الماتىدا ەكى جاڭا مەكتەپ اشىلدى

 قالادا ەكى مەكتەپ اشىلدى. 

الماتى قالاسى الاتاۋ اۋدانىنىڭ «بوتاكوز-2» ىقشاماۋدانىندا جانە ناۋرىزباي اۋدانىنىڭ «دوستىق» ىقشاماۋدانىندا ءبىر اۋىسىمدا ءارقايسىسى 1500 وقۋشىنىڭ ءبىلىم الۋىنا مۇمكىندىك بەرەتىن №208 جانە 209 مەكتەپ-گيمنازياسى اشىلدى (مەكتەپتەردە ەكى اۋىسىم بويىنشا وقىتىلادى)، دەپ حابارلايدى Almaty-akshamy.kz.

ناۋرىزباي اۋدانىندا ورنالاسقان №208 مەكتەپ-گيمنازياسىنداعى 37 سىنىپتا 960 ادام وقىماق. ساباقتار قازاق تىلىندە جۇرگىزىلەدى.

№ 209 مەكتەپ (الاتاۋ اۋدانى) 2851 وقۋشىعا ارنالعان، مۇندا 109 سىنىپ بار. مەكتەپتە ساباقتار قازاق جانە ورىس تىلىندە جۇرگىزىلەدى.

جاڭا مەكتەپتەر تيپتىك جوبالار بويىنشا سالىنباعان. جوبالاۋ كەزىندە ءبىلىم وشاقتارىنا قويىلاتىن جاڭا ستاندارتتار ارنايى ازىرلەنىپ، قابىلداندى. ولار زاماناۋي ساۋلەتىمەن، جان-جاقتى ويلاستىرىلعان كەڭىستىك ديزاينىمەن، كەڭ سىنىپتارى جانە قوعامدىق كەڭىستىگى  بار ەرگونوميكالىق ينتەرەرىمەن ەرەكشەلەنەدى.

مەكتەپتەردىڭ وقۋ كابينەتتەرى ينتەراكتيۆتى پانەلمەن، SMART تاقتامەن جانە زاماناۋي ۇلگىدەگى جيھازبەن جابدىقتالعان. سپورت زالداردىڭ توبەسى مەن قابىرعاسى دىبىس وتكىزبەيتىن پانەلمەن قاپتالعان، بۇل سپورتتىق ءىس-شارا وتكىزۋ كەزىندە وتە ىڭعايلى، دىبىستى وقشاۋلايدى.

بالالاردىڭ قاۋىپسىزدىگىن قامتاماسىز ەتۋ ءۇشىن مەكتەپتەر Face ID قاۋىپسىزدىك جۇيەسىمەن جابدىقتالعان. اتا-انالار بالالارىنىڭ مەكتەپكە كىرىپ-شىققانىن ءبىلىپ وتىرادى.

قوسىمشا اقپاراتتى مەكتەپ ديرەكتورلارىنان بىلۋگە بولادى:

№208 (+7 776 8177676 ) ادەنوۆا گۇلبادا ەسەيحان قىزى

№209 (+7 701474 72 18) اداموۆ نۇرلان جۇماعازى ۇلى