فۋتبولدان قازاقستان قۇراماسىنىڭ جاڭا فورماسى تانىستىرىلدى

جاڭا ۇلگىدە جانكۇيەرلەردىڭ دە پىكىرى ەسكەرىلىپتى

قازاقستان قۇراماسىنىڭ فۋتبولشىلارىنا جاڭا فورما ۇسىنىلدى. ونى ازىرلەۋ بارىسىندا مەملەكەتتىك رامىزدەر بەينەسى مەن قازاق حالقىنىڭ وزىندىك ەرەكشەلىكتەرىنە داۋىس بەرگەن جانكۇيەرلەردىڭ پىكىرى ەسكەرىلگەنى ايتىلادى، دەپ حابارلايدى Almaty-akshamy.kz Zakon.kz-كە سىلتەمە جاساپ.

قازاقستان فۋتبول فەدەراسياسى مەن «Entrea Sport» كومپانياسى ۇلتتىق قۇرامانىڭ جاڭا ويىن فورماسىن تانىستىردى. جاڭا فورمالار ۋەفا باعدارلاماسى اياسىندا شىعارىلدى.

ايتا كەتەيىك، وتكەن جىلى قفف پەن ۋەفا ۇلتتىق قۇرامالار ءۇشىن جاڭا فۋتبول جابدىقتارىن جاساۋ جانە قامتاماسىز ەتۋ تۋرالى كەلىسىمگە قول قويعان بولاتىن. كەلىسىم ۇلتتىق بىرەگەيلىكتى بىلدىرەتىن جابدىقتىڭ جەكە ديزاينىن جاساۋ مۇمكىندىگىن قاراستىرادى.

بارلىق جابدىق 100 OEKO-TEX سەرتيفيكاتىنىڭ ستاندارتتارىنا ساي، ول دەنساۋلىققا زياندى زاتتارعا وتە قاتاڭ شەكتەۋلەر قويادى.

ويىن فورماسى ءۇش جيىنتىقتا ۇسىنىلعان – سارى، كوك جانە قارا. كيىم ديزاينىن Errea Sport ماماندارىمەن بىرلەسىپ قازاقستانداعى ەڭ ءىرى سپورتتىق ديزاين كومپانيالارىنىڭ ءبىرى - Creeon كومپانياسى ازىرلەدى. ونى ازىرلەۋ بارىسىندا مەملەكەتتىك رامىزدەر بەينەسى مەن قازاق حالقىنىڭ وزىندىك ەرەكشەلىكتەرىنە داۋىس بەرگەن جانكۇيەرلەردىڭ پىكىرى ەسكەرىلدى.

ايتا كەتەيىك، قازاقستان قۇراماسى جاڭا فۋتبول جابدىقتارىنداعى العاشقى كەزدەسۋلەرىن 2023 جىلدىڭ ماۋسىم ايىندا سان-مارينو مەن سولتۇستىك يرلانديا قۇرامالارىنا قارسى وتكىزەدى.