الماتىدا ەكى ءجۇز كەلىدەن اسا زاڭسىز پيروتەحنيكا تاركىلەندى

رەيدتەر جۇرگىزۋ بارىسىندا ەكى كۇننىڭ ىشىندە الماتىدا  200 كگ ارتىق ءقاۋىپتى پيروتەحنيكا  تاركىلەندى

الماتىدا 25 جەلتوقساننان باستاپ توتەنشە جاعدايلار دەپارتامەنتى مەن پوليسيا قىزمەتكەرلەرى پيروتەحنيكالىق بۇيىمدار ساتىلاتىن ورىنداردا رەيد جۇرگىزىپ جاتىر، دەپ حابارلايدى Almaty-akshamy.kz.

الماتى قالالىق توتەنشە جاعدايلار دەپارتامەنتىنىڭ باسپا ءسوز قىزمەتى حابارلاعانداي، پيروتەحنيكالىق بۇيىمداردى وتكىزۋ قاعيدالارىن بۇزعان 23 ادامعا اكىمشىلىك شارا قابىلداندى. ق ر زاڭناماسىنىڭ تالاپتارىنا ساي كەلمەيتىن 262 جيىنتىق (200 كگ استام) پيروتەحنيكالىق بۇيىم تاركىلەندى.

«الماتى قالاسىندا جىل سايىن جاڭا جىل مەرەكەسىندە 10-نان 15-كە دەيىن ءورت بولادى. ونىڭ 18 پايىزى پيروتەحنيكالىق بۇيىمداردان. وسىنداي وقيعالاردان كەيىن وتكەن جىلى مەديسينالىق مەكەمەلەرگە 39 ادام، ونىڭ ىشىندە 29 بالا جۇگىنگەن. اۋرۋحاناعا جاتقىزىلعاندار – 8 ادام، ونىڭ ىشىندە 7 بالا بار»، - دەپ اتاپ ءوتتى تجد باسپا ءسوز قىزمەتى.

ماماندار قالا تۇرعىندارى مەن قوناقتارىنا پيروتەحنيكالىق ونىمدەردى قولدانۋ كەزىندەگى ساقتىق شارالارىن ەسكەرتتى:

- پيروتەحنيكالىق بۇيىمداردى ساتىپ العاندا، ورامىنىڭ تۇتاستىعىنا جانە ونىڭ جارامدىلىق مەرزىمىنە نازار اۋدارىڭىز؛

- 14 جاسقا دەيىنگى بالالارعا پيروتەحنيكانى ءوز بەتىمەن قولدانۋعا جول بەرمەڭىز؛

- پيروتەحنيكانى قولدانۋ كەزىندە ونى وزىڭىزدەن الىستاۋ ۇستاڭىز؛

- ءقاۋىپتى ايماق راديۋسىندا (50 مەتر) پيروتەحنيكانى ۇشىرۋعا ەشقانداي كەدەرگى (اعاش شوقتارى، سىزىقتار، وتشاشۋلار باعىتىن وزگەرتە الاتىن ەلەكتر جەلىلەرى) جوق ەكەنىنە كوز جەتكىزىڭىز؛

- پيروتەحنيكانى قاتتى جەلدە قولدانباڭىز؛

- پيروتەحنيكالىق ءونىم جارامسىز بولعان جاعدايدا، ەكىنشى قايتارا قولدانباڭىز؛

- راكەتا مەن وتشاشۋدى ادامدارعا قاراي باعىتتاماڭىز جانە اياقتارىنىڭ استىنا لاقتىرماڭىز.