الماتى قالاسىندا حالىق قاھارمانى، داڭقتى قولباسشى باۋىرجان مومىش ۇلىنىڭ 115 جىلدىعىنا وراي «حالىق قاھارمانى – ب.مومىش ۇلى: ەرلىك مەكتەبى، ادەبي مۇرا جانە رۋحاني الەم» تاقىرىبىنداعى قالالىق عىلىمي كونفەرەنسيا ءوتتى.
الماتى قالاسى ىشكى ساياسات باسقارماسىنىڭ قوعامدىق دامۋ ورتالىعى مەن باۋىرجان مومىش ۇلى اتىنداعى №131 مەكتەپ-ليسەيىنىڭ ۇيىمداستىرۋىمەن وتكەن ءىس-شارا «ادال ازامات» ءبىرتۇتاس تاربيە باعدارلاماسى اياسىندا جۇزەگە اسىرىلدى. كونفەرەنسيانىڭ نەگىزگى ماقساتى – تۇلعاسى مەن بولمىسى بولەك باتىردىڭ وشپەس مۇراسىن جاس ۇرپاق ساناسىنا ءسىڭىرۋ، ەلىن سۇيگەن ەر تۇلعاسىن ناسيحاتتاۋ، ۇلتتىق رۋح پەن پاتريوتتىق قۇندىلىقتاردى كەڭىنەن دارىپتەۋ.
شارا باۋىرجان مومىش ۇلىنىڭ ەسكەرتكىشىنە گۇل شوقتارىن قويۋ راسىمىنەن باستالدى. سالتاناتتى شارادان كەيىن وقۋشىلار «جاس باۋىرجانشىلار» قاتارىنا قابىلدانىپ، كونفەرەنسيانىڭ اشىلۋى مەرەكەلىك كونسەرتپەن جالعاستى.
كونفەرەنسيا بارىسىندا پەداگوگتار باۋىرجان مومىش ۇلىنىڭ مۇراسىن ءبىلىم بەرۋ مەن تاربيە ۇدەرىسىندە ءتيىمدى قولدانۋ ادىستەرى جونىندە بايانداما جاساپ، زەرتتەۋ جۇمىستارىن تانىستىردى. ۇستازدار باتىر ونەگەسىن تاربيە جۇمىسىنىڭ تەمىرقازىعى رەتىندە قاراستىرىپ، ونى جاس ۇرپاقتىڭ ازاماتتىق بولمىسىن قالىپتاستىرۋداعى ماڭىزدى رۋحاني رەسۋرس رەتىندە اتاپ ءوتتى.
سونىمەن قاتار وقۋشىلار باۋىرجان مومىش ۇلى مۇراسىنىڭ زاماناۋي قوعامداعى ورنى مەن باتىر تۇلعاسىنىڭ جاس ۇرپاق تاربيەسىندەگى ماڭىزىنا ارنالعان شىعارماشىلىق جانە زەرتتەۋ ەڭبەكتەرىن ۇسىندى.
ماراپاتتاۋ ءراسىمى بارىسىندا باتىردىڭ كوزىن كورگەن زامانداستارى مەن قوعام قايراتكەرلەرى جاس بۋىن الدىندا ءسوز سويلەپ، باۋىرجان مومىش ۇلىنىڭ ءومىر جولى مەن ەرلىككە تولى بولمىسى تۋرالى تاعىلىمدى ەستەلىكتەرىمەن ءبولىستى. قوعام قايراتكەرى ورالجان ماساتبايەۆ جاقاۋ ۇلى باۋىرجان مومىش ۇلى مۇراسىنىڭ بۇگىنگى قوعام ءۇشىن ايرىقشا ماڭىزعا يە ەكەنىن اتاپ ءوتتى:
«ەلىمىز ادىلەتتى قازاقستان يدەولوگياسى اياسىندا جاڭا بەتالىسقا قادام باستى. سول بەتبۇرىستىڭ رۋحاني وزەگىندە باۋىرجان مومىش ۇلىنىڭ مۇراسى تۇر. باتىردىڭ ءومىر جولى مەن تاعىلىمى ادىلدىككە، شىندىق پەن اقيقاتقا نەگىزدەلگەن. بۇل قۇندىلىقتار ابايدان باستاۋ الىپ، ءال-فارابي مەن باۋىرجان مومىش ۇلى سىندى ۇلى تۇلعالاردىڭ مۇرالارىمەن ساباقتاسىپ جاتىر. بۇگىنگى كونفەرەنسيادا ۇسىنىلعان باياندامالاردىڭ بارلىعى قازىرگى ءبىلىم بەرۋ جۇيەسى ءۇشىن اسا وزەكتى ءارى قاجەتتى. باتىر مۇراسىن ۇلىقتاۋعا باعىتتالعان وسىنداي تاعىلىمدى ءىس-شارا ءۇشىن ۇيىمداستىرۋشىلارعا العىسىمدى بىلدىرەمىن»، – دەدى ول.
باۋىرجان مومىش ۇلى – تەك سوعىس قاھارمانى عانا ەمەس، ۇلت رۋحانياتىنىڭ بەرىك تىرەگى. باتىردىڭ قالدىرعان ونەگەسى مەن ادەبي-رۋحاني مۇراسى ۋاقىت وتكەن سايىن جاڭا قىرىنان اشىلىپ، بۇگىنگى جانە كەلەشەك ۇرپاققا باعىت-باعدار بەرەتىن قۇندىلىق رەتىندە ءوز ماڭىزىن ساقتاي بەرمەك.