الاياقتار قازاقستاندىقتاردىڭ جەكە دەرەكتەرى مەن اقشالاي قاراجاتىن يەمدەنۋ ءۇشىن وزدەرىن كۋرەر، دارىگەر، ءتۇرلى قىزمەتتەردىڭ قىزمەتكەرلەرى دەپ تانىستىراتىن جاعدايلار جيىلەپ كەتتى.
Polisia.kz سايتى الاياقتىق سحەما تۋرالى ەسكەرتۋ جاساۋدا، دەپ حابارلايدى aqshamnews.kz Stopfake.kz-كە سىلتەمە جاساپ.
«ەڭ كەڭ تارالعان الاياقتىق ادىستەردىڭ ءبىرى – ازاماتتارعا پوشتا قىزمەتىنىڭ كۋرەرلەرى، مەديسينالىق مەكەمەلەردىڭ دارىگەرلەرى نەمەسە ەنەرگەتيكالىق كومپانيا قىزمەتكەرلەرىنىڭ اتىنان قوڭىراۋ شالۋ. سونداي-اق، باسقا دا ءتۇرلى مەكەمەلەردىڭ قىزمەتكەرلەرى رەتىندە كورىنىپ، ادامدارعا شۇعىل شەشىم قابىلداۋ قاجەتتىلىگىن ۇعىندىرۋ ارقىلى الداۋدى ماقسات ەتەدى. مۇنداي جاعدايلاردا الاياقتار قىزمەت كورسەتۋ پروسەسىن راستاۋ ءۇشىن ازاماتتان 1414 نومىرىنەن كەلگەن SMS حابارلامانىڭ كودىن جازىپ جىبەرۋدى سۇرايدى. الايدا بۇل كود ءىس جۇزىندە جابىرلەنۋشىنىڭ بانكتىك شوتىنا قول جەتكىزۋ ءۇشىن قارجىلىق وپەراسيالاردى راستاۋعا ارنالعان.
كەلەسى كەزەڭدە جابىرلەنۋشىگە «بانكتىڭ قاۋىپسىزدىك قىزمەتكەرلەرى» حابارلاسىپ، بىرەۋدىڭ ونىڭ اتىنا نەسيە راسىمدەۋگە تىرىسىپ جاتقانىن ايتادى. ءوز قاراجاتىن قورعاۋ ءۇشىن الاياقتار «ءقاۋىپسىز» ءادىس رەتىندە جابىرلەنۋشىگە نەسيەنى ءوزى راسىمدەۋدى جانە اقشانى ارنايى «ءقاۋىپسىز» شوتقا اۋدارۋدى ۇسىنادى. ناتيجەسىندە، جابىرلەنۋشى الاياقتاردىڭ الدىن الا بەلگىسىز شوتتارىنا قاراجات اۋدارۋعا يتەرمەلەنىپ، ۇلكەن قارجىلىق شىعىنعا ۇشىرايدى»، – دەيدى پاۆلودار وبلىسى پوليسيا دەپارتامەنتى كيبەرقىلمىسپەن كۇرەس ءبولىمىنىڭ باستىعى ريزابەك جانات.
پوليسيا ازاماتتاردى قىراعىلىق تانىتۋعا شاقىرادى: جەكە مالىمەتتەردى بوتەندەرگە بەرمەڭىز، SMS ارقىلى كەلگەن كودتاردى ەشكىمگە حابارلاماڭىز، كۇماندى ادامدارمەن سويلەسۋدەن اۋلاق بولىڭىز جانە كەز كەلگەن كۇدىك تۋىنداعان جاعدايدا دەرەۋ بانككە نەمەسە قۇقىق قورعاۋ ورگاندارىنا حابارلاسىڭىز.
«ەسىڭىزدە بولسىن، بانكتەر مەن رەسمي مەكەمەلەردىڭ قىزمەتكەرلەرى سىزدەن ەشقاشان كىرۋ كودتارىن تالاپ ەتپەيدى جانە شۇعىل تۇردە ارەكەت ەتۋىڭىزدى سۇرامايدى»، – دەيدى ءتارتىپ ساقشىلارى.