الماتىدا اتموسفەرالىق اۋانى قورعاۋ قاعيداسىنىڭ جوباسى ازىرلەندى. كەلەسى جىلدىڭ باسىندا ونى ءماسليحاتتىڭ قاراۋىنا ەنگىزۋ جوسپارلانۋدا. قۇجات اۋانى لاستايتىن ستاسيونارلىق جانە جىلجىمالى كوزدەردىڭ جۇمىسىنا قويىلاتىن تالاپتاردى قاتاڭداتۋدى كوزدەيدى، دەپ حابارلايدى aqshamnews.kz
بۇگىنگى تاڭدا الماتىدا قالدىقتاردىڭ ەڭ كوپ ۇلەسى اۆتوكولىككە – 60% جانە 27% ونەركاسىپتىك كاسىپورىندارعا تيەسىلى. تەرىس كورسەتكىشتەردى تومەندەتۋ ماقساتىندا قالا باسشىلىعى ديزەل وتىنىمەن جۇرەتىن اۆتوبۋستار ساتىپ الۋعا تىيىم سالدى. قازىرگى ۋاقىتتا گازبەن جۇرەتىن 770 اۆتوبۋس، 115 ەلەكتر اۆتوبۋسى جانە تروللەيبۋس پاركىن تولىعىمەن جاڭارتقان 112 تروللەيبۋس ساتىپ الىندى.
«كەلەسى جىلى ءبىز گازبەن جۇرەتىن تاعى 600 اۆتوبۋس پەن 200 ەلەكتر اۆتوبۋسىن ساتىپ الۋدى جوسپارلاپ وتىرمىز. وسىنىڭ ارقاسىندا ەكولوگيالىق تازا قوعامدىق كولىكتىڭ ۇلەسى 70%-عا دەيىن كوبەيەدى. ەلەكتر قۋاتتاۋ ستانسالارىنىڭ جەلىسىن كەڭەيتۋ ماقساتىندا بيىل جەكە ينۆەستورلار تارتىلدى. ەگەر بۇگىندە قالادا 300-دەن استام ستانسا بولسا، كەلەسى جىلى جەكە ينۆەستيسيالار ەسەبىنەن ولاردىڭ سانى ەكى ەسەگە ارتادى. سونداي-اق 2-جەو گازعا كوشىرۋ بويىنشا جۇمىستار جۇرگىزىلۋدە. كەلەسى جىلدىڭ جەلتوقسان ايىنان باستاپ 2026 جىلى تولىق اياقتالاتىن كەشەندەردى كەزەڭ-كەزەڭىمەن ىسكە قوسۋ جوسپارلانۋدا. جەو-نى گازعا اۋىستىرۋدىڭ ارقاسىندا قالدىقتار 90%-عا تومەندەتىلەتىن بولادى. سونىمەن قاتار ءبىز قورشاعان ورتانى قورعاۋدى زاڭنامالىق رەتتەۋ بويىنشا جۇيەلى تۇردە جۇمىس جۇرگىزىپ كەلەمىز. وسى جىلى ءبىزدىڭ باستامامىز بويىنشا الماتى قالاسىنىڭ ءماسليحاتىنا اتموسفەرالىق اۋانى قورعاۋ قاعيدالارىن بەكىتۋ قۇزىرەتى بەرىلدى. ونىڭ جوباسى ازىرلەندى جانە ءبىرىنشى توقساندا ءبىز ونى بەكىتۋ ءۇشىن ءماسليحاتقا ەنگىزەمىز»، — دەپ اتاپ ءوتتى الماتى قالاسى اكىمىنىڭ ورىنباسارى الىشەر ءابدىقادىروۆ.