*مۇگەدەكتىگى بار ادامداردىڭ ۇيىمى كورپوراتيۆتىك تابىس سالىعىنان بوساتىلادى*
قىزمەتكەرلەرىنىڭ باسىم بولىگىن مۇگەدەكتىگى بار ادامدار قۇرايتىن ۇيىمدار كورپوراتيۆتىك تابىس سالىعى (كتس) بويىنشا جەڭىلدىكتەرگە يە بولادى. «ەگەر مۇگەدەكتىگى بار قىزمەتكەرلەر سانى 10 ادامنان اسسا، ۇيىم كورپوراتيۆتىك تابىس سالىعىن تولەۋدەن تولىق بوساتىلادى»، – دەپ مالىمدەدى الماتى قالاسى بويىنشا مەملەكەتتىك كىرىستەر دەپارتامەنتىنىڭ كامەرالدىق باقىلاۋ باسقارماسى كامەرالدىق مونيتورينگ ءبولىمىنىڭ باسشىسى دانيار تالعات وڭىرلىك كوممۋنيكاسيالار قىزمەتىندە.
ۇيىمدى مۇگەدەكتىگى بار ادامداردىڭ ۇيىمى دەپ تانۋ ءۇشىن قاجەتتى شارت:
– مۇگەدەكتىگى بار قىزمەتكەرلەردىڭ ورتاشا جىلدىق سانى جالپى قىزمەتكەرلەر سانىنىڭ كەمىندە 51%-ىن قۇراۋى كەرەك؛
– ولارعا تولەنەتىن ەڭبەكاقى شىعىنى جالپى ەڭبەك شىعىنىنىڭ كەمىندە 51%-ىن قۇراۋى ءتيىس؛
- تابىستىڭ كەمىندە 90 پايىزى سولاردىڭ ارالاسۋىمەن تاۋار ساتىپ، قىزمەت ساتۋدان ءتۇسۋى كەرەك.
سونداي-اق، بۇل تابىس ۇيىمنىڭ ءوز قىزمەتىنە باعىتتالۋى قاجەت جانە مۇگەدەكتىگى بار قىزمەتكەرلەر باسقا وسىنداي تيپتەگى ۇيىمدارمەن ءبىر مەزگىلدە ەڭبەك قاتىناسىندا بولماۋى ءتيىس.
مۇنداي ۇيىمدارعا ەكى دەڭگەيلى سالىق جەڭىلدىگى كوزدەلگەن:
– ەگەر شتاتتاعى مۇگەدەكتىگى بار قىزمەتكەرلەر سانى 3-تەن 10 ادامعا دەيىن بولسا، ەسەپتەلگەن كتس سوماسى 50%-عا ازايتىلادى؛
– ال ەگەر قىزمەتكەرلەر سانى 10 ادامنان اسسا – كتس تولىقتاي جويىلادى.
مەملەكەت وسىلايشا مۇگەدەكتىگى بار ادامدار ءۇشىن تۇراقتى جۇمىس ورىندارىن قۇرۋعا جاعداي جاساپ، ولاردى بەلسەندى تۇردە جۇمىسقا تارتۋعا ىنتالاندىرىپ وتىر.
مۇنداي ءىس-شارالار سالىقتىق جۇكتەمەنى ازايتىپ قانا قويماي، سونىمەن قاتار جۇمىسقا ورنالاسۋ مۇمكىندىگىن ارتتىرۋعا دا سەپ بولادى. ينكليۋزيۆتى كاسىپورىنداردىڭ قۇرىلۋى ەكونوميكانىڭ باسەكەگە قابىلەتتىلىگىن ارتتىرىپ، الەۋمەتتىك باعىتتاعى بيزنەس-ورتا دا قالىپتاستىرادى. مۇنداي ورتادا ۇيىمدار مەملەكەتتىك قولداۋعا يە بولىپ، مۇگەدەكتىگى بار ادامدار كاسىبي تۇرعىدا ءوزىن-وزى شىڭداۋعا قوسىمشا مۇمكىندىك الادى، – دەپ اتاپ ءوتتى دانيار تالعات.