الماتىدا ن.داۋلەتوۆا اتىنداعى ق ر ۇلتتىق كىتاپحاناسىنىڭ زالىندا بەلگىلى مادەنيەت قايراتكەرى، فيلوسوفيا عىلىمدارىنىڭ كانديداتى، «شالقار» راديوسىنىڭ باس رەداكتورى بولاتبەك تولەپبەرگەننىڭ جاڭا كىتاپتارىنىڭ تۇساۋكەسەرى ءوتتى.
ءىس-شاراعا زيالى قاۋىم وكىلدەرى، جۋرناليستەر، جازۋشىلار جانە وقىرماندار جينالدى، دەپ حابارلايدى aqshamnews.kz.
پرەزەنتاسيادا بولاتبەك تولەپبەرگەننىڭ بيىل جارىق كورگەن بەس جاڭا كىتابى تانىستىرىلدى. سونىڭ ىشىندە «الاڭ جۇرت» اتتى دەرەكتى حيكاياتى ەرەكشە قىزىعۋشىلىق تۋعىزدى. بۇل شىعارمادا 1970 جىلدارى كەڭەس جۇيەسى تاراپىنان ادىلەتسىز ايىپتاۋعا ۇشىراعان ديسسيدەنت ازامات جاكيبايەۆتىڭ ءومىرى سۋرەتتەلگەن. اۆتور تاريحي تاقىرىپتى كوركەم تىلمەن جەتكىزە وتىرىپ، وقىرمانعا وي سالارلىق تىڭ تۋىندى ۇسىنعان.
سونىمەن قاتار، بولاتبەك تولەپبەرگەننىڭ «ۇلتتىق يدەيا – ۇلتتىق مەديانىڭ تۇعىرى» اتتى مونوگرافياسى كوپشىلىكتىڭ نازارىنا ۇسىنىلدى. بۇل ەڭبەكتە قازاق ۇلتتىق يدەياسىنىڭ قالىپتاسۋى مەن دامۋى مەديا سالاسىنىڭ نەگىزگى تىرەگى رەتىندە تالدانعان. اۆتور ۇلتتىق سانانىڭ ماڭىزدىلىعىن اتاپ ءوتىپ، ۇلتتىق يدەيانىڭ ءرولىن ايقىنداي ءتۇسۋدى ماقسات ەتكەن.
تۇساۋكەسەردە كوپشىلىك نازارىنا ۇسىنىلعان تاعى ءبىر ەڭبەك – «تۇراقتى دامۋ ماقساتتارى اياسىنداعى جۋرناليستيكا جانە باسپا ءىسى: ءداستۇر مەن جاڭاشىلدىق» اتتى كونفەرەنسيا ماتەريالدارى بولدى. بۇل جيناق اۆتوردىڭ 50 جىلدىق مەرەيتويىنا وراي ۇيىمداستىرىلعان عىلىمي-تاجىريبەلىك كونفەرەنسيا ماتەريالدارىن قامتىعان.
سونداي-اق، «ۇلتتىق مەديا – ۇلتتىق قاۋىپسىزدىك» اتتى پۋبليسيستيكالىق كىتاپ تانىستىرىلدى. مۇندا قازاق ءباسپاسوزىنىڭ الاش كەزەڭىنەن باستاپ بۇگىنگى كۇنگە دەيىنگى تاريحى مەن دامۋ جولى قاراستىرىلىپ، تاۋەلسىزدىك كەزەڭىندەگى قوعامدىق-ساياسي وقيعالاردىڭ مەدياعا ىقپالى تالدانعان.
كىتاپ كورمەسىندە «بولاتبەك تولەپبەرگەن: بيبليوگرافيالىق كورسەتكىشى» اتتى ەڭبەگى دە وقىرمانعا ۇسىنىلدى. بۇل جيناقتا اۆتوردىڭ بۇگىنگە دەيىنگى جارىق كورگەن ەڭبەكتەرى حرونولوگيالىق تارتىپتە جۇيەلەنگەن. كورسەتكىشتىڭ العى ءسوزىن تاريح عىلىمدارىنىڭ دوكتورى، پروفەسسور مامبەت قويگەلدييەۆ جازىپ، اۆتوردىڭ شىعارماشىلىعى مەن عىلىمعا قوسقان ۇلەسىن اتاپ وتكەن.
پرەزەنتاسيادا بولاتبەك تولەپبەرگەن ءوزىنىڭ ەڭبەكتەرىنىڭ باستى ماقساتىن، ۇلتتىق قۇندىلىقتار مەن مادەنيەتتى قولداۋعا باعىتتالعانىن اتاپ ءوتتى. جينالعان قاۋىم اۆتوردىڭ شىعارماشىلىعى مەن ونىڭ مادەنيەتكە، ۇلتتىق ساناعا قوسقان ۇلەسىن جوعارى باعالادى.