بۇگىن باستالعان شەبەرلىك ساباق 3 كۇنگە دەيىن جالعاسپاق
الماتىدا ەلىمىزدىڭ ءار وڭىرىنەن كەلگەن اسكەري جۋرناليستەر باس قوستى. ماقسات – ولاردىڭ كاسىبي شەبەرلىگىن دامىتۋ، شىعارماشىلىق تاجىريبە الماسۋ، دەپ حابارلايدى Almaty-akshamy.kz Almaty.tv-گە سىلتەمە جاساپ.
يگى باستامانى ۇلتتىق ۇلان باس قولباسشىلىعىنىڭ ماماندارى ۇيىمداستىرىپ وتىر. جيىن كەزىندە اقپاراتتى جەدەل تاراتۋ مەن قاۋىپسىزدىك تاقىرىبى كەڭىنەن تالقىلاندى. مامانداردىڭ بىلىكتىلىگىن ارتتىرۋ كۋرسى 2 جىلدا ءبىر رەت وتكىزىلەدى ەكەن. بيىل الماتى تاڭدالعان. بۇگىن باستالعان شەبەرلىك ساعاتى 3 كۇنگە دەيىن جالعاسپاق.
– قارا شاڭىراقتىڭ پروفەسسورلارى، ماماندارى اسكەري جۋرناليستەرگە ساباق بەرەدى. اسكەري جۋرناليستيكا سوڭعى ۋاقىتتا دامىپ كەلە جاتىر. بۇقارالىق اقپارات قۇرالدارىنا مىندەتتى تۇردە اسكەري ءومىردىڭ تىنىس-تىرشىلىگىن جاريالاپ وتىرامىز، – دەدى ق ر ۇلتتىق ۇلانى «قالقان» گازەتى مەن «بۇركىت» جۋرنالىنىڭ باس رەداكتورى ەربولات سۇلتانوۆ.