الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ جانە وتاندىق وندىرۋشىلەردى قولداۋ ماسەلەلەرى بويىنشا الماتى اكىمى دارحان ساتىبالدى «قازاقفيلم» شاعىناۋدانىندا وتەتىن دەمالىس كۇنگى جارمەڭكەگە، سونداي-اق «Magnum Cash & Carry» ساۋدا جەلىسىنىڭ سۋپەرماركەتىنە باردى.
دەمالىس كۇنگى جارمەڭكە ءار سەنبى جانە جەكسەنبى كۇندەرى ساعات 08:00-دەن 18:00-گە دەيىن تۇراقتى تۇردە وتكىزىلەدى. جارمەڭكە اۋماعىندا 96 ساۋدا ورنى جۇمىس ىستەيدى. ساۋداعا ەڭبەكشىقازاق، قاراساي جانە ىلە اۋداندارىنان كەلگەن شارۋا جانە فەرمەرلىك قوجالىقتار قاتىسادى. ساپار بارىسىندا قالا اكىمى وتاندىق اۋىل شارۋاشىلىعى وندىرۋشىلەرىن جۇيەلى قولداۋدىڭ جالعاساتىنىن اتاپ ءوتتى.
«ءبىزدىڭ مىندەت — تۇرعىنداردى قولجەتىمدى ءارى ساپالى ازىق-تۇلىكپەن قامتاماسىز ەتۋ، سونداي-اق فەرمەرلەر ءۇشىن قولايلى جاعداي جاساۋ»، — دەدى دارحان ساتىبالدى جارمەڭكە قاتىسۋشىلارىمەن كەزدەسۋ كەزىندە.
كاسىپكەرلەر جارمەڭكەنىڭ جۇمىسى توقتاپ قالۋى مۇمكىن دەگەن الاڭداۋشىلىق ءبىلدىردى. وسىعان وراي اكىم قازىرگى ۋاقىتتا جارمەڭكە فورماتىن ودان ءارى جاڭعىرتۋ شارالارى پىسىقتالىپ جاتقانىن جەتكىزدى. بۇل جوباعا زاماناۋي تاسىلدەر ەنگىزۋگە، قىزمەت كورسەتۋ ساپاسىن ارتتىرۋعا جانە دەلدالداردى بولدىرماي، تەك فەرمەرلەردىڭ تىكەلەي قاتىسۋىن قامتاماسىز ەتۋگە مۇمكىندىك بەرەدى.
ودان كەيىن دارحان ساتىبالدى «Magnum Cash & Carry» جاۋاپكەرشىلىگى شەكتەۋلى سەرىكتەستىگىنىڭ ساۋدا جەلىسىنە باردى. «Magnum» — الماتىداعى ەڭ ءىرى بولشەك ساۋدا جەلىسى. قالادا 80 دۇكەن جۇمىس ىستەيدى، ولاردىڭ جالپى اۋماعى 180 مىڭ شارشى مەتردەن اسادى. «Magnum» جەلىسىندە الماتى بويىنشا 5،2 مىڭنان استام ادام جۇمىسپەن قامتىلعان. ساۋدا جەلىسىنىڭ قىزمەتىن 1،5 ميلليون الماتىلىق پايدالانادى. 2019 جىلدان باستاپ «Magnum Cash & Carry» الەۋمەتتىك ماڭىزى بار ازىق-تۇلىك تاۋارلارىنىڭ باعاسىن تۇراقتاندىرۋ باعدارلاماسىنا بەلسەندى قاتىسىپ كەلەدى. وسى كەزەڭدە جەلى تومەندەتىلگەن باعامەن 100 مىڭ توننادان استام ءونىم وتكىزدى.
قازىرگى ۋاقىتتا 10،4 مىڭ توننا كوكونىس ساتىپ الۋ جانە وتكىزۋ بويىنشا فورۆاردتىق كەلىسىم، سونداي-اق 11 ءتۇرلى تاۋاردىڭ باعاسىن بەكىتۋ ءۇشىن اينالىم قارىزى تۋرالى كەلىسىم قولدانىستا. 2025 جىلدىڭ باسىنان بەرى باعدارلامانىڭ ارقاسىندا قازاقستاندىقتار ازىق-تۇلىك ساتىپ الۋ كەزىندە 1،5 ملرد تەڭگە ۇنەمدەدى.