ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە مەتامودەرنيست سۋرەتشى گاۋحار بيسەنعالييەۆانىڭ «ۇلى دالا مۇراسى» اتتى جەكە كورمەسى اشىلدى، دەپ حابارلايدى aqshamnews.kz.
كورمەدە سۋرەتشىنىڭ كيىز بەن تابيعي ماتەريالداردان جاسالعان بىرەگەي جۇمىستارى، اجەسىنەن مۇرا بولىپ قالعان جۇنمەن جۇمىس ىستەۋگە ارنالعان قۇرالدارى، سونداي-اق ءداستۇرلى قولونەرمەن اينالىسقان قازاق شەبەرلەرىنىڭ مۇراعات فوتوسۋرەتتەرى ۇسىنىلعان.
سۋرەتشىنىڭ شىعارماشىلىعىندا اتا-بابالاردىڭ سالت-داستۇرىمەن بايلانىسىن تەرەڭدەتە تۇسەتىن مادەني مۇرا مەن رۋحاني كۇشتىڭ سيمۆولى – ۇلتتىق قازاق كىلەمى باستى ورىن الادى. گاۋحار بيسەنعالييەۆا كيىز ونەرىندەگى جاڭاشىلدىعىمەن تانىلىپ، وسى كونە ماتەريالدى ۇلى دالانىڭ مول مۇراسىن كورسەتۋ ءۇشىن پايدالانادى. ونىڭ كەنەپتەرىندەگى دەرەكسىز موتيۆتەر تاڭىرشىلدىك يدەيالارىن جانە اتا-بابالاردىڭ دۇنيەتانىمىن بەينەلەيتىن ماڭگىلىك اسپان ۇعىمىنا سىلتەمە جاسايدى.
ەكسپوزيسيا 2024 جىلدىڭ 24 قاراشاسىنا دەيىن جالعاسادى.