2025 جىلعى 5 جەلتوقساندا وقۋشىلار سارايىنىڭ دوڭگەلەك زالىندا الماتى قالاسىنىڭ جاس سايلاۋشىلار كلۋبىنىڭ «سيفرلاندىرۋ جانە جاساندى ينتەللەكتتى ەنگىزۋ – نەگىزگى دەموكراتيالىق ۇدەرىستەردى دامىتۋ فاكتورى» تاقىرىبىنداعى ەكىنشى وتىرىسى ءوتتى. ءىس-شارانى الماتى قالاسى اۋماقتىق سايلاۋ كوميسسياسى ۇيىمداستىردى.
وتىرىسقا 70-تەن اسا ادام – جاس سايلاۋشىلار كلۋبىنىڭ مۇشەلەرى، اۋداندىق اۋماقتىق سايلاۋ كوميسسيالارىنىڭ وكىلدەرى، سيفرلاندىرۋ سالاسىنىڭ ماماندارى، سونداي-اق جاستار ۇيىمدارى مەن مەكتەپتەردىڭ ءوزىن-وزى باسقارۋ قۇرىلىمدارىنىڭ وكىلدەرى قاتىستى.
كەزدەسۋدىڭ مودەراتورى الماتى قالالىق اسك ءتوراعاسى ايگۇل كالىكوۆا بولدى. ول وتىرىستى اشىپ، پرەزيدەنتتىڭ «جاساندى ينتەللەكت داۋىرىندەگى قازاقستان» اتتى جولداۋىندا ايقىندالعان سيفرلىق ترانسفورماسيانىڭ ماڭىزدىلىعىن اتاپ ءوتتى.
باعدارلاما اياسىندا تومەندەگى باياندامالار ۇسىنىلدى:
* بوستاندىق اۋدانىنىڭ اسك ءتوراعاسى شولپان كالياسكاروۆا – «سايلاۋ ۇدەرىسىندە جي مەن سيفرلىق قۇرالداردى قولدانۋ»؛
* ق ر پرەزيدەنتى جانىنداعى مەملەكەتتىك باسقارۋ اكادەمياسى الماتى قالاسى فيليالىنىڭ ديرەكتورى اينۋر يدريسوۆا – «بەلسەندى ازاماتتىق قوعام قالىپتاستىرۋداعى جاستارمەن جۇمىستىڭ ءرولى»؛
* «الماتى قالاسىن دامىتۋ ورتالىعى» اق باسقارۋشى ديرەكتورى رۋسلان ءبارماشوۆ – «Smart City جوبالارىندا جي قولدانۋ»؛
* مەكتەپتىڭ ءوزىن-وزى باسقارۋ كوشباسشىسى ماكسيم پاك – «سايلاۋ ۇدەرىسىندەگى جي مۇمكىندىكتەرى».
سپيكەرلەر سيفرلىق تەحنولوگيالاردى ەنگىزۋدىڭ ناقتى مىسالدارىن كەلتىردى: سايلاۋشىلاردىڭ ەلەكتروندى تىزىمدەرىنە كوشۋ، اقپاراتتىق قاۋىپسىزدىكتى ارتتىرۋ، جاساندى ينتەللەكتتى بەينەاناليتيكا جۇيەلەرىندە، قالالىق جەدەل باسقارۋ ورتالىعىندا، مەديسينا مەن جول ينفراقۇرىلىمىندا قولدانۋ. سونىمەن قاتار بيۋللەتەندەردى وڭدەۋدە، انوماليالاردى انىقتاۋدا، سايلاۋشىلارعا ارنالعان چات-بوتتاردا جانە قوعامدىق پىكىردى تالداۋدا ءجي-دىڭ بولاشاعى ءسوز بولدى. سونىمەن بىرگە ديپفەيكتەر مەن الگوريتمدىك قيسىقتىق سياقتى تاۋەكەلدەرگە دە نازار اۋدارىلدى.
شاقىرىلعان قوناقتار قاتارىندا الماتىنىڭ جاستار كوميۋنيتي-ورتالىقتارىنىڭ جەتەكشىلەرى مەن ولاردىڭ ورىنباسارلارى، ساياسي پارتيا وكىلدەرى، سونداي-اق مەكتەپتەردىڭ ءوزىن-وزى باسقارۋ بەلسەندىلەرى بولدى.
باياندامالاردان كەيىن پىكىرتالاس ءوتىپ، قاتىسۋشىلار سيفرلىق ترانسفورماسيا، جاساندى ينتەللەكتتىڭ سايلاۋ اشىقتىعىن ارتتىرۋداعى ءرولى جانە جاستاردىڭ دەموكراتيالىق ۇدەرىستەرگە قاتىسۋىن كۇشەيتۋ ماسەلەلەرى بويىنشا وي ءبولىستى.
وتىرىس قورىتىندىسىندا ايگۋل كالىكوۆا بارلىق قاتىسۋشىلارعا بەلسەندىلىك تانىتقانى ءۇشىن العىس ايتىپ، مۇنداي كەزدەسۋلەر جاستاردىڭ دەموكراتيالىق ۇدەرىستەرگە قاتىسۋ مادەنيەتىن قالىپتاستىرۋعا ىقپال ەتەتىنىن اتاپ ءوتتى.
