسپيي ۋنيۆەرسيتەتتەرىندە وتەدى. اباي ۋنيۆەرسيتەتىندە تاڭعى ساعات 10:00-دەن 13:00-گە دەيىن وتسە، قونايەۆ جانە كاسپيي ۋنيۆەرسيتەتتەرىندە كەشكى ساعات 17:00-دە باستالادى.
اباي ۋنيۆەرسيتەتىندە وتكەن ءىس-شاراعا الماتى قالاسىنىڭ پروكۋراتۋراسى، جەكە سوت ورىنداۋشىلارى، ادۆوكاتتار، ادىلەت دەپارتامەنتىنىڭ باس ماماندارى، ميگراسيالىق قىزمەت، سونداي-اق قالالىق باسقارمالار مەن اۋداندىق اكىمدىكتەردىڭ وكىلدەرى قاتىستى. بارلىعى 40-قا جۋىق مامان تۇرعىندارعا تەگىن زاڭدى كەڭەس بەرىپ، قۇقىقتىق كومەك كورسەتتى.
«تۇسكە دەيىنگى ۋاقىتتىڭ وزىندە 50-استام تۇرعىن ءارتۇرلى ماسەلەلەر بويىنشا زاڭگەرلەردەن كەڭەس الدى. ءجيى قويىلعان سۇراقتار – الەۋمەتتىك قامتاماسىز ەتۋ، مۇگەدەكتىك الۋ ءتارتىبى، اليمەنت ءوندىرۋ، جەكە سوت ورىنداۋشىلارىنا قاتىستى، شوتتاردىڭ بۇعاتتالۋىنا بايلانىستى جانە جەر قاتىناستارى توڭىرەگىندە بولدى»، – دەدى شىنار ماقسات قىزى.
اكسيا كەزىندە تۇرعىندارعا قۇقىقتىق باعىت-باعدار بەرىلىپ، ءارى قاراي ماسەلەنى شەشۋ ءۇشىن ءتيىستى مەملەكەتتىك ورگاندارعا نەمەسە اۋداندىق اكىمدىكتەرگە جۇگىنۋ قاجەتىگى ءتۇسىندىرىلدى.
كەلەسى اكسيالار وتەتىن ەكى ۋنيۆەرسيتەتكە دە ماماندار جىبەرىلىپ، تۇرعىندارعا مەملەكەتتىك قىزمەتتىڭ بارلىق باعىتى بويىنشا كەڭەس بەرىلەدى. بۇعان دەيىن اكسيا وتەتىنى جونىندە اقپاراتتاندىرۋ شارالارى الەۋمەتتىك جەلىلەر، مەملەكەتتىك ورگانداردىڭ رەسمي سايتتارى ارقىلى الدىن الا جۇرگىزىلگەن بولاتىن.
ايتا كەتەتىن جايت، «حالىق زاڭگەرى» – ەل كولەمىندە ءوتىپ جاتقان كەڭ اۋقىمدى رەسپۋبليكالىق اكسيا. الماتى قالاسىنداعى ءىس-شارا ءبىر كۇنگە جوسپارلانعان.