اۋەزوۆ اۋدانى اكىمدىگى اپپاراتىنىڭ مالىمەتىنشە، «سپەسستروي گرۋپپ لتد» ج ش س بۇعان دەيىن امانجول كوشەسىندە تاراتۋ جەلىلەرى جوباسىن اياسىندا اۋىزسۋ جانە كارىز ينجەنەرلىك جەلىلەرىن جۇرگىزۋ جۇمىستارىن تولىق كولەمدە اياقتاعان، دەپ حابارلايدى Aqshamnews.kz.
اسفالتبەتون جامىلعىسىن قالپىنا كەلتىرۋ ۋاقىتشا كەيىنگە قالدىرىلدى. بۇل «QazaqGaz» اق تاپسىرىسىمەن 300 مم ديامەترلى بولات گاز قۇبىرىن تارتۋ جوسپارىنا بايلانىستى قابىلدانعان شەشىم ەدى. جول توسەمىن قايتا قازۋدان جانە تۇرعىندارعا قولايسىزدىق تۋعىزۋدان ساقتانۋ ءۇشىن قالپىنا كەلتىرۋ جۇمىستارى گاز قۇبىرى توسەلگەننەن كەيىن جاسالۋعا ءتيىس ەدى.
الايدا اۋداننىڭ جاۋىن سۋى قولدانىستاعى ارىق جۇيەسى ارقىلى وسى كوشەگە جينالىپ، جول توسەمىنە تۇسەتىن سالماقتى ارتتىرعان. بۇعان قوسا، ينجەنەرلىك جەلىلەردى التى مەترگە دەيىنگى تەرەڭدىكتە جۇرگىزۋ توپىراق نەگىزىن جۇمسارتتى.
"وسى جاعدايعا جانە قاتتى نوسەردىڭ اسەرى جولدىڭ شوگۋىنە جانە جابىننىڭ بۇلىنۋىنە اكەلدى. سونىڭ سالدارىنان 2025 جىلعى 16 قىركۇيەكتە جول جابىنىنىڭ وپىرىلىپ، 13 اۆتوكولىك زاقىمداندى" دەلىنگەن حابارلامادا.
قازىرگى ۋاقىتتا امانجول كوشەسى جابىلدى. تاڭەرتەڭنەن باستاپ كولىكتەردى ەۆاكۋاسيالاۋ، توپىراقتى شىعارۋ جانە جولدى تولىق تازارتقانعا دەيىن باللاست توسەۋ جۇمىستارى باستالادى.
سونىمەن قاتار مەردىگەر ۇيىم زاقىمدانعان اۆتوكولىكتەردىڭ يەلەرىنە كەلتىرىلگەن شىعىندى تولىق وتەيدى. ماسەلە الماتى قالاسى اكىمدىگىنىڭ باقىلاۋىندا.