كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا ەلىمىزدىڭ وڭتۇستىك وڭىرىندە العاش رەت Farapulse Ablation ەڭ سوڭعى تەحنولوگياسى بويىنشا جۇرەككە بىرەگەي وتا جاسالدى.
بۇل وقيعا اريتميانى ەمدەۋدە جاڭا ءداۋىردى اشادى جانە الماتىنىڭ يننوۆاسيالىق مەديسيناداعى كوشباسشى رەتىندەگى ۇستانىمىن نىعايتىپ، ەلدەگى جوعارى تەحنولوگيالىق مەديسينانى دامىتۋداعى ماڭىزدى قادام بولماق جانە قازاقستاننىڭ ەمدەۋدىڭ ەڭ زاماناۋي جانە ءقاۋىپسىز ادىستەرىن ەنگىزۋگە دايىندىعىن دالەلدەيدى.
وپەراسيالاردى زاگرەب ۋنيۆەرسيتەتتىك كلينيكاسىنىڭ (حورۆاتيا) جەتەكشى مامانى ۆەدران ۆەلاگيچتىڭ قاتىسۋىمەن ينستيتۋتتىڭ ينتەرۆەنسيالىق اريتمولوگتارى جاسادى.
"الماتىدا Farapulse Ablation كومەگىمەن وپەراسيا جاساۋ ۇلكەن جەتىستىك. بۇل ءبىزدىڭ دارىگەرلەرگە الەمدىك وزىق جەتىستىكتەردى پايدالانۋعا، ەمدەۋ ساپاسىن ارتتىرۋعا جانە اريتميادان زارداپ شەگەتىن ناۋقاستارعا ءۇمىت سىيلاۋعا مۇمكىندىك بەرەدى"، - دەيدى باسقارما ءتوراعاسى رۇستەم تولەۋتايەۆ.
اريتمولوگيالىق قىزمەتتىڭ اعا ورديناتورى اسىلحان پاريمبەكوۆتىڭ ايتۋىنشا، Farapulse Ablation - جۇرەك ىرعاعىنىڭ ءجيى كەزدەسەتىن بۇزىلىستارىنىڭ ءبىرى بولىپ تابىلاتىن جۇرەكشەلەر فيبريللياسياسىن ەمدەۋدىڭ ريەۆوليۋسيالىق ءادىسى. راديوجيىلىكتى نەمەسە كريوابلياسيانى قولداناتىن ءداستۇرلى ادىستەردەن ايىرماشىلىعى، Farapulse تەحنولوگياسى قىسقا، جوعارى ەنەرگيالى ەلەكتر ءورىسىنىڭ يمپۋلستارىن پايدالانادى.
"بۇل يمپۋلستار ناقتى دالدىكپەن ارەكەت ەتىپ، اريتميانى تۋدىراتىن اۋرۋ جۇرەك جاسۋشالارىن عانا جويادى. قورشاعان تىندەر، سونىڭ ىشىندە نەرۆتەر مەن وڭەش زاقىمدانبايدى. بۇل ءتاسىل پروسەدۋرانى ءقاۋىپسىز، جىلدام جانە تيىمدىرەك ەتەدى، وپەراسيا ۋاقىتىن قىسقارتادى جانە ناۋقاستاردىڭ ساۋىعۋىن تەزدەتەدى"، - دەيدى دارىگەر.
جۇرەكشەلەردىڭ فيبريللياسياسى - جۇرەكشەلەردىڭ جىلدام جانە تۇراقتى ەمەس جيىرىلۋىمەن كورىنەتىن ەڭ كوپ تارالعان اۋرۋلاردىڭ ءبىرى. ونىڭ ەڭ ءقاۋىپتى سالدارى - ينسۋلتكە اكەلەتىن قان ۇيىعىشتارىنىڭ پايدا بولۋى. اۋرۋدىڭ جيىلىگى جاس ۇلعايعان سايىن ارتادى – كەيبىر مالىمەتتەر بويىنشا 50 جاستا 1%-عا دەيىن، 65 جاستا 6%-عا دەيىن، 80 جاستا 6-15%-عا دەيىن. بۇل ينسۋلت ءقاۋپىن 4 ەسەگە، كەنەتتەن قايتىس بولۋ ءقاۋپىن 2 ەسەگە دەيىن ارتتىرادى.
العاشقى ناۋقاستاردىڭ ءبىرى 56 جاستاعى ايەل جۇرەكشەلەردىڭ پاروكسيزمالدى فيبريللياسياسى، تاحي-برادي نۇسقاسى، اۋىر اسقىنۋ ءقاۋپى وتە جوعارى اۋىر گيپەرتەنزيادان زارداپ شەككەن. كلينيكاعا تۇسكەن كەزدە جالپى السىزدىك، فيزيكالىق جۇكتەمە كەزىندەگى (2-قاباتقا كوتەرىلگەندە) ەنتىگۋ، 2-3 ساعاتقا دەيىن سوزىلاتىن جىلدام ىرعاقتى جۇرەك سوعۋ ۇستامالارى مازالاعان.
تاعى ءبىر ناۋقاس، 68 جاستا، جۇرەكشەلەردىڭ پاروكسيزمالدى فيبريللياسياسى، تاحيستوليكالىق نۇسقا، جۇرەكتىڭ يشەميالىق اۋرۋى، ستەنوكارديا، 2022 جىلى ميوكارد ينفاركتىنە شالدىققان، ارتەريالىق گيپەرتەنزيا، شىعارىلىم فراكسياسى 34%-عا تومەندەگەن جۇرەكتىڭ سوزىلمالى جەتكىلىكسىزدىگى بولعان. سوڭعى 3 جىلدا وعان ستەنت قويىلعان، ماممارو جانە اورتاكورونارلىق شۋنتتاۋ جاسالعان، كارديوۆەرتەر دەفيبريللياتورى يمپلانتاسيالانعان. ونىڭ دا وسىنداي شاعىمدارى بولعان.
2 كۇن ىشىندە 10 وپەراسيا جاساۋ جوسپارلانۋدا. وتالار ءمامس اياسىندا تەگىن جاسالادى.