الماتىدا جاۋىن-شاشىنعا بايلانىستى ارنايى تەحنيكا كەزەكشىلىگى كۇشەيتىلدى
«قازگيدرومەت» رمك مالىمەتىنشە، الماتىدا 8-10 جەلتوقسان ارالىعىندا قار ارالاس جاڭبىر جاۋىپ، تۇمان ءتۇسىپ، جەل كۇشەيەدى، سىناپ باعاناسى كۇرت تومەندەيدى، - دەپ حابارلايدى Aqshamnews.kz.
10 جەلتوقسانعا قاراعان ءتۇنى قالادا 6-9 سم، ال تاۋلى ايماقتا 15-20 سم قار ءتۇسۋى مۇمكىن. سيكلون وتكەننەن كەيىن 11 جەلتوقساننان باستاپ جاۋىن-شاشىن توقتاپ، تۇنگى تەمپەراتۋرا –13…–15°س-قا دەيىن تومەندەيدى.
اۋا رايىنىڭ بۇزىلۋىنا بايلانىستى قالانىڭ كوممۋنالدىق قىزمەتى كۇشەيتىلگەن رەجيمدە جۇمىس ىستەۋگە كوشتى. وندىرىستىك بازالاردا جۇرگىزۋشىلەر، مەحانيزاتورلار مەن جۇمىسشىلار تاۋلىك بويى كەزەكشىلىككە قويىلدى. بۇل تۋرالى الماتىنىڭ كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنىڭ وكىلدەرى ايتتى.
تاۋلىك بويى 1000-نان استام ارنايى تەحنيكا مەن 2،7 مىڭ جۇمىسشى جۇمىلدىرىلماق. ەڭىس، ءدوڭ جانە وزگە دە ءقاۋىپتى ۋچاسكەدە تايعاقتى ۋاقىتىلى انىقتاپ، جويۋ ءۇشىن جولعا پاترۋلدىك باقىلاۋ كۇشەيتىلدى، بارلىعى 75 جەدەل بريگادا كەزەكشىلىك ەتەدى. الماتى قالاسىنىڭ قۇتقارۋ قىزمەتىنىڭ 15 تەحنيكاسى مەن 50 قىزمەتكەرى، ال توتەنشە جاعدايلار دەپارتامەنتىنىڭ 53 تەحنيكاسى مەن 244 مامانى كەزەكشى بولۋعا دايىن.
سونىمەن قاتار قالا اكىمدىگىندە، اۋدان اكىمدىكتەرىندە، كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىندا، «الماتى تازالىق» كاسىپورنىندا جانە مەردىگەر ۇيىمداردا جۇمىستى باقىلاۋ بويىنشا تاۋلىك بويى كەزەكشىلىك ۇيىمداستىرىلدى. قار جاۋعانعا دەيىن نەگىزگى ماگيسترالدارعا كوكتايعاققا قارسى قوسپالاردى الدىن الا سەبۋ جوسپارلانعان.
كوكتايعاق كەزىندە جۇرگىزۋشىلەرگە جازعى دوڭگەلەكتەردى قىسقىعا اۋىستىرۋ، جىلدامدىقتى تومەندەتۋ، قاشىقتىقتى ساقتاۋ جانە شۇعىل بۇرىلماۋ ۇسىنىلادى. تاجىريبەسى از جۇرگىزۋشىلەر مۇمكىندىگىنشە قوعامدىق كولىكتى پايدالانعانى دۇرىس. جۇرگىنشىلەرگە تايعاق تروتۋاردا بارىنشا ساق بولىپ، بيىك عيماراتتاردىڭ ماڭىنا جاقىنداماۋ قاجەت، شاتىردان قار ءتۇسۋ ءقاۋپى بار. قالا تۇرعىندارىنا جولدارىن الدىن الا جوسپارلاپ، جىلى كيىنۋ ۇسىنىلادى.