الماتىدا بيىل توعىز ايدا 9 مىڭنان استام ادام اتاۋلى الەۋمەتتىك كومەك الدى

الماتىدا از قامتىلعان جانە الەۋمەتتىك وسال ساناتتاعى ازاماتتارعا اتاۋلى الەۋمەتتىك كومەك كورسەتۋ جانە ارنايى الەۋمەتتىك قىزمەتتەر ۇسىنۋ جۇمىسى جالعاسىپ كەلەدى. 2025 جىلدىڭ باسىنان بەرى الەۋمەتتىك قورعاۋ سالاسىندا قالا تۇرعىندارىنا 21 مىڭنان استام مەملەكەتتىك قىزمەت كورسەتىلگەن. ونىڭ ىشىندە جاردەماقى راسىمدەۋ، از قامتىلعان وتباسىلارعا كومەك كورسەتۋ جانە الەۋمەتتىك قىزمەت كورسەتۋ بار. بۇل تۋرالى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ وكىلدەرى حابارلادى. ەگدە جاستاعى ازاماتتارعا، ەرەكشە قاجەتتىلىگى بار ادامدارعا (ونىڭ ىشىندە بالالارعا) جانە قيىن ومىرلىك جاعدايدا قالعان تۇلعالارعا ارنايى الەۋمەتتىك قىزمەتتەر كورسەتۋگە ەرەكشە كوڭىل ءبولىنىپ وتىر. جىل باسىنان بەرى شامامەن 9 مىڭ الماتىلىق وسىنداي ارنايى الەۋمەتتىك قىزمەتتەردى پايدالاندى. كومەك تۇرلەرى ستاسيونارلىق، جارتىلاي ستاسيونارلىق جاعدايدا جانە ۇيدە كورسەتىلەدى. بيىل اتاۋلى الەۋمەتتىك كومەك تولەۋگە 1،8 ميلليارد تەڭگەدەن استام قاراجات بولىنگەن. قازىرگى تاڭدا 1 819 وتباسى، ياعني 9 063 ادام وسى كومەكتى الىپ وتىر. بۇعان قوسا، 1 جاستان 6 جاسقا دەيىنگى بالالارى بار از قامتىلعان وتباسىلارعا بالالار تاعامى مەن تۇرمىستىق حيميا تاۋارلارىن ساتىپ الۋعا ارنالعان اي سايىنعى تولەم بەرىلەدى. تۇرعىن ۇي-كوممۋنالدىق قىزمەتتەرگە جۇمسالاتىن شىعىندارى بەلگىلەنگەن شەكتەن اسىپ كەتكەن ازاماتتارعا تۇرعىن ءۇي كومەگى كورسەتىلىپ جاتىر. بۇل ماقساتقا 2025 جىلى شامامەن 30 ميلليون تەڭگە قاراستىرىلعان، جۇزدەگەن وتباسى وسى كومەكتى الدى. سونداي-اق، كوممۋنالدىق قىزمەت تاريفتەرىنىڭ وسۋىنە بايلانىستى الەۋمەتتىك جاعىنان مۇقتاج جەكەلەگەن ساناتتاعى ازاماتتارعا وتەماقى تولەمدەرى بەرىلىپ جاتىر. جۇمىسپەن قامتۋ جانە الەۋمەتتىك باعدارلامالار باسقارماسىنىڭ حابارلاۋىنشا، اتاۋلى الەۋمەتتىك كومەكتىڭ (ااك) باستى ماقساتى – تەك ماتەريالدىق جاردەم بەرۋ ەمەس، سونىمەن قاتار ازاماتتاردىڭ ەڭبەك بەلسەندىلىگىن ارتتىرۋعا جانە وتباسىلاردى ءومىردىڭ قيىن جاعدايىنان شىعۋعا ىنتالاندىرۋ. ااك جان باسىنا شاققانداعى تابىسى كەدەيلىك شەگىنەن تومەن وتباسىلارعا بەرىلەدى. ول ەكى تۇرگە بولىنەدى: دەنساۋلىعىنا بايلانىستى ەڭبەككە قابىلەتسىز ازاماتتارعا كورسەتىلەتىن شارتسىز كومەك جانە وتباسىنىڭ ەڭبەككە قابىلەتتى مۇشەلەرى جۇمىسپەن قامتۋ باعدارلامالارىنا قاتىسقان جاعدايدا شارتتى كومەك بەرىلەدى.